National: પતિ કરતાં વધુ કમાતી હતી પત્ની, છૂટાછેડા પછી માગતી હતી ભરણપોષણ; બોમ્બે હાઈકોર્ટે અરજી ફગાવી

બોમ્બે હાઈકોર્ટે એક મહિલાને વચગાળાનું ભરણપોષણ (અંતરિમ ગુજારા ભથ્થું) આપવાનો ઈનકાર કરી દીધો છે, કારણ કે તેની માસિક આવક તેના પતિ કરતાં પણ વધુ છે. આ કેસની સુનાવણી દરમિયાન કોર્ટે એક મહત્વની ટિપ્પણી કરતા એમ પણ કહ્યું હતું કે, આર્ટિફિશિયલ ઈન્ટેલિજન્સ (AI) ના વધતા પ્રભાવને કારણે પતિની આઈટી (IT) નોકરી પણ ભવિષ્યમાં જોખમમાં મુકાઈ શકે છે.

અમેરિકાના ન્યૂ જર્સીમાં રહેતી આ મહિલા દર મહિને આશરે ૮ લાખ રૂપિયા ($૮,૭૦૦) કમાય છે. તેની આ કમાણી તેના પતિ કરતાં વધુ છે. કોર્ટે સ્પષ્ટ કર્યું કે વિદેશમાં રહેવાનો ખર્ચ વધુ છે, માત્ર તેટલા જ કારણોસર પતિ પાસેથી વચગાળાનું ભરણપોષણ માગવાનો અધિકાર મળતો નથી.

દર મહિને 1 લાખ રૂપિયાની માગ કરી હતી

જસ્ટિસ ભારતી ડાંગરે અને જસ્ટિસ મંજૂષા દેશપાંડેની ડિવિઝન બેંચે મહિલાની અરજી ફગાવી દીધી હતી, જેમાં તેણે ભરણપોષણ પેટે દર મહિને ૧ લાખ રૂપિયાની માગ કરી હતી. અરજીકર્તા મહિલા ૨૦૧૧થી યુએસમાં રહે છે અને નવી દિલ્હીની આઈટી સોલ્યુશન્સ પ્રોવાઈડર કંપની 'માર્ક ઈન્ફોટેક'માં કામ કરે છે.

'પતિની નોકરી પર પણ હોઈ શકે છે જોખમ'

મહિલાનો પતિ પણ આઈટી ક્ષેત્રમાં જ કામ કરે છે. હાઈકોર્ટે નોંધ્યું કે આઈટી ઈન્ડસ્ટ્રીમાં વધતી હરીફાઈ અને આર્ટિફિશિયલ ઈન્ટેલિજન્સ (AI) ના ઝડપી ઉપયોગને કારણે પતિની નોકરી સામે પણ ભવિષ્યમાં અનિશ્ચિતતા અને જોખમ ઉભું થઈ શકે છે.

ઉલ્લેખનીય છે કે, આ પહેલા ફેમિલી કોર્ટે પણ મહિલાની ભરણપોષણની અરજી ફગાવી દીધી હતી, જોકે પતિને કેસના ખર્ચ પેટે ૨૫,૦૦૦ રૂપિયા ચૂકવવાનો આદેશ આપ્યો હતો. આ દંપતીનું મોટું બાળક પિતાની કસ્ટડીમાં છે, જ્યારે નાનું બાળક માતા પાસે છે. ફેમિલી કોર્ટના આ આદેશને મહિલાએ હાઈકોર્ટમાં પડકાર્યો હતો.