National: PLI સ્કીમ હેઠળ ₹2.40 લાખ કરોડથી વધુનું રોકાણ; તેલ કંપનીઓએ કર્યો રેકોર્ડ ઇથેનોલનો ઉપાડ

કેન્દ્ર સરકારે સંસદમાં દેશના આર્થિક અને ઔદ્યોગિક વિકાસ સાથે જોડાયેલા મહત્વપૂર્ણ આંકડા રજૂ કર્યા છે. વાણિજ્ય અને ઉદ્યોગ રાજ્યમંત્રી જિતિન પ્રસાદે જણાવ્યું હતું કે સરકારની પ્રોડક્શન લિંક્ડ ઇન્સેન્ટિવ (PLI) સ્કીમ હેઠળ ૩૧ માર્ચ, ૨૦૨૬ સુધીમાં ૧૪ મુખ્ય ક્ષેત્રોમાં ₹૨.૪૦ લાખ કરોડથી વધુનું રોકાણ આવ્યું છે, જેનાથી ૧૪.૧૫ લાખથી વધુ પ્રત્યક્ષ અને અપ્રત્યક્ષ રોજગારીનું સર્જન થયું છે.

તેમણે ઉમેર્યું કે PLI પ્રોગ્રામના કારણે છેલ્લા ત્રણ વર્ષમાં નિકાસમાં પણ મોટો ઉછાળો આવ્યો છે. નાણાકીય વર્ષ ૨૦૨૩-૨૪માં ₹૪ લાખ કરોડથી વધીને ૨૦૨૪-૨૫માં ₹૬.૫ લાખ કરોડ અને નાણાકીય વર્ષ ૨૦૨૫-૨૬માં નિકાસ વધીને ₹૧૫.૨ લાખ કરોડ થઈ છે.

૧૪ સેક્ટર્સમાં રોકાણનું ગણિત

PLI યોજના હેઠળના ૧૪ સેક્ટર્સમાંથી સૌથી વધુ રોકાણ સોલર ફોટોવોલ્ટેઇક (PV) મોડ્યુલ્સ ક્ષેત્રે પ્રાપ્ત થયું છે.

તે જ રીતે, કાપડ ઉદ્યોગ માટેની PLI સ્કીમ હેઠળ મંજૂર થયેલી ૧૭૦ કંપનીઓએ ૩૧ માર્ચ, ૨૦૨૬ સુધીમાં ₹૮,૧૧૭.૬૪ કરોડનું રોકાણ કર્યું છે અને ૩૩,૪૨૭ નવી રોજગારીઓ ઊભી કરી છે.

તેલ કંપનીઓએ રેકોર્ડ ₹૭૩,૯૯૬ કરોડનું ઇથેનોલ ખરીદ્યું

પેટ્રોલિયમ અને નેચરલ ગેસ રાજ્યમંત્રી સુરેશ ગોપીએ રાજ્યસભામાં માહિતી આપી હતી કે જાહેર ક્ષેત્રની ઓઇલ માર્કેટિંગ કંપનીઓએ ઇથેનોલ સપ્લાય યર ૨૦૨૩-૨૪માં ₹૪૮,૭૫૭ કરોડ, ૨૦૨૪-૨૫માં ₹૭૩,૯૯૬ કરોડ અને ૨૦૨૫-૨૬માં જૂન સુધીમાં ₹૪૯,૫૭૭ કરોડનું ઇથેનોલ ખરીદ્યું છે.

• ગુજરાત ૫મા ક્રમે: ૨૦૨૪-૨૫ દરમિયાન ઇથેનોલ મિશ્રિત પેટ્રોલના વેચાણમાં ઉત્તર પ્રદેશ (૧૨૪.૯૮ કરોડ લીટર) પ્રથમ ક્રમે રહ્યું છે. ત્યારબાદ મહારાષ્ટ્ર, તમિળનાડુ, કર્ણાટક અને ગુજરાત (૫૬.૨૯ કરોડ લીટર) સાથે પાંચમા ક્રમે છે.

FPI દ્વારા શેરબજારમાંથી ₹૪.૫૮ લાખ કરોડ પાછા ખેંચાયા

ઓક્ટોબર ૨૦૨૪થી એપ્રિલ ૨૦૨૬ વચ્ચે વિદેશી પોર્ટફોલિયો રોકાણકારો (FPIs) એ ભારતીય શેરબજારમાંથી ₹૪.૫૮ લાખ કરોડ પાછા ખેંચ્યા છે. વૈશ્વિક આર્થિક અસ્થિરતા, જીઓપોલિટિકલ તણાવ અને કરન્સીના ઉતાર-ચઢાવને કારણે આ નાણાં પાછા ખેંચાયા હતા. જોકે, આ જ સમયગાળા દરમિયાન ડેટ સેગમેન્ટમાં (Debt Segment) ₹૭૨,૭૦૧ કરોડનું રોકાણ આવ્યું હતું.

મ્યુચ્યુઅલ ફંડ ઇન્ડસ્ટ્રીની એસેટ્સ અંડર મેનેજમેન્ટ (AUM) જૂન ૨૦૨૧માં ₹૩૩.૬૭ લાખ કરોડ હતી, જે વધીને જૂન ૨૦૨૬માં ₹૮૨.૨૨ લાખ કરોડને પાર પહોંચી ગઈ છે.

દેશમાં ૫૨,૭૧૮ પબ્લિક EV ચાર્જિંગ સ્ટેશન કાર્યરત

ભારે ઉદ્યોગ રાજ્યમંત્રી ભૂપતિરાજૂ શ્રીનિવાસ વર્માએ લોકસભામાં જણાવ્યું હતું કે દેશમાં હાલ ૫૨,૭૧૮ જાહેર ઈલેક્ટ્રિક વ્હીકલ (EV) ચાર્જિંગ સ્ટેશન છે, જેમાં કાર માટેના ૧૬,૫૬૧ ફાસ્ટ ચાર્જર્સનો સમાવેશ થાય છે.

FAME India યોજનાના બીજા તબક્કા હેઠળ લગભગ ૧૬.૭૨ લાખ ઇલેક્ટ્રિક વાહનોના વેચાણમાં મદદ મળી છે અને ૩૦ જૂન, ૨૦૨૬ સુધીમાં ૫,૧૯૭ ઇલેક્ટ્રિક બસો રસ્તાઓ પર ઉતારવામાં સફળતા મળી છે.