National: હવે માત્ર 'UMANG' એપથી જ એક્ટિવેટ થશે EPFO નું UAN, જાણી લો આખી પ્રોસેસ

કર્મચારી ભવિષ્ય નિધિ સંગઠન (EPFO) દ્વારા ડેટાબેઝ કોન્સોલિડેશન અને સોફ્ટવેર અપગ્રેડેશન બાદ પોતાના યુનિફાઇડ પોર્ટલને ફરીથી શરૂ કરવામાં આવ્યું છે. આ નવા અપગ્રેડેડ પોર્ટલમાં કેટલાક મહત્વના ફેરફારો કરવામાં આવ્યા છે, જેની સીધી અસર ઇપીએફઓ (EPFO) ના કરોડો સભ્યો પર પડશે.

આ વખતે કરવામાં આવેલો સૌથી મોટો ફેરફાર એ છે કે, હવેથી યુનિવર્સલ એકાઉન્ટ નંબર (UAN) આ પોર્ટલ પરથી એક્ટિવેટ થઈ શકશે નહીં અને નવો UAN પણ અહીંથી જનરેટ થઈ શકશે નહીં.

હવે આ રીતે એક્ટિવેટ થશે UAN

EPFO ની સત્તાવાર વેબસાઇટ અનુસાર, હવે UAN ને માત્ર ઉમંગ (UMANG) એપ દ્વારા જ સક્રિય (Activate) કરી શકાશે. આ ઉપરાંત, નવો UAN નંબર મેળવવા માટે પણ ઉમંગ એપનો જ ઉપયોગ કરવો પડશે. UAN એક્ટિવેટ કરવાની સ્ટેપ-બાય-સ્ટેપ પ્રોસેસ નીચે મુજબ છે:

• સૌથી પહેલા ગૂગલ પ્લે સ્ટોર અથવા એપલ એપ સ્ટોર પરથી તમારા મોબાઇલમાં UMANG App ડાઉનલોડ કરો.

• એપ ઓપન કરીને તેમાં આપેલા EPFO Services સેક્શનમાં જાઓ.

• અહીં 'UAN Services Through Face Authentication' હેઠળ આપેલા UAN Activation વિકલ્પ પર ક્લિક કરો.

• ત્યારબાદ ફેસ ઓથેન્ટિકેશન (ચહેરો સ્કેન કરવાની પ્રક્રિયા) ની પ્રક્રિયા પૂર્ણ કરો.

• હવે સ્ક્રીન પર આપેલા નિર્દેશોનું પાલન કરીને વિગતો ભરો. આ પ્રોસેસ પૂરી થતાં જ તમારું UAN એક્ટિવેટ થઈ જશે.

પોર્ટલનો નવો ઇન્ટરફેસ અને સુવિધાઓ

EPFO ના જણાવ્યા અનુસાર, પોર્ટલને અપગ્રેડ કરવાનો મુખ્ય હેતુ ઓનલાઇન સેવાઓને પહેલા કરતાં વધુ ઝડપી, સુરક્ષિત અને ભરોસાપાત્ર બનાવવાનો છે. નવા ઇન્ટરફેસમાં ઘણી મહત્વની સેવાઓને હોમ પેજ પર જ મૂકવામાં આવી છે જેથી યુઝર્સ સીધો તેનો લાભ લઈ શકે. સેવાઓ સરળતાથી ચાલે તે માટે શરૂઆતના બે અઠવાડિયા સુધી ક્લેમ અને અન્ય વિનંતીઓની વધારાની ચકાસણી કરીને તબક્કાવાર પ્રક્રિયા કરવામાં આવશે.

શું છે આ UMANG એપ?

યુનિફાઇડ મોબાઇલ એપ્લિકેશન ફોર ન્યૂ-એજ ગવર્નન્સ (UMANG) એ ભારત સરકારનું એક ઓલ-ઇન-વન ડિજિટલ પ્લેટફોર્મ છે. તેને ઇલેક્ટ્રોનિક્સ અને માહિતી ટેકનોલોજી મંત્રાલય (MeitY) તેમજ નેશનલ ઇ-ગવર્નન્સ ડિવિઝન (NeGD) દ્વારા ડેવલપ કરવામાં આવ્યું છે. આ એપ નાગરિકોને કેન્દ્ર અને રાજ્ય સરકારના વિવિધ વિભાગોની ૧,૭૦૦ થી વધુ સેવાઓ એક જ જગ્યાએ પૂરી પાડે છે અને તે ૨૨ ભાષાઓમાં ઉપલબ્ધ છે.