National: 'પેલેટ ગન વાપરવાની મંજૂરી કોણે આપી?': રાહુલ ગાંધીએ અમિત શાહને પત્ર લખીને પૂછ્યા આકરા સવાલો

લોકસભામાં વિરોધ પક્ષના નેતા રાહુલ ગાંધીએ કેન્દ્રીય ગૃહમંત્રી અમિત શાહને પત્ર લખીને નવી દિલ્હીના જંતર-મંતર પર વિરોધ પ્રદર્શન કરી રહેલા વિદ્યાર્થીઓ પર થયેલા હુમલા અંગે જવાબદારી નક્કી કરવાની માંગ કરી છે. વિદ્યાર્થીઓ પર પેલેટ ગન (Pellet Guns) ના ઉપયોગ અંગે સવાલ ઉઠાવતા કોંગ્રેસ નેતાએ દાવો કર્યો છે કે, આ હુમલામાં 19 વર્ષનો એક વિદ્યાર્થી ગંભીર રીતે ઘાયલ થયો છે અને તેની આંખની રોશની જવાનું જોખમ ઉભું થયું છે.

રાહુલ ગાંધીએ પત્રમાં શું પૂછ્યું?

ગૃહમંત્રીને લખેલા પત્રમાં રાહુલ ગાંધીએ મુખ્યત્વે બે સવાલો પૂછ્યા છે:

1. શું ગૃહમંત્રી તરીકે તમે વિદ્યાર્થીઓ સામે પેલેટ ગન જેવા ઘાતક બળપ્રયોગની મંજૂરી આપી હતી? જો તમે નથી આપી, તો પછી આ મંજૂરી કોણે આપી?

2. સાદા કપડામાં જે લોકો વિદ્યાર્થીઓ પર લાઠીચાર્જ કરતા જોવા મળી રહ્યા છે, તેઓ પોલીસકર્મીઓ છે કે સ્વયંસેવકો? તેમની તૈનાતીની પરવાનગી કોણે આપી?

'પ્રદર્શનકારીઓની સુરક્ષા સરકારની જવાબદારી'

રાહુલ ગાંધીએ ભારપૂર્વક જણાવ્યું હતું કે, કોઈપણ લોકશાહીમાં શાંતિપૂર્ણ વિરોધ-પ્રદર્શન એ નાગરિકોનો અધિકાર છે. પ્રદર્શનકારીઓની સુરક્ષા કરવી અને વાટાઘાટો દ્વારા તેમની સમસ્યાઓનો ઉકેલ લાવવો એ સરકારની પ્રાથમિક જવાબદારી છે. દેશનું ભવિષ્ય એવા યુવાનો પર આ પ્રકારની બર્બર હિંસા સાંખી લેવાય નહીં.

તેમણે સોશિયલ મીડિયા પર વિરોધ પ્રદર્શન કરી રહેલા સાહિલ નામના વિદ્યાર્થીનો વિડીયો પણ શેર કર્યો હતો, જે હાથમાં તિરંગો લઈને પેપર લીક સામે ન્યાયની માંગ કરી રહ્યો હતો. રાહુલ ગાંધીએ આ ઘટનાને આઝાદ ભારતમાં નિર્દોષ વિદ્યાર્થીઓ પર થયેલી અત્યાચારી કાર્યવાહી ગણાવી હતી.

હિંસામાં પોલીસકર્મીઓ પણ ઘાયલ

નોંધનીય છે કે, પેપર લીક મામલે ચાલી રહેલા આ આંદોલન અને ઘર્ષણમાં ૧૧૮થી વધુ પોલીસકર્મીઓ પણ ઘાયલ થયા છે, જેમાં અનેક ઉચ્ચ અધિકારીઓ અને મહિલા પોલીસકર્મીઓ સામેલ છે. જ્યારે સામે પક્ષે આશરે ૬૦ જેટલા વિદ્યાર્થીઓ પણ ઘાયલ થયા હોવાના અહેવાલ છે.