National: હવે એક જ ફરિયાદ પર થશે એક્શન... FSSAI એ લોન્ચ કરી Food Safety Connect App, ખરાબ ભોજનની આ રીતે કરો ફરિયાદ

ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઈન્ડિયા (FSSAI) એ ભેળસેળયુક્ત અને ખરાબ ખોરાક સામે કડક કાર્યવાહી કરવા માટે 'Food Safety Connect' એપ લોન્ચ કરી છે. આ એપ દ્વારા સામાન્ય નાગરિકો હવે અસ્વચ્છ અને ભેળસેળવાળા ભોજનની ફરિયાદ સીધી ફૂડ સેફ્ટી વિભાગ સુધી પહોંચાડી શકશે.

આ એપ પર ગ્રાહકો રેસ્ટોરન્ટ, હોટેલ અને સ્ટ્રીટ ફૂડની ખરાબ ગુણવત્તા અથવા ભેળસેળયુક્ત ખોરાકની માહિતી ફોટો સાથે અપલોડ કરી શકે છે.

જાણો શું છે Food Safety Connect એપ?

FSSAI ના જણાવ્યા અનુસાર, દેશના દરેક નાગરિકને કોઈ પણ પ્રકારની ભેળસેળ વગરનો સ્વચ્છ અને તાજો ખોરાક મળે તે હેતુથી આ એપ લોન્ચ કરવામાં આવી છે. ગ્રાહકો હોટેલ, રેસ્ટોરન્ટ, ઢાબા કે સ્ટ્રીટ ફૂડના સ્ટોલ પર ગંદકી દેખાય અથવા ખરાબ ખાવાનું મળે તો સીધી ફરિયાદ નોંધાવી શકે છે.

કેવા પ્રકારની ફરિયાદો થઈ શકશે?

આ એપ દ્વારા ગ્રાહકો અનેક પ્રકારની ફરિયાદો સરળતાથી કરી શકે છે:

• જો ખોરાકમાં ભેળસેળની શંકા હોય અથવા ખાવાનું ખાવાલાયક ન હોય.

• જો કોઈ રેસ્ટોરન્ટના કિચનમાં ગંદકી હોય, ત્યાં માખીઓ, વંદા કે ઉંદરો દેખાય, તો તેનો ફોટો એપ પર અપલોડ કરી શકાય છે.

• જો હોટેલ-રેસ્ટોરન્ટમાં હાઈજીન (સ્વચ્છતા)નું ધ્યાન રાખવામાં ન આવતું હોય.

• ફરિયાદની સાથે લોકો ઘટનાસ્થળના ફોટા અને અન્ય વિગતો પણ જોડી શકે છે.

કેવી રીતે કરશો ફરિયાદ?

૧. સૌથી પહેલા તમારા મોબાઈલમાં Food Safety Connect એપ ડાઉનલોડ કરીને ઈન્સ્ટોલ કરો. ૨. એપ ઓપન કરો અને જ્યાં પણ ગંદકી કે ખરાબ ખોરાક દેખાય, ત્યાં એપ દ્વારા તેનો ફોટો લો. ૩. ત્યારબાદ તે જગ્યાનું નામ અને સરનામું દાખલ કરો. ૪. હવે તમારી ફરિયાદનો પ્રકાર (Type) પસંદ કરીને સબમિટ કરો.

નોંધ: ફરિયાદ સબમિટ થતાં જ તે સીધી સંબંધિત વિસ્તારના ફૂડ સેફ્ટી ઓફિસરના ડિજિટલ ડેશબોર્ડ પર પહોંચી જશે અને તેના પર ત્વરિત એક્શન લેવામાં આવશે.