સિયા બાદ હવે ઉર્મિલાનો ખૂની ખેલ: જીજાજીના પ્રેમમાં અંધ બનેલી યુવતીએ લગ્નના ૩ દિવસ પહેલા જ મંગેતરનો લીધો જીવ

ગિરીડીહ જિલ્લાના જમુઆ પોલીસ સ્ટેશન વિસ્તારમાં ગત દિવસોમાં બનેલી નિરજ હાજરાની રહસ્યમય ગુમશુદગી અને અપહરણના કેસમાં ગિરીડીહ પોલીસે સરાહનીય સફળતા મેળવી છે. પોલીસે ગણતરીના દિવસોમાં આ અંધારી કડીઓ જોડીને સનસનાટીપૂર્ણ હત્યાકાંડનો પર્દાફાશ કર્યો છે. પ્રેમ સંબંધ આડે આવતા થનારા પતિની જ ક્રૂરતાપૂર્વક હત્યા કરાવી લાશને બિહારના જંગલમાં ફેંકી દેવાના ગુનામાં પોલીસે મૃતકની થનારી પત્ની અને તેના જીજાજીની ધરપકડ કરી લીધી છે, ગિરીડીહના ભિખોડીહ ગામનો રહેવાસી ૨૦ વર્ષીય નિરજ હાજરા ગત ૫ જુલાઈના રોજ અચાનક ગુમ થઈ ગયો હતો. તેના પિતા સુભાષ હાજરાએ આ અંગે જમુઆ પોલીસ સ્ટેશનમાં ફરિયાદ નોંધાવી હતી.

શરૂઆતમાં સામાન્ય ગુમશુદગીનો લાગતો આ મામલો પરિવારની શંકાના આધારે ગંભીર બન્યો હતો. પરિવારે નિરજનું અપહરણ થયું હોવાની આશંકા વ્યક્ત કરતા પોલીસે 8 જુલાઈના રોજ વિવિધ કલમો હેઠળ FIR નોંધી તપાસના ચક્રો ગતિમાન કર્યા હતા. કેસની ગંભીરતાને ધ્યાનમાં રાખીને ગિરીડીહના પોલીસ અધિક્ષક (SP) ડો. વિમલ કુમારના આદેશથી, SDPO અમરેન્દ્ર કુમારના નેતૃત્વમાં એક 'સ્પેશિયલ ઈન્વેસ્ટિગેશન ટીમ'ની રચના કરવામાં આવી હતી. આ ટીમે ટેકનિકલ સેલની મદદથી મૃતકના મોબાઈલ લોકેશન, કોલ ડિટેઈલ રેકોર્ડ્સ અને ડિજિટલ પુરાવાઓનું બારીકાઈથી પૃથ્થકરણ શરૂ કર્યું હતું.

તપાસ દરમિયાન SITને મહત્વની કડીઓ હાથ લાગી હતી, જેના આધારે સર્ચ ઓપરેશન ચલાવીને બિહારના જમુઈ જિલ્લામાં આવેલા બેલા જંગલમાંથી એક અજાણ્યો મૃતદેહ રિકવર કરવામાં આવ્યો હતો. પરિવારજનો દ્વારા આ મૃતદેહની ઓળખ ગુમ થયેલા નિરજ હાજરા તરીકે કરવામાં આવી હતી. લાશ મળતા જ આ કેસ સત્તાવાર રીતે હત્યાના ગુનામાં તબદીલ થયો હતો. પોલીસ પૂછપરછ અને તપાસમાં જે હકીકત સામે આવી છે તે ચોંકાવનારી છે. ગિરીડીહના ગમતરિયા ગામની રહેવાસી ઉર્મિલા કુમારીના લગ્ન નિરજ હાજરા સાથે નક્કી થયા હતા અને લગ્નને માત્ર 3 દિવસ બાકી હતા.

જો કે, ઉર્મિલાને તેના પોતાના જીજાજી સુભાષ પાસવાન (રહે. જમુઈ, બિહાર) સાથે લાંબા સમયથી પ્રેમ સંબંધ હતો. ઉર્મિલા આ લગ્ન કરવા નહોતી માંગતી. આથી, બંને પ્રેમીઓએ નિરજને પોતાના રસ્તામાંથી હંમેશા માટે હટાવવાનું ષડયંત્ર રચ્યું હતું. યોજના મુજબ, ઉર્મિલા અને સુભાષે નિરજને ફોન કરીને બોલાવ્યો હતો અને ત્યારબાદ અન્ય સાગરીતો સાથે મળી તેની ઘાતકી હત્યા કરી નાખી હતી. ગુનાના પુરાવા નાશ કરવાના ઈરાદે તેઓએ મૃતદેહને બિહારના અંતરિયાળ બેલા જંગલમાં ફેંકી દીધો હતો. બિહાર પોલીસના સહયોગથી હત્યામાં વાપરવામાં આવેલા બે તીક્ષ્ણ છરા પણ કબજે કરવામાં આવ્યા છે.