National: SITની મોટી કાર્યવાહી: પૂર્વ મંત્રીનો ભત્રીજો બીજી વાર પોલીસ રિમાન્ડ પર, સરકારી ચોખાના કૌભાંડનો આરોપ

મધ્યપ્રદેશમાં ઈથેનોલ ઉત્પાદન માટે ફાળવવામાં આવેલા સરકારી ચોખાની ગેરકાયદેસર હેરાફેરી કરીને ખાનગી રાઈસ મિલોમાં મોકલવાના બહુચર્ચિત કૌભાંડમાં સ્પેશિયલ ઈન્વેસ્ટિગેશન ટીમ (SIT) ની કાર્યવાહી સતત ચાલુ છે.

સોમવારે આ કેસમાં રાજ્યના પૂર્વ મંત્રી અને બાલાઘાટના ભાજપ જીલ્લા પ્રમુખ રામકિશોર કાવરેના ભત્રીજા તેમજ 'હર્ષ રાઈસ ઈન્ડસ્ટ્રીઝ'ના ભાગીદાર આરોપી અવિનાશ કાવરેની જ્યુડિશિયલ કસ્ટડી પૂર્ણ થતાં તેને કોર્ટમાં રજૂ કરવામાં આવ્યો હતો. વારાસિવાની કોર્ટે આરોપીને ફરીથી ૧૪ ઓગસ્ટ સુધી પોલીસ રિમાન્ડ પર મોકલી આપ્યો છે.

SIT કૌભાંડના ઊંડાણ સુધી પહોંચવા કરશે પૂછપરછ

SIT દ્વારા આરોપી અવિનાશ કાવરે તેમજ તેના અન્ય ભાગીદારોની આ કૌભાંડમાં સંડોવણી અંગે નવી સિરેથી સઘન પૂછપરછ કરવામાં આવશે. ઉલ્લેખનીય છે કે, ગત ૩ જૂને બાલાઘાટ જિલ્લાના વારાસિવાની સ્થિત 'સંચેતી રાઈસ મિલ' બહારથી છિંદવાડાના ઈથેનોલ પ્લાન્ટ માટે નીકળેલો ચોખા ભરેલો ટ્રક ઝડપાયો હતો, ત્યારબાદ આ કરોડોના ચોખા કૌભાંડનો ખુલાસો થયો હતો.

અત્યાર સુધી ૧૭ ધરપકડ, ૨૮ ટ્રક જપ્ત

SIT એ આ કેસમાં ઈથેનોલ પ્લાન્ટના માલિકો, પ્રતિનિધિઓ અને રાઈસ મિલ સંચાલકો સહિત કુલ ૧૭ લોકો સામે એફઆઈઆર (FIR) નોંધીને તેમની ધરપકડ કરી છે. આ ઉપરાંત હેરાફેરીમાં વપરાયેલા ૨૮ જેટલા ટ્રકો પણ અત્યાર સુધીમાં જપ્ત કરવામાં આવ્યા છે.

ઉલ્લેખનીય છે કે, SIT એ ૩૧ જુલાઈના રોજ અવિનાશની ધરપકડ કરીને કોર્ટમાં રજૂ કર્યો હતો. પહેલાં તેને ૩ ઓગસ્ટ સુધી પોલીસ રિમાન્ડ પર અને ત્યારબાદ ૧૦ ઓગસ્ટ સુધી જ્યુડિશિયલ કસ્ટડીમાં મોકલવામાં આવ્યો હતો. હવે કોર્ટે ફરી તેના પોલીસ રિમાન્ડ મંજૂર કર્યા છે.