National: ફોર્ચ્યુન સનફ્લાવર ઓઈલનું સેમ્પલ લેબ ટેસ્ટમાં ફેલ, નબળી ગુણવત્તાનું તેલ વેચવા બદલ FSSAI એ લગાવ્યો દંડ

ફૂડ સેફ્ટી એન્ડ સ્ટેન્ડર્ડ્સ ઓથોરિટી ઓફ ઈન્ડિયા (FSSAI) દ્વારા નબળી ગુણવત્તાનું ફોર્ટિફાઈડ સનફ્લાવર કૂકિંગ ઓઈલ બનાવવા અને વેચવા બદલ ખાદ્ય તેલ કંપની AWL એગ્રી બિઝનેસ લિમિટેડ પર દંડ ફટકારવામાં આવ્યો છે. જોકે, દંડની રકમ અંગે અત્યારે વિગતો જાહેર કરવામાં આવી નથી. અમદાવાદની આ કંપની 'ફોર્ચ્યુન' (Fortune) બ્રાન્ડ હેઠળ ખાદ્ય તેલનું વેચાણ કરે છે.

રેગ્યુલેટર દ્વારા ગોવા સ્થિત એક રિસોર્ટમાંથી લેવામાં આવેલું તેલનું સેમ્પલ લેબ ટેસ્ટિંગમાં ફેલ થયા બાદ આ કાર્યવાહી કરવામાં આવી છે. તપાસમાં સામે આવ્યું હતું કે તેલમાં વિટામિન ડી નું પ્રમાણ નક્કી કરેલી મર્યાદા કરતાં ઘણું ઓછું હતું.

ગોવાના રિસોર્ટમાંથી લેવાયું હતું સેમ્પલ

FSSAI એ સોશિયલ મીડિયા પોસ્ટ દ્વારા માહિતી આપતા જણાવ્યું કે, AWL એગ્રી બિઝનેસ લિમિટેડ સામે દંડ ફટકારવાનો આદેશ જારી કરવામાં આવ્યો છે. 'ફોર્ચ્યુન' ફ્રાયોલા રિફાઈન્ડ સનફ્લાવર ઓઈલ (૧ લિટર) નું સેમ્પલ ગોવાના 'તાજ ફોર્ટ અગુઆડા રિસોર્ટ એન્ડ સ્પા' માંથી એકત્ર કરવામાં આવ્યું હતું.

પ્રારંભિક લેબોરેટરી રિપોર્ટમાં સામે આવ્યું કે આ તેલ FSS (ફોર્ટિફિકેશન ઓફ ફૂડ્સ) નિયમો, ૨૦૧૮ હેઠળ નક્કી કરાયેલા ધોરણો પર ખરું ઉતર્યું નથી. આ તેલમાં વિટામિન એ અને વિટામિન ડી ના સ્તર નિશ્ચિત મર્યાદાથી નીચે મળ્યા હતા. કંપનીની અપીલ બાદ રેફરલ લેબમાં ફરી તપાસ કરાતાં પણ વિટામિન ડી નું સ્તર ઓછું હોવાની પુષ્ટિ થઈ હતી.

'પાઈ ફૂડ્સ' ના બે ઉત્પાદનોના વેચાણ પર રોક

આ ઉપરાંત, FSSAI એ પાઈ ફૂડ્સ (Pai Foods) ને તેના બે ઉત્પાદનો 'મોંક ફ્રૂટ એક્સ્ટ્રેક્ટ સ્વીટનર' અને 'મોંક ફ્રૂટ સ્વીટનર ડ્રોપ્સ' નું વેચાણ તાત્કાલિક અસરથી બંધ કરવાનો આદેશ આપ્યો છે. લેબલિંગ પ્રોટોકોલના ઉલ્લંઘન બદલ કંપની સામે આ પ્રતિબંધાત્મક આદેશ જારી કરવામાં આવ્યો છે. FSSAI એ કંપનીને યોગ્ય મંજૂરીઓ અને વૈધ લાયસન્સ મેળવ્યા બાદ જ વેચાણ શરૂ કરવા નિર્દેશ આપ્યો છે.