National: F-16 ન કરી શકે રાફેલનો મુકાબલો, 'ઓપરેશન સિંદૂર' પર પૂર્વ પાકિસ્તાની એરફોર્સ અફસરે સ્વીકાર્યું સત્ય, માની ભારતીય જેટની તાકાત

પાકિસ્તાની એરફોર્સના નિવૃત્ત અધિકારી ખાલેદ ચિશ્તીએ ખુલ્લેઆમ સ્વીકાર્યું છે કે અમેરિકી બનાવટના F-16 યુદ્ધ વિમાનો ભારતના ફ્રેન્ચ રાફેલ (Rafale) જેટનો સામનો કરી શકે તેમ નથી. પાકિસ્તાની એર કમોડોર ખાલેદ ચિશ્તી (નિવૃત્ત) એ 'ઓપરેશન સિંદૂર' અંગે વાત કરતા જણાવ્યું હતું કે, જો પાકિસ્તાને રાફેલ સામે F-16 ને આગળ ધરીને લડવાનો પ્રયાસ કર્યો હોત તો પાકિસ્તાની વાયુસેનાને ભારે નુકસાન સહન કરવું પડ્યું હોત. F-16 લડાકુ વિમાનો દાયકાઓથી પાકિસ્તાની વાયુસેનાનું મુખ્ય હથિયાર રહ્યા છે, જ્યારે ભારતે ફ્રાન્સ પાસેથી અત્યાધુનિક રાફેલ જેટ ખરીદ્યા છે.

F-16 કેમ ન કરી શક્યું રાફેલનો સામનો?

સોશિયલ મીડિયા પર વાયરલ થયેલા એક ઈન્ટરવ્યુમાં ચિશ્તીને મે ૨૦૨૫ દરમિયાન ભારત-પાકિસ્તાન વચ્ચે થયેલા ચાર દિવસીય સંઘર્ષ અને લડાઈની પ્રથમ રાત્રે પાકિસ્તાન દ્વારા F-16 ને ફ્રન્ટલાઈન પર ન લાવવા અંગે પ્રશ્ન પૂછવામાં આવ્યો હતો.

આ અંગે વાત કરતા ખાલેદ ચિશ્તીએ જણાવ્યું કે, F-16 માં વપરાતી AIM-120C5 મિસાઈલની રેન્જ માત્ર ૭૦ કિલોમીટર છે. તેની સરખામણીમાં ભારતના રાફેલ વિમાનોમાં રહેલી મિસાઈલોની રેન્જ ૧૫૦ કિલોમીટરથી વધુ છે. જો F-16 ને આગળ કરવામાં આવ્યા હોત તો તેઓ રાફેલની મિસાઈલોનો સરળતાથી નિશાન બની ગયા હોત. આ જ કારણે રાફેલના ખતરાને જોતાં પાકિસ્તાને ચીન પાસેથી મળેલા J-10C ફાઈટર જેટને આગળ રાખવા પડ્યા હતા.

૨૦૧૯ ના સંઘર્ષનો કર્યો ઉલ્લેખ

ચિશ્તીએ ૨૦૧૯ ની હવાઈ આમને-સામનેની ઘટનાનો ઉલ્લેખ કરતાં કહ્યું કે, તે સમયે પાકિસ્તાન પાસે F-16 ફ્રન્ટ પર હતા અને ત્યારે વડાપ્રધાન નરેન્દ્ર મોદીએ કહ્યું હતું કે જો તે સમયે રાફેલ હોત તો સ્થિતિ કંઈક અલગ હોત. આ દર્શાવે છે કે રાફેલની વાસ્તવિક તાકાત કેટલી વધારે છે.

ઉલ્લેખનીય છે કે, એપ્રિલ ૨૦૨૫ માં પહલગામ આતંકી હુમલાના બે અઠવાડિયા બાદ ૭ મેના રોજ ભારતે 'ઓપરેશન સિંદૂર' લોન્ચ કર્યું હતું. આ ઓપરેશન હેઠળ ભારતીય સેનાએ પાકિસ્તાનના પંજાબ અને PoK માં આતંકી ઠેકાણાઓને નિશાન બનાવ્યા હતા. ચાર દિવસના આંતરરાષ્ટ્રીય સંઘર્ષ બાદ ૧૦ મેના રોજ બંને દેશો વચ્ચે સીઝફાયર થયું હતું.