National: જમ્મુ-કાશ્મીર અને લદ્દાખને ભારતથી અલગ કરવાનું મોટું કાવતરું નિષ્ફળ; માસ્ટરમાઇન્ડ ફેઝાન સામે NIAએ ચાર્જશીટ દાખલ કરી

દેશની સુરક્ષા અને અખંડિતતાને નુકસાન પહોંચાડવાનો પ્રયાસ કરી રહેલા ડિજિટલ નેટવર્ક સામે નેશનલ ઇન્વેસ્ટિગેશન એજન્સી (NIA)એ મોટી કાર્યવાહી કરી છે. ગુજરાતમાંથી સંચાલિત થઈ રહેલા ખતરનાક ઓનલાઇન કટ્ટરપંથ નેટવર્કના મુખ્ય આરોપી ફેઝાન વિરુદ્ધ NIAએ અમદાવાદની સ્પેશિયલ કોર્ટમાં ચાર્જશીટ દાખલ કરી દીધી છે.

આ માત્ર એક આરોપી સામેનું આરોપનામું નથી, પરંતુ તે ઊંડા અને નફરતી નેટવર્કનો પર્દાફાશ છે જે સોશિયલ મીડિયાના માધ્યમથી ભારતીય યુવાનોને ગેરમાર્ગે દોરવાનું અને દેશ વિરુદ્ધ ભડકાવવાનું કાવતરું રચી રહ્યું હતું. એજન્સીનો આરોપ છે કે તેણે હિંસક જેહાદને પ્રોત્સાહન આપવાનું કાવતરું રચ્યું હતું, ટાર્ગેટેડ કિલિંગ (ચોક્કસ લોકોની હત્યા)ની યોજના બનાવી હતી અને જમ્મુ-કાશ્મીર તેમજ લદ્દાખને ભારતથી અલગ કરવાની દિશામાં કામ કરી રહ્યો હતો.

પાકિસ્તાની હેન્ડલર સાથે જોડાણ અને હત્યાનું કાવતરું

NIAની તપાસમાં એ ભયાનક સત્ય સામે આવ્યું છે કે ફેઝાન સીધા જ પાકિસ્તાનમાં બેઠેલા પ્રતિબંધિત આતંકવાદી સંગઠન જૈશ-એ-મોહમ્મદના હેન્ડલર અને અલ-કાયદા સાથે જોડાયેલો હતો.

તેનો મુખ્ય હેતુ જમ્મુ-કાશ્મીર અને લદ્દાખને ભારતથી અલગ કરવાના દેશવિરોધી કાવતરાને અંજામ આપવાનો હતો. એટલું જ નહીં, દેશમાં કોમી તણાવ અને અરાજકતા ફેલાવવા માટે તેણે લક્ષિત હત્યાઓ (Targeted Killings) કરવાની પણ રણનીતિ બનાવી હતી. આ કાવતરાને પાર પાડવા માટે તેણે ઉત્તર પ્રદેશમાંથી ગેરકાયદેસર હથિયારો અને છ જીવંત કારતૂસ પણ મેળવ્યા હતા, જેને તપાસ દરમિયાન જપ્ત કરવામાં આવ્યા છે.

સોશિયલ મીડિયા બન્યું 'નફરતનું હથિયાર'

ફેઝાન પોતાના ઇન્સ્ટાગ્રામ એકાઉન્ટ (al.faizangaza)નો ઉપયોગ નિર્દોષ યુવાનોને ભટકાવવા માટે કરી રહ્યો હતો. તે હિંસક જેહાદ અને સશસ્ત્ર વિદ્રોહને પ્રોત્સાહન આપતા ખતરનાક વિડીયો અપલોડ કરતો હતો અને યુવાનોને લાલચ આપીને ઉશ્કેરતો હતો.

ડિજિટલ ફોરેન્સિક તપાસમાં તેના ઉપકરણોમાંથી અનેક વાંધાજનક વિડીયો અને તસવીરો મળી આવી છે. ગુજરાત એટીએસ (ATS) દ્વારા શરૂ કરવામાં આવેલી આ તપાસ માર્ચ મહિનામાં NIAએ પોતાના હાથમાં લીધી હતી. UAPA, BNS અને આર્મ્સ એક્ટ હેઠળ દાખલ કરાયેલો આ કેસ દેશને તોડવા માગતી તાકતો સામે એક કડક પ્રહાર છે. એજન્સી હવે આ નેટવર્ક સાથે જોડાયેલા અન્ય ચહેરાઓ અને સરહદ પાર બેઠેલા આકાઓને ખુલ્લા પાડવામાં લાગી ગઈ છે.