Lifestyle: શું જીનમાં ફેરફાર છે તમારા ગરદન અને પીઠના દુખાવાનું સાચું કારણ? જેબ્રાફિશ પર થયેલા નવા સંશોધનમાં મોટો દાવો

આજકાલની દોડધામ ભરેલી લાઈફસ્ટાઈલમાં ગરદન અને પીઠનો દુખાવો ખૂબ જ સામાન્ય બની ગયો છે, જેને સામાન્ય રીતે કલાકો સુધી સતત બેસી રહેવા કે ફોન વાપરવા સાથે જોડવામાં આવે છે. પરંતુ શું તમને ખબર છે કે આ દુખાવાનું મુખ્ય કારણ માત્ર ખરાબ લાઈફસ્ટાઈલ નહીં પરંતુ જીન (Gene) એક્ટિવિટીમાં થતા ફેરફારો પણ હોઈ શકે છે?

હાલમાં જ જેબ્રાફિશ (Zebrafish) પર કરવામાં આવેલા એક નવા સંશોધનમાં આ અંગે ચોંકાવનારો ખુલાસો થયો છે.

જીન એક્ટિવિટીમાં ફેરફારથી સ્પાઈનલ ડિસ્કને જોખમ

'કમ્યુનિકેશન્સ બાયોલોજી' જર્નલમાં પ્રકાશિત થયેલા આ સંશોધન મુજબ, જીન એક્ટિવિટીમાં થતા ફેરફારોને કારણે કરોડરજ્જુની કુદરતી શોક એબ્ઝોર્બર એટલે કે સ્પાઈનલ ડિસ્ક ખરાબ થઈ જાય છે. સંશોધનમાં જાણવા મળ્યું છે કે આ ફેરફારોથી કરોડરજ્જુમાં મિનરલ્સ જમા થવા લાગે છે, જેના કારણે બિનજરૂરી હાડકું સખત થઈ જાય છે અને તે ગરદન તથા પીઠના દુખાવાનું કારણ બને છે.

સર્જરી જ હતો એકમાત્ર વિકલ્પ

બ્રિટનની એડિનબર્ગ અને બ્રિસ્ટલ યુનિવર્સિટીના સંશોધકોના જણાવ્યા મુજબ, કરોડરજ્જુના હાડકાંને કુશન આપતી 'ઇન્ટરવર્ટેબ્રલ ડિસ્ક' ધીમે ધીમે ક્ષતિગ્રસ્ત થવી તે પીઠના દુખાવાનું મુખ્ય કારણ છે. અત્યાર સુધી આ રોગને અટકાવવા કે સારો કરવા માટે કોઈ ચોક્કસ દવા ઉપલબ્ધ નહોતી અને માત્ર સર્જરી જ લાંબા ગાળાનો એકમાત્ર વિકલ્પ ગણાતો હતો.

ભવિષ્યમાં દવાથી પણ શક્ય બનશે સ્પાઈનલ ડિસ્કનો ઈલાજ

એડિનબર્ગ યુનિવર્સિટીના ઈન્સ્ટિટ્યૂટ ઓફ જિનેટિક્સ એન્ડ કેન્સરના મુખ્ય સંશોધક એરિકા કાગુએ જણાવ્યું હતું કે, "દાયકાઓથી ડિસ્કની આ બીમારી માટે માત્ર સર્જરી જ મુખ્ય ઈલાજ રહ્યો છે. પરંતુ કરોડરજ્જુના સખત થવાની આ પ્રક્રિયાને સમજીને, અમારા અભ્યાસે તેને ધીમી કરવાના કેટલાક માર્ગો દર્શાવ્યા છે, જેમાં એવી દવાનો ઉપયોગ પણ સામેલ છે જે દર્દીઓ પર પહેલાથી જ સુરક્ષિત રીતે વાપરવામાં આવી રહી છે."

આ શોધ બાદ હવે ભવિષ્યમાં પીઠ અને ગરદનના ગંભીર દુખાવાથી પીડાતા દર્દીઓ માટે દવાથી ઈલાજ શક્ય બનવાની નવી આશા જાગી છે.