National: સ્વાતંત્ર્ય દિને ભારતને નિશાન બનાવી શકે છે ISI, સુરક્ષા એજન્સીઓ હાઈ એલર્ટ; નાના શહેરોમાં પણ ખતરો

ગુપ્તચર એજન્સીઓએ એક ગંભીર ચેતવણી જારી કરતાં જણાવ્યું છે કે પાકિસ્તાનની ગુપ્તચર એજન્સી ISI ના ઈશારે ભારત વિરોધી તત્વો સ્વાતંત્ર્ય દિવસની આસપાસ કોઈ મોટી આતંકી ઘટનાને અંજામ આપવાનો કાવતરો ઘડી રહ્યા છે.

અહેવાલો મુજબ, પાકિસ્તાન માત્ર સીમાવર્તી વિસ્તારોમાં જ નહીં પરંતુ દેશના આંતરિક વિસ્તારોમાં પણ હુમલા કરવાનો પ્રયાસ કરી શકે છે. આ ઈન્ટેલિજન્સ ઈનપુટ્સ બાદ દેશભરની તમામ સુરક્ષા એજન્સીઓને 'હાઈ એલર્ટ' પર મૂકી દેવામાં આવી છે.

સુરક્ષા દળોનું ધ્યાન ભટકાવવાનો પ્રયાસ

ઈન્ટેલિજન્સ બ્યુરો (IB) ના એક વરિષ્ઠ અધિકારીના જણાવ્યા અનુસાર, ISI માને છે કે ૧૫ ઓગસ્ટના રોજ સુરક્ષા દળોનું મુખ્ય ધ્યાન દિલ્હી અને જમ્મુ-કાશ્મીર પર કેન્દ્રિત રહેશે. આ પરિસ્થિતિનો ગેરફાયદો ઉઠાવીને ISI ૧૫ ઓગસ્ટ પહેલાં કે તે દિવસે કોઈ મોટો હુમલો કરવાનું પ્લાનિંગ કરી રહી છે. આ માટે જમ્મુ-કાશ્મીર ઉપરાંત બાંગ્લાદેશ સરહદ મારફતે પણ આતંકવાદીઓની ઘૂસણખોરી કરાવવાના પ્રયાસો થઈ રહ્યા છે.

ટિયર-૨ અને નાના શહેરોમાં પણ ખતરો

ગુપ્તચર અહેવાલમાં વધુમાં જણાવાયું છે કે મેટ્રો સિટીઝ સિવાય ISI નું લક્ષ્ય 'ટિયર-૨' અને નાના શહેરો પર પણ છે, જ્યાં મોટા શહેરોની સરખામણીએ સુરક્ષા વ્યવસ્થા સામાન્ય રીતે ઓછી સઘન હોય છે.

અધિકારીએ ઉમેર્યું હતું કે પાકિસ્તાન કબજા હેઠળના જમ્મુ-કાશ્મીર (PoJK) અને બલૂચિસ્તાનમાં ચાલી રહેલી ભારે અશાંતિના કારણે પાકિસ્તાની સેના અને ISI પર ભારે દબાણ છે. આંતરિક નિષ્ફળતાઓથી વિશ્વનું ધ્યાન ભટકાવવા માટે જ આ આતંકી કાવતરું ઘડવામાં આવી રહ્યું છે.