National: ભારતે પાકિસ્તાનના પૂર અંગેના પાયાવિહોણા દાવા ફગાવ્યા, ભારતીય વિદેશ મંત્રાલયનો રોકડિયો જવાબ

ભારતે પાકિસ્તાનના એ દાવાઓને સખત શબ્દોમાં ફગાવી દીધા છે જેમાં એવો આક્ષેપ કરવામાં આવ્યો હતો કે ભારતે સરહદ પાર જાણી જોઈને પૂરની સ્થિતિ ઊભી કરી છે. ભારતે આ દાવાઓને "પાયાવિહોણા અને તથ્યોથી વિપરીત" ગણાવ્યા છે. સાથે જ સ્પષ્ટ કર્યું છે કે માનવતાના ધોરણે ભારત ઇસ્લામાબાદને પૂર સંબંધિત મહત્વપૂર્ણ ડેટા પૂરો પાડવાનું ચાલુ રાખશે.

પાકિસ્તાની મીડિયામાં આવી રહેલા આક્ષેપોને ફગાવતા વિદેશ મંત્રાલયના સત્તાવાર પ્રવક્તા રણધીર જેસ્વાલે સ્પષ્ટતા કરી હતી કે ચેનાબ નદીમાં પાણીનો પ્રવાહ વધવો એ ચોમાસા દરમિયાન પડેલા ભારે વરસાદનું પરિણામ છે.

'પૂર માનવસર્જિત નહીં પણ કુદરતી છે'

રણધીર જેસ્વાલે મીડિયા બ્રીફિંગમાં જણાવ્યું હતું કે, "અમે પાકિસ્તાની મીડિયાના એ અહેવાલો જોયા છે જેમાં ભારતે જાણી જોઈને પૂર લાવ્યા હોવાનો આરોપ મૂકવામાં આવ્યો છે. આવા આરોપો બિલકુલ પાયાવિહોણા છે."

તેમણે ઉમેર્યું કે ચેનાબ નદીની જળસપાટીમાં વધારો ૨૦ થી ૨૩ જુલાઈ ૨૦૨૬ દરમિયાન જમ્મુ અને આસપાસના વિસ્તારોમાં થયેલા ભારે ચોમાસું વરસાદને કારણે થયો છે. તેથી, નદીમાં પાણીનો પ્રવાહ વધવો એ કુદરતી ઘટના છે અને તે ભારતની કોઈ જાણી જોઈને કરેલી કાર્યવાહીનું પરિણામ નથી.

સિંધુ જળ સંધિ (IWT) પર ભારતનો મક્કમ સ્ટેન્ડ

આસિયાન ફોરમ (ASEAN Forum) માં પાકિસ્તાન દ્વારા કરવામાં આવેલી ટીકાઓ પર વિદેશ મંત્રાલયના પ્રવક્તાએ સિંધુ જળ સંધિ પર ભારતનું વલણ સ્પષ્ટ કર્યું હતું. તેમણે ભારપૂર્વક કહ્યું કે, "સિંધુ જળ સંધિ ત્યાં સુધી સ્થગિત (સસ્પેન્ડ) રહેશે જ્યાં સુધી પાકિસ્તાન સરહદ પારથી ચાલતા આતંકવાદને કાયમી અને વિશ્વસનીય રીતે બંધ ન કરી દે."

ચીન અને પ્રાદેશિક સાર્વભૌમત્વ પર કડક પ્રતિભાવ

ચીન અંગે પૂછવામાં આવેલા સવાલ પર પ્રવક્તાએ વિદેશ મંત્રીના નિવેદનનો સંદર્ભ આપતા કહ્યું કે ભારત ચીનની સાર્વભૌમત્વનું ઉલ્લંઘન કરતું નથી. પરંતુ તેમણે સ્પષ્ટ શબ્દોમાં યાદ અપાવ્યું કે ચીને ૧૯૬૩થી જમ્મુ-કાશ્મીર અને લદ્દાખના ભારતીય વિસ્તારો પર ગેરકાયદેસર કબ્જો જમાવી રાખ્યો છે.