National: 'E20 નથી જોઈતું તો 100% પેટ્રોલ ખરીદો પણ વધુ કિંમત ચૂકવવી પડશે'; વિવાદ પર નીતિન ગડકરીનું મોટું નિવેદન

કેન્દ્રીય માર્ગ પરિવહન અને હાઈવે મંત્રી નીતિન ગડકરીએ ઈથેનોલ બ્લેન્ડેડ ફ્યુઅલ (E20) અંગે ચાલી રહેલા વિવાદ પર પોતાની ચૂપકીદી તોડી છે. તેમણે સ્પષ્ટ કર્યું છે કે વૈકલ્પિક ઈંધણને પ્રોત્સાહન આપવા પાછળ તેમનો કોઈ વ્યક્તિગત સ્વાર્થ નથી. ગડકરીએ જણાવ્યું કે તેઓ માત્ર ઈથેનોલ જ નહીં, પરંતુ હાઈડ્રોજન અને ઈલેક્ટ્રિક વાહનો સહિતના તમામ વૈકલ્પિક ઈંધણના સમર્થક રહ્યા છે. પોતાના પુત્રોના બિઝનેસ પર લાગેલા આરોપો અંગે પણ તેમણે ખુલીને વાત કરી હતી.

'મારા પુત્રોની કંપનીઓ પર ₹1600 કરોડનું દેવું છે, અફવાઓ ખોટી છે'

એક અગ્રણી અંગ્રેજી સમાચાર પત્ર સાથેની વાતચીતમાં નીતિન ગડકરીએ જણાવ્યું કે, "અમારો પરિવાર વર્ષોથી સુગર મિલના વ્યવસાય સાથે જોડાયેલો છે, જે અત્યારે મારા પુત્રો સંભાળે છે. જ્યારે ઈથેનોલ બ્લેન્ડિંગનો પ્રોગ્રામ પેટ્રોલિયમ મંત્રાલય ચલાવે છે, જેમાં મારો કોઈ રોલ નથી. મારા પુત્રોના બિઝનેસમાં ઈથેનોલનો હિસ્સો માત્ર ૧૦ ટકા જ છે અને આખા દેશના ઈથેનોલ બિઝનેસમાં તેમનો હિસ્સો ૦.૫ ટકા કરતા પણ ઓછો છે. ઉલટાનું તેમની કંપનીઓ પર ₹૧૬૦૦ કરોડનું દેવું છે. મારી છબી બગાડવા માટે આ બધી ખોટી અફવાઓ ફેલાવવામાં આવી રહી છે."

100% શુદ્ધ પેટ્રોલ જોઈતું હોય તો વધુ કિંમત આપવી પડશે

જ્યારે ગડકરીને પૂછવામાં આવ્યું કે શું દેશમાં ગ્રાહકો માટે ૧૦૦% શુદ્ધ પેટ્રોલ (ઈથેનોલ વગરનું) ઉપલબ્ધ કરાવવામાં આવશે? ત્યારે તેમણે સ્પષ્ટ શબ્દોમાં કહ્યું કે જો કોઈને E20 ઈંધણ નથી જોઈતું, તો તેઓ ૧૦૦% પેટ્રોલ ખરીદી શકે છે, પરંતુ તેના માટે તેમણે ઘણી વધારે કિંમત ચૂકવવી પડશે. તેમણે ઉમેર્યું કે E85 ફ્યુઅલની કિંમત E20 કરતા પણ ઓછી છે. હાલમાં ઈન્ડોનેશિયા અને થાઈલેન્ડ જેવા દેશો પણ બાયોફ્યુઅલ તરફ આગળ વધી રહ્યા છે.

માત્ર શેરડી જ નહીં, અન્ય વસ્તુઓમાંથી પણ બને છે ઈથેનોલ

ગડકરીએ વૈકલ્પિક ઈંધણનો બચાવ કરતા કહ્યું કે ભારત મોટા પાયે ક્રૂડ ઓઈલની આયાત કરે છે. હું માત્ર શેરડીમાંથી બનતા ઈથેનોલની વકીલાત નથી કરતો. પાણીપતમાં પરાલી (ડાંગરના કચરા) માંથી ઈથેનોલ બનાવવામાં આવી રહ્યું છે, આસામમાં વાંસમાંથી અને ઘણી જગ્યાએ ચોખા અને મકાઈમાંથી પણ ઈથેનોલ બને છે. બ્રાઝિલ દાયકાઓથી ઈથેનોલનો ઉપયોગ કરી રહ્યું છે અને ત્યાં કોઈ સમસ્યા આવી નથી.