National: 'પેપર લીક કરવું એ હત્યા કરતાં પણ મોટો અપરાધ', CGPSC કૌભાંડમાં હાઈકોર્ટે પૂર્વ સચિવની જામીન ફગાવી

છત્તીસગઢ લોક સેવા આયોગ (CGPSC) ભરતી કૌભાંડમાં અટકાયત કરાયેલા આયોગના પૂર્વ સચિવ અને નિવૃત્ત IAS અધિકારી જીવન કિશોર ધ્રુવની નિયમિત જામીન અરજી હાઈકોર્ટે ફગાવી દીધી છે.

અદાલતે આ મામલે અત્યંત કડક વલણ અપનાવતા જણાવ્યું હતું કે, સ્પર્ધાત્મક પરીક્ષાઓનું પ્રશ્નપત્ર લીક કરવું એ હત્યા કરતાં પણ મોટો અપરાધ છે, કારણ કે તેનાથી લાખો યુવાનોનું ભવિષ્ય બરબાદ થાય છે. હાઈકોર્ટે ઉમેર્યું કે આ ગુનો માત્ર એક પરિવારને અસર નથી કરતો, પરંતુ સમગ્ર સમાજ અને તંત્ર પર માઠી અસર પાડે છે. આ પ્રકરણમાં કોર્ટે એવી પણ ટિપ્પણી કરી કે જ્યારે "વાડ જ ચિભડાં ગળે" તો ન્યાય ક્યાંથી મળશે?

પુત્રને આપ્યા હતા મુખ્ય પરીક્ષાના પેપર

CBI ની તપાસ અનુસાર, રાજ્ય સેવા પરીક્ષા-૨૦૨૧ માં ગોપનીયતા જાળવવાની જવાબદારી હોવા છતાં, ધ્રુવે મુખ્ય પરીક્ષાના પ્રશ્નપત્રો પોતાના પુત્ર સુમિત ધ્રુવને આપ્યા હતા.

ધ્રુવના ભિલાઈ સ્થિત નિવાસસ્થાને દરોડા દરમિયાન પેપર નંબર-૭ (સામાન્ય અધ્યયન) ના જવાબો અને પેપર નંબર-૨ (નિબંધ) ના પ્રશ્નોની નકલો મળી આવી હતી. તપાસમાં સામે આવ્યું હતું કે પેપર નંબર-૭ ના ૪૭ પ્રશ્નોમાંથી ૪૨ પ્રશ્નો આરોપીના ઘરેથી જપ્ત કરાયેલા દસ્તાવેજોમાં ઉપલબ્ધ હતા.

ઉચ્ચ પ્રશાસનિક પદ પર બેઠેલા સરકારી સેવકની આવી ગંભીર ભૂમિકાને ધ્યાનમાં રાખીને અદાલતે આરોપીના તમામ તર્કો ફગાવી દઈ જામીન અરજી રદ કરી દીધી હતી.