National: ₹2,000 થી વધુના UPI પેમેન્ટ પર લાગી શકે છે ચાર્જ! જાણો કયા ટ્રાન્ઝેક્શન પર ચૂકવવી પડશે ફી

ભારતમાં યુપીઆઈ (UPI) દ્વારા લેવડદેવડ હવે ખૂબ જ મોટા પાયે થઈ રહી છે. પરંતુ હવે સરકાર યુપીઆઈનો ઉપયોગ કરતા યુઝર્સને એક આંચકો આપવાની તૈયારી કરી રહી છે.

ચાર્જ વ્યક્તિથી વ્યક્તિ (P2P) વચ્ચે થતા ટ્રાન્સફર પર લાગુ નહીં 

સરકાર યુપીઆઈ ચૂકવણી પર મર્ચેન્ટ ડિસ્કાઉન્ટ રેટ (MDR) અથવા તો ચાર્જ વસૂલવાની મંજૂરી આપી શકે છે. આ ફી ₹૨,૦૦૦ થી વધુના બિઝનેસ (વેપારી) ચૂકવણી પર ૦.૨૫% થી ૦.૪% સુધી હોઈ શકે છે. જોકે, આ ચાર્જ વ્યક્તિથી વ્યક્તિ (P2P) વચ્ચે થતા ટ્રાન્સફર પર લાગુ નહીં થાય.

નાણાં મંત્રી નિર્મલા સીતારામણે મંગળવારે સંસદમાં રજૂ કરેલા 'ટેક્સેશન એન્ડ અધર લોઝ (એમેન્ડમેન્ટ) બિલ'માં બેંકો અને પેમેન્ટ સર્વિસ પ્રોવાઈડર્સ પર ઈલેક્ટ્રોનિક પેમેન્ટ મોડ પર એમડીઆર (MDR) લગાવવા પરના પ્રતિબંધને હટાવવાનો પ્રસ્તાવ મૂક્યો છે. જોકે સરકારી અધિકારીઓએ સ્પષ્ટ કર્યું છે કે આ નિયમ ક્યારથી લાગુ કરવામાં આવશે તે અંગે હજુ સુધી કોઈ આખરી નિર્ણય લેવાયો નથી.

મોટાભાગના સામાન્ય વ્યવહારો મુક્ત રહેશે

સત્તાવાર અંદાજ મુજબ, ₹૨,૦૦૦ ની આ મર્યાદા કુલ યુપીઆઈ ટ્રાન્ઝેક્શનના માત્ર ૫ ટકા હિસ્સાને જ આવરી લેશે, પરંતુ આ વ્યવહારોનું મૂલ્ય કુલ ટ્રાન્ઝેક્શન વેલ્યુના ૬૫ ટકા જેટલું છે. દૂધ, શાકભાજી, કરિયાણું કે ઓટો-ટેક્સી જેવી રોજિંદી ખરીદીના પેમેન્ટ પર આની કોઈ અસર પડશે નહીં.

જુલાઈ મહિનામાં ૨૩.૭ અબજ યુપીઆઈ ટ્રાન્ઝેક્શન થયા હતા, જેની કુલ વેલ્યુ ₹૨૯.૯ લાખ કરોડ રહી હતી. એક અધિકારીએ જણાવ્યું હતું કે જો આ પ્રસ્તાવ લાગુ કરવામાં આવે તો પણ ૯૫% ટ્રાન્ઝેક્શન પર એમડીઆર લાગશે નહીં. આ ઉપરાંત, તમામ વેપારીઓ આ સામાન્ય ફી ગ્રાહકો પર પાસ કરશે નહીં.

મોટા વેપારીઓ માટે યુપીઆઈ પેમેન્ટ સંપૂર્ણપણે મફત નહીં રહે

ઉલ્લેખનીય છે કે, યુપીઆઈ ભારતની સૌથી મોટી ડિજિટલ પેમેન્ટ સિસ્ટમ બની ચૂકી છે, જ્યાં દર મહિને અબજો ટ્રાન્ઝેક્શન થાય છે. આ સિસ્ટમને મજબૂત અને લાંબા ગાળા માટે ટકાઉ બનાવી રાખવા માટે સરકાર અને રેગ્યુલેટર્સ નવા વિકલ્પો શોધી રહ્યા છે.

જો આ પ્રસ્તાવ લાગુ થાય છે, તો પણ સામાન્ય યુઝર્સ પર કોઈ અસર નહીં પડે, પરંતુ મોટા વેપારીઓ માટે યુપીઆઈ પેમેન્ટ સંપૂર્ણપણે મફત નહીં રહે. આગામી સમયમાં સરકારનો આખરી નિર્ણય આખી ડિજિટલ પેમેન્ટ ઇકોસિસ્ટમની દિશા નક્કી કરશે.