National: 'સંભલ મસ્જિદ વિવાદમાં હાઈકોર્ટ ન કરી શકે સુનાવણી', સુપ્રીમ કોર્ટની સખત ટિપ્પણી

સંભલની શાહી જામા મસ્જિદ અને હરિહર મંદિર વિવાદમાં નીચલી અદાલત દ્વારા સર્વેના આદેશ સાથે જોડાયેલા મામલે સુપ્રીમ કોર્ટને મંગળવારે જણાવવામાં આવ્યું હતું કે, ૧૨ ડિસેમ્બર ૨૦૨૪ના સર્વોચ્ચ અદાલતના આદેશને ધ્યાનમાં રાખીને અલ્હાબાદ હાઈકોર્ટ આગળ કાર્યવાહી કરી શકે નહીં.

આ મહત્વપૂર્ણ આદેશમાં સુપ્રીમ કોર્ટે આગામી આદેશ સુધી દેશની તમામ અદાલતોને ધાર્મિક સ્થળો, ખાસ કરીને મસ્જિદો અને દરગાહો પાછી મેળવવાની માંગ કરતી નવી અરજીઓ પર વિચાર કરવા તથા પેન્ડિંગ કેસોમાં કોઈ સક્રિય અંતરિમ કે અંતિમ આદેશ આપવા પર રોક લગાવી હતી.

સુપ્રીમ કોર્ટે 'પ્લેસિસ ઓફ વર્શિપ (સ્પેશિયલ પ્રોવિઝન્સ) એક્ટ, ૧૯૯૧'ની વિવિધ જોગવાઈઓને પડકારતી અરજીઓ પર સુનાવણી કરતી વખતે ૨૦૨૪નો આ આદેશ આપ્યો હતો.

૧૯૯૧નો આ કાયદો કોઈપણ પૂજાસ્થળના ધાર્મિક સ્વરૂપમાં ફેરફાર કરવા પર રોક લગાવે છે અને જણાવે છે કે ૧૫ ઓગસ્ટ ૧૯૪૭ના રોજ જે પૂજાસ્થળ જે સ્થિતિમાં હતું તેવું જ રહેશે. જોકે, અયોધ્યા વિવાદને આ કાયદાના દાયરામાંથી બહાર રાખવામાં આવ્યો હતો.

જસ્ટિસ પીએસ નરસિંહા અને જસ્ટિસ આલોક અરાધેની બેન્ચે મંગળવારે સંભલની જામા મસ્જિદની પ્રબંધન સમિતિ દ્વારા અલ્હાબાદ હાઈકોર્ટના ૧૯ મે ૨૦૨૫ના આદેશને પડકારતી બે અલગ-અલગ અરજીઓ પર સુનાવણી કરી હતી.

અગાઉ હાઈકોર્ટે શાહી જામા મસ્જિદ અને હરિહર મંદિર વિવાદમાં સંભલ કોર્ટના સર્વેના આદેશ સામે મસ્જિદ કમિટીની અરજી ફગાવી દીધી હતી અને સિવિલ કોર્ટના સર્વેના નિર્દેશને યોગ્ય ઠેરવ્યો હતો.

સર્વોચ્ચ અદાલતમાં મસ્જિદ કમિટી વતી વરિષ્ઠ એડવોકેટ હુઝેફા અહમદીએ રજૂઆત કરી હતી કે, ડિસેમ્બર ૨૦૨૪ના સુપ્રીમ કોર્ટના આદેશને જોતાં હાઈકોર્ટ આ કેસમાં આગળ વધી શકે નહીં. હાઈકોર્ટને આ આદેશ વિશે વિગતવાર જાણ કરવામાં આવી હતી.

૧૯૯૧ના કાયદાનો મુખ્ય હેતુ જ એ હતો કે વિવાદને વધતો અટકાવવામાં આવે અને શરૂઆતમાં જ તેનો અંત લાવવામાં આવે. આ મામલે આગામી દલીલો ૪ ઓગસ્ટે પણ ચાલુ રહેશે.

ઉલ્લેખનીય છે કે સંભલ કોર્ટમાં દાખલ કરવામાં આવેલી અરજીમાં દાવો કરવામાં આવ્યો છે કે આ મસ્જિદ ૧૫૨૬માં મુઘલ બાદશાહ બાબરે હરિહર મંદિર તોડીને બનાવી હતી.