National: રામ મંદિર ચઢાવા ચોરી મામલે 20 જુલાઈએ સુપ્રીમ કોર્ટ કરશે સુનાવણી, SIT સોંપશે સ્ટેટસ રિપોર્ટ

અયોધ્યામાં આવેલા ભવ્ય રામ મંદિરના ચઢાવા અને દાનમાં કથિત ગેરરીતિની નિષ્પક્ષ અને નિર્ધારિત સમય મર્યાદામાં તપાસ કરવાની માંગ કરતી અનેક અરજીઓ પર સુપ્રીમ કોર્ટ 20 જુલાઈએ સુનાવણી હાથ ધરશે. સર્વોચ્ચ અદાલતની સત્તાવાર યાદી અનુસાર, આ કેસ સાથે જોડાયેલી ચાર અલગ-અલગ અરજીઓ પર દેશના મુખ્ય ન્યાયાધીશ (CJI) સૂર્યકાંત, જસ્ટિસ જોયમાલ્યા બાગચી અને જસ્ટિસ વી. મોહનાની ખંડપીઠ સુનાવણી કરશે.

આ અગાઉ ૧૩ જુલાઈએ સુપ્રીમ કોર્ટે આ અરજીઓ પર સુનાવણી કરવા સંમતિ દર્શાવી હતી. અદાલતે ઉત્તર પ્રદેશ સરકાર દ્વારા આ કેસની તપાસ માટે રચવામાં આવેલી એસઆઈટી (SIT) ને નિર્દેશ આપ્યો હતો કે તે કોર્ટ સમક્ષ તપાસનો સ્ટેટસ રિપોર્ટ રજૂ કરે. આ સાથે જ કોર્ટે 'શ્રી રામ જન્મભૂમિ તીર્થ ક્ષેત્ર ટ્રસ્ટ' ને પણ નોટિસ પાઠવીને આ મામલે જવાબ માંગ્યો હતો.

રામ મંદિર ટ્રસ્ટને 'પબ્લિક ટ્રસ્ટ' બનાવવાની માંગ

આ સમગ્ર વિવાદમાં મુખ્ય પક્ષકારોમાંના એક રહેલા નિર્મોહી અખાડાએ સુપ્રીમ કોર્ટના દ્વાર ખખડાવ્યા છે. અખાડાએ કેન્દ્ર સરકારને એવો નિર્દેશ આપવાની માંગ કરી છે કે રામ મંદિરની વ્યવસ્થા સંભાળતા 'શ્રી રામ જન્મભૂમિ તીર્થ ક્ષેત્ર ટ્રસ્ટ'નું પુનર્ગઠન કરવામાં આવે અને તેને સંપૂર્ણપણે 'પબ્લિક ટ્રસ્ટ' બનાવવામાં આવે.

અખાડાની દલીલ: નિર્મોહી અખાડાનું કહેવું છે કે વર્તમાન ટ્રસ્ટનું માળખું એક 'પ્રાઇવેટ ટ્રસ્ટ' જેવું છે, જે નવેમ્બર ૨૦૧૯ માં આવેલા સુપ્રીમ કોર્ટના ઐતિહાસિક ચુકાદાની ભાવનાની વિરુદ્ધ છે. તેથી કેન્દ્ર સરકારે આ વ્યવસ્થા બદલવી જોઈએ.

નિર્મોહી અખાડાની મુખ્ય માંગણીઓ પર એક નજર

અદાલતમાં દાખલ કરવામાં આવેલી અરજીમાં નિર્મોહી અખાડા દ્વારા કેટલીક મહત્વપૂર્ણ માંગણીઓ મૂકવામાં આવી છે:

પૂજા પદ્ધતિ અને વ્યવસ્થા પર ઉઠ્યા સવાલ

નિર્મોહી અખાડાએ મંદિરની પૂજા પદ્ધતિ સામે પણ સવાલ ઉઠાવ્યા છે. અરજીમાં જણાવાયું છે કે રામ મંદિરમાં તમામ ધાર્મિક વિધિઓ, સેવા, ભોગ અને પૂજા માત્ર 'રામાનંદી સંપ્રદાય' ની પરંપરાઓ અને નિર્મોહી અખાડાની વર્ષો જૂની પદ્ધતિઓ અનુસાર જ થવી જોઈએ.

ટ્રસ્ટના નિર્ણયો પર સાધુ-સંતોની સીધી દેખરેખ અને નિયંત્રણ રહે તે માટે પણ ચોક્કસ માર્ગદર્શિકા (ગાઇડલાઇન્સ) બનાવવાની માંગ કરવામાં આવી છે. હવે 20 જુલાઈએ સુપ્રીમ કોર્ટ આ મામલે શું વલણ અપનાવે છે તેના પર દેશભરની નજર રહેશે.