National: 12 ઓગસ્ટે લાગશે વર્ષનું સૌથી મોટું સૂર્યગ્રહણ, દિવસમાં છવાઈ જશે અંધારું; ભારતમાં દેખાશે કે નહીં?

બુધવાર, ૧૨ ઓગસ્ટ ૨૦૨૬નો દિવસ વિશ્વભરના ખગોળ પ્રેમીઓ માટે અત્યંત ખાસ બની રહેશે. આ દિવસે એકસાથે અનોખી અને દુર્લભ ખગોળીય ઘટનાઓ જોવા મળશે. સવારે બુધ, મંગળ, ગુરુ, શનિ, યુરેનસ અને નેપ્ચ્યુન - આ છ ગ્રહો એક જ લાઈનમાં જોવા મળશે, જ્યારે દિવસ દરમિયાન પૂર્ણ સૂર્યગ્રહણનો નજારો જોવા મળશે.

આ ઉપરાંત, રાત્રિના સમયે પરસિડ ઉલ્કા વર્ષા (Perseid Meteor Shower) પણ તેના ચરમ સીમા પર હશે, જેને અમાસના ઘાટા અંધારાના કારણે જોવી વધુ સરળ બનશે.

ક્યાં-ક્યાં દેખાશે પૂર્ણ સૂર્યગ્રહણ?

૧૨ ઓગસ્ટે આ વર્ષનું સૌથી મોટું પૂર્ણ સૂર્યગ્રહણ થવા જઈ રહ્યું છે. ઉત્તરી રશિયા, ગ્રીનલેન્ડ, આઈસલેન્ડ, સ્પેન અને પોર્ટુગલના કેટલાક ભાગોમાં તે પૂર્ણ સૂર્યગ્રહણ તરીકે જોવા મળશે. આ દરમિયાન સ્પેનના ઉત્તરીય ભાગોમાં ગ્રહણ સમયે દિવસમાં થોડા સમય માટે અંધારું છવાઈ જાય તેવો નજારો સર્જાશે.

ક્યાં દેખાશે આંશિક સૂર્યગ્રહણ?

અમેરિકાના ઉત્તરીય ભાગો, કેનેડા, ઉત્તર-પશ્ચિમ આફ્રિકા અને યુરોપના અનેક વિસ્તારોમાં આંશિક સૂર્યગ્રહણ દેખાશે. આમાંથી કેટલીક જગ્યાએ ચંદ્ર, સૂર્યના ૧૦ થી ૯૦ ટકા ભાગને ઢાંકી દેશે. યુરોપના કેટલાક વિસ્તારોમાં આ ગ્રહણ સૂર્યાસ્ત સમયે દેખાશે.

ભારતીય સમય અનુસાર ગ્રહણનો સમય

૧૨ ઓગસ્ટે થનારું આ સૂર્યગ્રહણ ખૂબ જ ખાસ છે. ભારતીય સમય (IST) અનુસાર:

• પ્રારંભ: ૧૨ ઓગસ્ટની રાત્રે આશરે ૯:૦૫ વાગ્યે

• ખગ્રાસ (પૂર્ણ) ગ્રહણ: રાત્રે ૧૦:૨૯ વાગ્યે શરૂ થઈને ૧૧:૧૭ વાગ્યે મધ્ય અવસ્થામાં રહેશે.

• પૂર્ણ ગ્રહણ સમાપ્ત: રાત્રે ૧૨:૦૫ વાગ્યે (૧૩ ઓગસ્ટ)

• અંતિમ મોક્ષ: ૧૩ ઓગસ્ટની રાત્રે ૧:૨૯ વાગ્યે

શું ભારતમાં દેખાશે? આ સમયગાળા દરમિયાન ભારતમાં રાત્રિનો સમય હોવાથી આ સૂર્યગ્રહણ ભારતમાં દેખાશે નહીં.

૧૨ ઓગસ્ટ કેમ છે અનોખો દિવસ?

૧૨ ઓગસ્ટ ૨૦૨૬નો દિવસ ખગોળશાસ્ત્ર માટે ખૂબ જ દુર્લભ છે કારણ કે આ એક જ દિવસે પ્રકૃતિના અનોખા નજારા જોવા મળશે. સૂર્યોદયથી ૪૫ થી ૭૫ મિનિટ પહેલાં આકાશમાં ૬ ગ્રહો એક લાઈનમાં દેખાશે, જેમાંથી મંગળ, ગુરુ અને શનિને નરી આંખે જોઈ શકાશે. સાથે જ પૂર્ણ સૂર્યગ્રહણ અને અમાસની કાળી રાત્રે પરસિડ ઉલ્કા વર્ષાનો અદ્ભુત નજારો જોવા મળશે.