નીટ યુજી પેપર લીક કેસ: ફાસ્ટ ટ્રેક કોર્ટમાં આજે થશે સુનાવણી, CBIએ 13 આરોપીઓ સામે ચાર્જશીટ દાખલ કરી

નીટ-યુજી (NEET-UG) પેપર લીક મામલે સીબીઆઈએ (CBI) મંગળવારે વિશેષ ફાસ્ટ ટ્રેક કોર્ટમાં ૧૩ આરોપીઓ સામે આક્ષેપપત્ર (ચાર્જશીટ) દાખલ કર્યું છે. આ કેસની સુનાવણી માટે રચવામાં આવેલી વિશેષ ફાસ્ટ ટ્રેક કોર્ટ બુધવારે તેના પર સંજ્ઞાન લેવાની શક્યતા છે.

CBIએ આ મામલે આગળની તપાસ ચાલુ રાખી છે અને એનટીએ (NTA) ના અધિકારીઓની ભૂમિકા અંગે પણ તપાસ હાથ ધરી છે. સીબીઆઈની આર્થિક અપરાધ શાખાએ ભારતીય ન્યાય સંહિતા (BNS), ભ્રષ્ટાચાર નાબૂદી અધિનિયમ અને સાર્વજનિક પરીક્ષા (અનૈતિક સાધનોની રોકથામ) અધિનિયમ, ૨૦૨૪ની વિવિધ કલમો હેઠળ ચાર્જશીટ દાખલ કરી છે.

ચાર્જશીટમાં યશ યાદવ, માંગીલાલ બીવાલ, દિનેશ બીવાલ, વિકાસ બીવાલ, શુભમ ખેરનાર, ધનંજય લોખંડે, પ્રહલાદ કુલકર્ણી, તેજસ હર્ષદ કુમાર, ડો. મનોજ શિરૂરે, શિવરાજ રઘુનાથ મોટેગાવંકર, મનીષા વાઘમારે, મનીષા મંડહરે અને મનીષા સંજય હવાલેદારને આરોપી બનાવવામાં આવ્યા છે. હાલમાં તમામ આરોપીઓ ન્યાયિક હિરાસતમાં છે.

CBIના જણાવ્યા અનુસાર, માંગીલાલ બીવાલે તેના પુત્ર વિકાસ માટે નીટનું પ્રશ્નપત્ર મેળવવાના હેતુથી શુભમ ખેરનારનો સંપર્ક કર્યો હતો. તપાસ દરમિયાન માંગીલાલના મોબાઈલ ફોનમાંથી લીક થયેલું પ્રશ્નપત્ર પણ મળી આવ્યું છે.

એજન્સીનો દાવો છે કે માંગીલાલે યશ યાદવ પાસેથી ૧૦ લાખ રૂપિયામાં આ પ્રશ્નપત્ર મેળવ્યું હતું. પૂછપરછ દરમિયાન વિકાસે જણાવ્યું હતું કે તેની મુલાકાત યશ સાથે રાજસ્થાનના સીકરમાં કોચિંગ દરમિયાન થઈ હતી. આ મામલે ૧૨ મેના રોજ એક સરકારી અધિકારીની ફરિયાદના આધારે FIR નોંધવામાં આવી હતી.