National: વિમાનન ક્ષેત્રે મોટી ક્રાંતિ: ભારતમાં ખુલશે 11 નવા ફ્લાઈંગ ટ્રેનિંગ સંગઠનો, સરકારે લેટર ઓફ ઈન્ટેન્ટ કર્યા જાહેર

ભારતના ઝડપથી વધી રહેલા નાગરિક ઉડ્ડયન ક્ષેત્રને મજબૂત કરવા અને પાઈલટ ટ્રેનિંગ ઈકોસિસ્ટમને પ્રોત્સાહન આપવા માટે એક મહત્ત્વપૂર્ણ પગલું ભરવામાં આવ્યું છે. નાગરિક ઉડ્ડયન મંત્રી કે. રામમોહન નાયડુએ બુધવારે એરપોર્ટ ઓથોરિટી ઓફ ઈન્ડિયા (AAI) ના ૭ એરપોર્ટ પર ૧૧ નવા ફ્લાઈંગ ટ્રેનિંગ સંસ્થાઓ (FTO) ની સ્થાપના માટે લેટર ઓફ ઈન્ટેન્ટ (Letter of Intent) જારી કર્યા છે.

ટ્રેનિંગ ક્ષમતામાં ૭૫૦ કેડેટ્સનો વધારો થવાની અપેક્ષા

હાલમાં દેશના ૬૩ ઉડ્ડયન સ્થળો પરથી ૪૧ ફ્લાઈંગ ટ્રેનિંગ સંસ્થાઓ કાર્યરત છે. આ નવી ૧૧ સંસ્થાઓ ઉમેરાવાથી ભારતની વાર્ષિક પાઈલટ ટ્રેનિંગ ક્ષમતામાં ૭૫૦ કેડેટ્સનો વધારો થવાની અપેક્ષા છે, જે સ્થાનિક પાઈલટ તાલીમ ક્ષેત્ર માટે ખૂબ જ ફાયદાકારક સાબિત થશે.

સૌથી ઝડપથી વિકસતું એવિએશન માર્કેટ

આ પ્રસંગે સંબોધન કરતા મંત્રીશ્રીએ જણાવ્યું હતું કે, "વડાપ્રધાન નરેન્દ્ર મોદીજીના દૂરદર્શી નેતૃત્વ હેઠળ ભારત વિશ્વના સૌથી ઝડપથી વિકસતા એવિએશન માર્કેટ તરીકે ઊભરી આવ્યું છે."

તેમણે વધુમાં ઉમેર્યું હતું કે, વિકસિત ભારત અને આત્મનિર્ભર ભારતના વિઝન હેઠળ અમે એવિએશન ઈન્ફ્રાસ્ટ્રક્ચરનો વિસ્તાર કરી રહ્યા છીએ અને આ ક્ષેત્રની લાંબા ગાળાની વૃદ્ધિ માટે ભવિષ્ય માટે તૈયાર માનવબળ (વર્કફોર્સ) તૈયાર કરી રહ્યા છીએ.