National: ફાસ્ટ ટ્રેક કોર્ટની રફતાર ધીમી પડી: 2025માં 775 અદાલતોએ 66,500 કેસ ઉકેલ્યા, 2.45 લાખ કેસ હજુ પેન્ડિંગ

કેન્દ્ર સરકારે શુક્રવારે લોકસભામાં માહિતી આપતાં જણાવ્યું હતું કે દેશના ૨૯ રાજ્યો અને કેન્દ્રશાસિત પ્રદેશોમાં કાર્યરત ૭૭૫ ફાસ્ટ ટ્રેક સ્પેશિયલ કોર્ટોએ વર્ષ ૨૦૨૫માં ૬૬,૫૦૦ કેસોનો નિકાલ કર્યો છે. જ્યારે ગત વર્ષના અંત સુધીમાં ૨.૪૫ લાખ જેટલા કેસો હજુ પણ પેન્ડિંગ (અનિર્ણિત) રહ્યા હતા.

ઉલ્લેખનીય છે કે, આ ૭૭૫ ફાસ્ટ ટ્રેક અદાલતોમાં બાળકોને જાતીય અપરાધો સામે રક્ષણ આપતા પોક્સો (POCSO) કાયદા સંબંધિત ૩૯૮ સ્પેશિયલ કોર્ટ પણ સામેલ છે.

વિતેલા વર્ષોના આંકડા (૨૦૨૩-૨૪)

કાયદા અને ન્યાય રાજ્ય મંત્રી અર્જુન રામ મેઘવાલે એક પ્રશ્નના લેખિત જવાબમાં જણાવ્યું હતું કે, ફાસ્ટ ટ્રેક સ્પેશિયલ અદાલતોએ વર્ષ ૨૦૨૪માં ૮૫,૫૯૫ કેસો અને વર્ષ ૨૦૨૩માં ૭૬,૩૧૯ કેસોનો નિકાલ કર્યો હતો.

૨૦૧૯માં થઈ હતી શરૂઆત

મંત્રીએ વધુમાં જણાવ્યું હતું કે, બળાત્કાર અને પોક્સો એક્ટ હેઠળના ગંભીર ગુનાઓના ઝડપી ટ્રાયલ અને ઉકેલ માટે ૨૦૧૯માં ફાસ્ટ ટ્રેક સ્પેશિયલ કોર્ટ બનાવવાની યોજના શરૂ કરવામાં આવી હતી. કૂલ ૭૯૦ ફાસ્ટ ટ્રેક કોર્ટ સ્થાપવાની આ યોજનાની સમયસીમા લંબાવીને હવે ૩૦ સપ્ટેમ્બર, ૨૦૨૬ સુધી કરવામાં આવી છે.

ન્યાયિક માળખા માટે કેન્દ્રીય યોજના

મંત્રીએ જિલ્લા અને સબ-ઓર્ડિનેટ (તાબાની) અદાલતો માટે ઈન્ફ્રાસ્ટ્રક્ચર સુવિધાઓ પૂરી પાડતી કેન્દ્ર પુરસ્કૃત યોજના વિશે પણ માહિતી આપી હતી. આ યોજના હેઠળ, વર્ષ ૧૯૯૩-૯૪થી કેન્દ્ર અને રાજ્યો વચ્ચે નક્કી કરેલા ફંડ-શેરિંગ રેશિયોના આધારે રાજ્ય અને કેન્દ્રશાસિત પ્રદેશોની સરકારોને નાણાકીય સહાય આપવામાં આવે છે.