National: 'મેં બેંગલુરુ મોકલ્યા 25 બાંગ્લાદેશી, ટાર્ગેટ પર નેતાઓ', દુબઈમાં રહેતા યુવકે વિડીયો જાહેર કરી પોલીસને આપી ધમકી

દુબઈમાં હોટેલ મજૂર તરીકે કામ કરી રહેલા એક યુવકે સોશિયલ મીડિયા પર ઉશ્કેરણીજનક વિડીયો પોસ્ટ કરીને કર્ણાટક પોલીસ, ખાસ કરીને બેંગલુરુ પોલીસને સીધો પડકાર ફેંક્યો છે. વિડીયોમાં તેણે દાવો કર્યો છે કે તેણે બેંગલુરુમાં ૨૫ બાંગ્લાદેશી ઘૂસણખોરોને મોકલ્યા છે અને પોલીસ તેમને પકડી શકશે નહીં.

આરોપીની ઓળખ માંડ્યા જિલ્લાના કૃષ્ણરાજપેટ તાલુકાના કિક્કેરી ગામના સંતોષ કુમાર તરીકે થઈ છે. ગુરુવારે સવારે તેણે પોતાના ઈન્સ્ટાગ્રામ અકાઉન્ટ પર વિડીયો અપલોડ કર્યો હતો, જેમાં તેણે કહ્યું હતું કે, "કર્ણાટક પોલીસ, જો તમારામાં તાકાત હોય તો તેમને શોધી બતાવો. મેં બેંગલુરુમાં ૨૫ બાંગ્લાદેશીઓને મોકલ્યા છે. તમે તેમને પકડી શકશો નહીં. આટલા દિવસોથી કોઈ તેમને ટ્રેસ કરી શક્યું નથી."

તેણે વિડીયોમાં વધુમાં કહ્યું હતું કે, "મેં માત્ર પોલીસ અને નેતાઓને ટાર્ગેટ કર્યા છે. તેમની પાસે કોઈ આઈડી કાર્ડ કે સરનામું નથી અને મેં તેમના માટે તમામ વ્યવસ્થા કરી આપી છે. જો તમે તેમને શોધી લેશો તો હું મારું સરનામું આપી દઈશ, તમારે જે કરવું હોય તે કરજો."

પોલીસે તાત્કાલિક નોંધ્યો ગુનો

આ વિડીયો તેની ઉશ્કેરણીજનક ભાષા અને પોલીસને આપેલી સીધી ધમકીને કારણે સોશિયલ મીડિયા પર ઝડપથી વાયરલ થઈ ગયો હતો. સેન્ટ્રલ ક્રાઈમ બ્રાન્ચ (CCB) ની સાયબર ક્રાઈમ પોલીસે તાત્કાલિક કાર્યવાહી કરીને ગુરુવારે જ ગુનો નોંધ્યો હતો અને સાંજ સુધીમાં આરોપીની ઓળખ કરી લીધી હતી. પોલીસનો સંપર્ક થતાં જ સંતોષે મૂળ વિડીયો ડિલીટ કરી દીધો હતો અને બાદમાં માફી માંગતો નવો વિડીયો અપલોડ કર્યો હતો.

યુવકે બાદમાં માંગી માફી

માફી માગતા વિડીયોમાં તેણે કહ્યું કે, "મેં સવારે બાંગ્લાદેશીઓ વિશે વિડીયો મૂક્યો હતો અને પોલીસ વિશે ખોટી વાતો કહી હતી. હું માફી માંગુ છું, આ વખતે મને માફ કરી દો. હવે પછી આવું નહીં થાય. બેંગલુરુમાં ઘણા બાંગ્લાદેશીઓ આવી રહ્યા છે અને તેમની સામે કોઈ કાર્યવાહી થઈ રહી નથી તેથી હું ગુસ્સામાં હતો."

બેંગલુરુ પોલીસ કમિશનર સીમંત કુમાર સિંહે જણાવ્યું કે સાયબર સેલે કેસ નોંધ્યો છે. આરોપી હાલ વિદેશમાં કામ કરી રહ્યો છે અને તેને ભારત પરત લાવીને ધરપકડ કરવાના પ્રયાસો ચાલી રહ્યા છે.