National: સંસદનું ચોમાસું સત્ર: અનેક સાંસદોની સીટો બદલાઈ, જાણો કેમ અચાનક બદલવું પડ્યું સીટિંગ એરેન્જમેન્ટ?

સંસદના ચોમાસુ સત્રની શરૂઆત પહેલાં લોકસભામાં સાંસદોના બેસવાની વ્યવસ્થા (Seating Arrangement) માં મોટો ફેરફાર કરવામાં આવ્યો છે. લોકસભા સ્પીકર ઓમ બિરલાએ નીચલા ગૃહમાં તૃણમૂલ કોંગ્રેસ (TMC) ના ૨૦ બળવાખોર સભ્યોને નવી સીટો ફાળવી છે, જેથી તેઓ પોતાની જૂની પાર્ટીના સાંસદોથી અલગ બેસી શકે. આ પ્રક્રિયા દરમિયાન કુલ ૩૯ સાંસદોની સીટો બદલવામાં આવી છે.

સીટિંગ એરેન્જમેન્ટમાં કેમ કરવો પડ્યો ફેરફાર?

તૃણમૂલ કોંગ્રેસના બળવાખોર સાંસદોને અલગ બેસાડવાના નિર્ણયને કારણે અન્ય પક્ષોના સાંસદોની સીટોમાં પણ ફેરફાર કરવો પડ્યો છે.

આ પ્રમુખ નેતાઓની સીટો બદલાઈ:

• અભિષેક બેનર્જી: મમતા બેનર્જીની આગેવાની વાળી તૃણમૂલ કોંગ્રેસના વરિષ્ઠ નેતા અભિષેક બેનર્જીની સીટ બદલી નાખવામાં આવી છે.

• પી.વી. મિથુન રેડ્ડી: YSR કોંગ્રેસના આ સાંસદને પણ નવો ડિવિઝન નંબર ફાળવવામાં આવ્યો છે.

• હરસિમરત કૌર બાદલ: શિરોમણી અકાલી દળના સાંસદ હરસિમરત કૌર બાદલની બેસવાની જગ્યા પણ બદલાઈ છે.

ડિવિઝન નંબરનું મહત્ત્વ: લોકસભા અને રાજ્યસભાના દરેક સભ્યને એક ખાસ 'ડિવિઝન નંબર' આપવામાં આવે છે. આ નંબરના આધારે સીટ ફાળવાય છે અને દસ્તાવેજો પર સહી કરવા તેમજ કોઈપણ બિલ પર મતદાન (Voting) કરતી વખતે આ જ નંબરનો ઉપયોગ થાય છે.

સ્પીકર ઓમ બિરલાએ ગૃહ શાંતિપૂર્વક ચલાવવા કરી અપીલ

સત્ર શરૂ થવાના એક દિવસ પહેલાં લોકસભા સ્પીકર ઓમ બિરલાની અધ્યક્ષતામાં બિઝનેસ એડવાઇઝરી કમિટી (BAC)ની બેઠક યોજાઈ હતી.

આ બેઠકમાં તૃણમૂલ કોંગ્રેસના બળવાખોર નેતા કાકોલી ઘોષ દસ્તીદાર પણ ઉપસ્થિત રહ્યા હતા. તમામ સાંસદો સોમવારથી શરૂ થઈ રહેલા ચોમાસુ સત્રમાં પોતપોતાના નવા ડિવિઝન નંબર અને સીટ પરથી કામગીરીમાં ભાગ લેશે.