National: CJPની તર્જ પર હવે 'E20 જનતા પાર્ટી' મેદાને, પેટ્રોલમાં એથેનોલ ભેળવવાનો વિરોધ કરવા ઉતર્યું નવું સંગઠન

NEET પેપર લીક સામે 'કોકરોચ જનતા પાર્ટી' (CJP) ના અસરકારક વિરોધ પ્રદર્શન બાદ હવે દેશમાં એક નવા સંગઠનની એન્ટ્રી થઈ છે. આ નવા સંગઠનનું નામ 'E20 જનતા પાર્ટી' છે.

જેમ CJP ના વિરોધ પ્રદર્શને શિક્ષણ મંત્રી ધર્મેન્દ્ર પ્રધાનના રાજીનામા સુધીની સફર નક્કી કરી હતી, તેવી જ રીતે આ નવા સંગઠને પેટ્રોલમાં એથેનોલ ભેળવવાની નીતિ (E20) સામે મોરચો માંડ્યો છે.

નિતિન ગડકરીના રાજીનામાની માંગ

'E20 જનતા પાર્ટી'એ માંગ કરી છે કે સરકાર પેટ્રોલ પંપો પર ૧૦૦% શુદ્ધ પેટ્રોલ (એથેનોલ વગરનું) નો વિકલ્પ પણ ઉપલબ્ધ કરાવે. આ સાથે પાર્ટીએ કેન્દ્રીય માર્ગ પરિવહન અને રાજમાર્ગ મંત્રી નિતિન ગડકરીના રાજીનામાની પણ માંગ કરી છે.

ટેક્સી અને ટ્રાન્સપોર્ટ યુનિયનનું સમર્થન

આ ઝુંબેશને ટ્રાન્સપોર્ટરોનું મોટું સમર્થન મળી રહ્યું છે. 'દિલ્હી ટેક્સી એન્ડ ટૂરિસ્ટ ટ્રાન્સપોર્ટર્સ એન્ડ ટૂર ઓપરેટર્સ એસોસિએશન' દ્વારા E20 પેટ્રોલના વિરોધમાં ૪ ઓગસ્ટે સંસદ માર્ચ કાઢવાની જાહેરાત કરવામાં આવી છે. યુનિયનનો આરોપ છે કે પેટ્રોલમાં એથેનોલ ભેળવવાના કારણે વાહનોની માઈલેજ ઘટી ગઈ છે, વાહનોના મેન્ટેનન્સનો ખર્ચ વધી ગયો છે અને ખાસ કરીને જૂના વાહનોના એન્જિનના પરફોર્મન્સ પર ખરાબ અસર પડી રહી છે.

શું છે E20 જનતા પાર્ટીની મુખ્ય માંગણીઓ?

સોશિયલ મીડિયા પ્લેટફોર્મ 'X' પર માત્ર થોડા જ કલાકોમાં ૨૫,૦૦૦ થી વધુ ફોલોઅર્સ મેળવનાર આ પાર્ટીએ સ્પષ્ટ કર્યું છે કે તેઓ કોઈ પણ પ્રકારની સબસિડી, મફત બળતણ કે એથેનોલ-બ્લેન્ડેડ પેટ્રોલને સંપૂર્ણપણે બંધ કરવાની માંગ નથી કરી રહ્યા.

આ નવા સંગઠને ગ્રાહકની સ્વતંત્રતા પર ભાર મૂક્યો છે. સંગઠનના જણાવ્યા અનુસાર:

• પસંદગીનો વિકલ્પ: ઉપભોક્તાઓને પોતાની પસંદગીનું બળતણ (શુદ્ધ પેટ્રોલ અથવા E20) ખરીદવાનો વિકલ્પ મળવો જોઈએ.

• પારદર્શક લેબલિંગ: પેટ્રોલ પંપો પર સ્પષ્ટપણે લખેલું હોવું જોઈએ કે ગ્રાહક કયું ઈંધણ ખરીદી રહ્યો છે.

• ડેટા જાહેર કરવાની માંગ: સરકાર ઈંધણના મિશ્રણથી થતા ખર્ચ, ફાયદા અને તેની અસર સાથે જોડાયેલો ડેટા જાહેર કરે.

• સ્વતંત્ર તપાસ: વાહનોના માઈલેજ, એન્જિન પરફોર્મન્સ, પ્રદૂષણ અને મેન્ટેનન્સ ખર્ચ પર પડતી અસરની સ્વતંત્ર તપાસ કરાવવામાં આવે.

હાલ બજારમાં શું છે પરિસ્થિતિ?

નોંધનીય છે કે દેશમાં એથેનોલ વગરનું ૧૦૦-ઓક્ટેન પ્રીમિયમ પેટ્રોલ પહેલાથી જ ઉપલબ્ધ છે, પરંતુ તે પસંદગીના પેટ્રોલ પંપો પર જ મળે છે અને તેની કિંમત આશરે ₹૧૬૯ પ્રતિ લિટર છે, જ્યારે સામાન્ય E20 પેટ્રોલની કિંમત ₹૧૦૨.૧૨ પ્રતિ લિટર છે.

બીજી તરફ, પેટ્રોલીયમ રાજ્ય મંત્રી સુરેશ ગોપીએ સંસદમાં જણાવ્યું હતું કે સરકારને એથેનોલ-યુક્ત પેટ્રોલી વાહનોના પરફોર્મન્સ પર પડતી અસર અંગે કોઈ વ્યાપક કે પુખ્તા ફરિયાદો મળી નથી.