National: ભારતીય ડાકે રચ્યો ઇતિહાસ: ઇન્ડિયા પોસ્ટની કમાણી પ્રથમ વખત ₹૪,૦૦૦ કરોડને પાર, જ્યોતિરાદિત્ય સિંધિયાએ આપી માહિતી

ભારતીય ટપાલ વિભાગે (ઇન્ડિયા પોસ્ટ) બિઝનેસ ક્ષેત્રે એક નવો રેકોર્ડ બનાવ્યો છે. ચાલુ નાણાકીય વર્ષ ૨૦૨૬-૨૭ ના પ્રથમ ત્રિમાસિક ગાળામાં (એપ્રિલ-જૂન) વિભાગની કુલ આવક પ્રથમ વખત ₹૪,૦૦૦ કરોડના આંકડાને પાર કરી ગઈ છે. કેન્દ્રીય સંચાર મંત્રી જ્યોતિરાદિત્ય સિંધિયાએ મંગળવારે એક સમીક્ષા બેઠક બાદ મીડિયાને આ ઐતિહાસિક સિદ્ધિની માહિતી આપી હતી.

બિઝનેસમાં ૨૨.૨ ટકાનો મોટો ઉછાળો

કેન્દ્રીય મંત્રી જ્યોતિરાદિત્ય સિંધિયાએ જણાવ્યું કે, નાણાકીય વર્ષ 2025-26ના પ્રથમ ક્વાર્ટરની સરખામણીએ ચાલુ વર્ષના સમાન ગાળામાં ટપાલ વિભાગના કુલ ટર્નઓવરમાં ૨૨.૨ ટકાનો નોંધપાત્ર વધારો થયો છે. ગયા નાણાકીય વર્ષના પ્રથમ ત્રિમાસિક ગાળામાં વિભાગની આવક ₹૩,૨૮૦ કરોડ હતી, જે આ વર્ષે વધીને ₹૪,૦૦૮ કરોડ પર પહોંચી ગઈ છે. ભારતીય ડાકના ઇતિહાસમાં આ પ્રથમ ઘટના છે જ્યારે કોઈ એક ક્વાર્ટરમાં જ કમાણી ₹૪,૦૦૦ કરોડથી વધુ નોંધાઈ હોય.

વર્ષ દર વર્ષે વધી રહી છે આવક

આધુનિક ટેક્નોલોજી અને ડિજિટલ યુગમાં પણ ભારતીય ડાકની સેવાઓનો ક્રેઝ અને વિશ્વસનીયતા સતત વધી રહી છે. છેલ્લા કેટલાક વર્ષોના આંકડા તેના વિકાસની સાક્ષી પૂરે છે:

• નાણાકીય વર્ષ ૨૦૨૪-૨૫: કુલ વાર્ષિક આવક ₹૧૩,૨૧૮ કરોડ રહી હતી.

• નાણાકીય વર્ષ ૨૦૨-૨૬: આવક વધીને ₹૧૫,૫૦૦ કરોડ પર પહોંચી હતી.

• નાણાકીય વર્ષ ૨૦૨૬-૨૭ (માત્ર Q1): પ્રથમ ત્રણ મહિનામાં જ રેકોર્ડબ્રેક ₹૪,૦૦૮ કરોડની કમાણી થઈ ચૂકી છે.

પોસ્ટ ઓફિસ દ્વારા શરૂ કરવામાં આવેલી નવી બેન્કિંગ સેવાઓ, ડિજિટલ ટ્રાન્ઝેક્શન અને લોજિસ્ટિક્સ સપોર્ટના કારણે આ શાનદાર વૃદ્ધિ જોવા મળી રહી છે.