National: 'માત્ર મહિલાઓ' માટેના પ્રવાસમાં પુરુષોને પણ મોકલ્યા, ગ્રાહક અદાલતે ટ્રાવેલ કંપનીને ફટકાર્યો રૂ. 60 હજારનો દંડ

આ સમગ્ર મામલો થાઇલેન્ડના એક સ્પેશિયલ પેકેજ ટૂર સાથે જોડાયેલો છે. ટ્રાવેલ કંપનીએ આ ટૂરની જાહેરાત 'ઓન્લી ફોર વિમેન' (માત્ર મહિલાઓ માટે) તરીકે કરી હતી, પરંતુ પ્રવાસ દરમિયાન તે જ ગ્રુપમાં પુરુષો અને અન્ય પરિવારના સભ્યોને પણ સામેલ કરી દેવામાં આવ્યા હતા.

સંમતિ વગર આઇટિનરરી (ટૂર પ્લાન) બદલી નાખ્યો

ગ્રાહક કમિશને પોતાના આદેશમાં નોંધ્યું છે કે કંપનીએ બુકિંગ થઈ ગયા પછી ગ્રાહકની સંમતિ લીધા વિના જ પ્રવાસનો કાર્યક્રમ બદલી નાખ્યો હતો. ટૂર પેકેજમાં દર્શાવાયેલા પ્રખ્યાત 'જેમ્સ બોન્ડ આઇલેન્ડ' અને 'ફી-ફી આઇલેન્ડ'ની મુલાકાત રદ કરીને પ્રવાસીઓને માત્ર કોરલ આઇલેન્ડ લઈ જવામાં આવ્યા હતા.

આ ઉપરાંત, પેકેજમાં વચન આપ્યા મુજબ 4-સ્ટાર હોટેલના બદલે 3-સ્ટાર હોટેલમાં રોકાણ કરાવવામાં આવ્યું હતું. પ્રવાસ દરમિયાન ભોજન અને અન્ય વ્યવસ્થાઓમાં પણ ગંભીર ખામીઓ જોવા મળી હતી. કમિશને આ બાબતને ગ્રાહક સુરક્ષા કાયદા હેઠળ સેવામાં ઉણપ અને અયોગ્ય વેપાર રીતરસમ (Unfair Trade Practice) ગણાવી છે.

શું હતો સમગ્ર મામલો?

મુંબઈના ચેમ્બુર વિસ્તારમાં રહેતી એક મહિલાએ જાન્યુઆરી 2025માં ફેમિલી/લેડીઝ ટૂર માટે ફૂકેટ અને ક્રાબીના 4 રાત અને 5 દિવસના પ્રવાસ માટે રૂ. 99,500નું પેકેજ બુક કરાવ્યું હતું.

મહિલાના જણાવ્યા મુજબ, પ્રવાસ શરૂ થવાના માત્ર બે દિવસ પહેલા જ કંપનીએ આખો કાર્યક્રમ બદલી નાખ્યો હતો. પરંતુ કંપનીની 100 ટકા કેન્સલેશન ફીની શરતના કારણે મહિલા પાસે પ્રવાસ રદ કરવાનો કોઈ વિકલ્પ બચ્યો નહોતો અને તેમણે મજબૂરીમાં પ્રવાસ કરવો પડ્યો હતો.

કેસની સુનાવણી દરમિયાન ટ્રાવેલ કંપની કમિશન સમક્ષ હાજર રહી ન હતી. કમિશને રજૂ કરાયેલા દસ્તાવેજો અને પુરાવાઓના આધારે માન્યું કે કંપની પોતાના વચન મુજબ સેવાઓ પૂરી પાડવામાં સંપૂર્ણપણે નિષ્ફળ રહી છે.