National: કૃષ્ણા પટેલ હત્યાકેસનો 12 વર્ષે થયો ખુલાસો; ઓસ્ટ્રેલિયન મહિલા ખેલાડીની છેડતી કરનાર અકીલ જ નીકળ્યો હત્યારો

ઓસ્ટ્રેલિયન મહિલા ક્રિકેટ ખેલાડી સાથેની છેડતીના કેસમાં ગયા વર્ષે ચર્ચામાં આવેલો કુખ્યાત બદમાશ અકીલ ઉર્ફે નાઈટ્રા હવે ૧૨ વર્ષ જૂના હત્યાકેસમાં પોલીસ શિકંજામાં આવી ગયો છે. ખજરાના પોલીસે ૧૨ વર્ષ પહેલાં થયેલી કૃષ્ણા પટેલની ચર્ચાસ્પદ હત્યાના કેસમાં તેની ધરપકડ કરી છે.

પોલીસ રેકોર્ડ મુજબ અકીલ સામે લૂંટ, હત્યા અને છેડતી જેવા ૧૪ થી વધુ ગંભીર ગુનાઓ નોંધાયેલા છે. કડક પૂછપરછ દરમિયાન તેણે પોતાના સાથી મોહમ્મદ આરિફ સાથે મળીને આ હત્યા કરી હોવાની કબૂલાત કરી છે. વર્ષ ૨૦૧૫ માં સોનાની ચેન, લોકેટ અને બાઇક લૂંટવાના ઇરાદાથી આ ભયાનક વારદાતને અંજામ આપવામાં આવ્યો હતો.

લૂંટના ઇરાદાથી કરી હતી કૂર હત્યા

ડીસીપી ઝોન-૨ અમનસિંહ રાઠોડના જણાવ્યા અનુસાર, ૧૭ એપ્રિલ ૨૦૧૫ ના રોજ ખજરાના પોલીસ સ્ટેશન વિસ્તારમાંથી ૧૭ વર્ષીય કૃષ્ણા પટેલનો મૃતદેહ મળી આવ્યો હતો. તે સમયે પોલીસે અનેક શકમંદોની પૂછપરછ કરી હતી પરંતુ આરોપીઓનો કોઈ પત્તો મળ્યો નહોતો.

મંગળવારે મોડી રાત્રે પોલીસે દૌલતબાગ ખજરાના નિવાસી અકીલ અને મોહમ્મદ આરિફની ધરપકડ કરી હતી. બંને આરોપીઓએ તેમના અન્ય એક સાથી પરવેઝ સાથે મળીને કૃષ્ણાને અવાવરૂ જગ્યાએ લઈ જઈને છરીના ઘા મારી પતાવી દીધો હતો અને પુરાવા નાશ કરવા માટે મૃતદેહને સળગાવીને ફરાર થઈ ગયા હતા.

ઓસ્ટ્રેલિયન મહિલા ખેલાડીની કરી હતી છેડતી

ઉલ્લેખનીય છે કે, અકીલને ગયા વર્ષે આઈસીસી મહિલા ક્રિકેટ વર્લ્ડ કપ દરમિયાન ઓસ્ટ્રેલિયન મહિલા ક્રિકેટર સાથે થયેલી છેડતીના કેસમાં ગિરફ્તાર કરવામાં આવ્યો હતો. ૨૩ ઓક્ટોબર ૨૦૨૫ ના રોજ સવારે હોટેલથી ખજરાના રોડ સ્થિત કેફે તરફ ચાલીને જઈ રહેલી બે ઓસ્ટ્રેલિયન મહિલા ખેલાડીઓની તેણે છેડતી કરી હતી, જે મામલે ભારે હોબાળો મચ્યો હતો.