Lifestyle: શું ખરેખર પીળા કેળા કરતાં વધુ ફાયદાકારક છે લાલ કેળા? દૂર કરો મૂંઝવણ અને જાણો ૫ મોટા ફાયદા

બજારમાં સામાન્ય રીતે મળતા પીળા કેળાંની સરખામણીમાં 'લાલ કેળાં' (Red Bananas) પોષણનો ખજાનો ગણાય છે. લાલ છાલ અને હળવા ગુલાબી ગર્ભ ધરાવતા આ કેળાં સ્વાદમાં ખૂબ જ મીઠા હોવાની સાથે સ્વાસ્થ્ય માટે પણ અત્યંત ગુણકારી છે.

લાલ કેળામાં આયર્ન, પોટેશિયમ, ફાઈબર, વિટામિન-સી અને એન્ટીઓક્સિડન્ટ્સ વિપુલ પ્રમાણમાં મળી આવે છે. તે રોગપ્રતિકારક શક્તિ વધારવા, પાચન સુધારવા, એનીમિયા (લોહીની ટકાવારી ઓછી હોવી) દૂર કરવા અને હૃદયને તંદુરસ્ત રાખવામાં મદદ કરે છે.

પીળા કેળાં કરતાં કેવી રીતે ચડિયાતું છે આ સુપરફૂડ?

લાલ કેળાં સામાન્ય પીળા કેળાં કરતાં થોડાં મોંઘા ચોક્કસ હોય છે, પરંતુ તેના પોષક તત્વો તેને સુપરફૂડ બનાવે છે. દક્ષિણ ભારતમાં વધુ પ્રમાણમાં જોવા મળતાં લાલ કેળાં હવે સમગ્ર દેશમાં હેલ્થ-કોન્શિયસ લોકો વચ્ચે લોકપ્રિય થઈ રહ્યા છે. આ કેળાંમાં હળવી બેરી જેવી સુગંધ હોય છે.

લાલ કેળાં ખાવાના ૫ મુખ્ય ફાયદા:

૧. ઇમ્યુનિટી વધારે છે: લાલ કેળામાં રહેલું વિટામિન-સી અને એન્ટીઓક્સિડન્ટ્સ શરીરની રોગપ્રતિકારક ક્ષમતાને મજબૂત બનાવે છે. બદલાતા હવામાનમાં શરદી-ઉધરસ કે ઈન્ફેક્શનથી બચવા માટે તે ખૂબ ફાયદાકારક છે.

૨. હૃદય માટે ગુણકારી: પોટેશિયમથી ભરપૂર હોવાને કારણે લાલ કેળાં બ્લડ પ્રેશરને કંટ્રોલમાં રાખવામાં મદદ કરે છે. તે ધમનીઓને સ્વસ્થ રાખે છે અને હાર્ટ ડિસીઝનું જોખમ ઘટાડે છે.

૩. પાચન સુધારે અને વજન નિયંત્રિત કરે: ડાયેટરી ફાઈબરથી ભરપૂર આ ફળ પાચનતંત્રને સુધારે છે અને કબજિયાતથી રાહત આપે છે. ફાઈબરના કારણે પેટ લાંબો સમય ભરેલું લાગે છે, જેથી ઓવરઈટિંગથી બચી શકાય છે.

૪. લોહીની ઉણપ દૂર કરે: લાલ કેળામાં આયર્ન અને બીટા-કેરોટીનનું પ્રમાણ સામાન્ય કેળાં કરતાં વધુ હોય છે. એનીમિયાથી પીડાતા દર્દીઓ માટે તે રામબાણ ઈલાજ સમાન છે.

૫. સ્કિન અને ફ્રી રેડિકલ્સથી રક્ષણ: આમાં રહેલા શક્તિશાળી એન્ટીઓક્સિડન્ટ્સ શરીરને ફ્રી રેડિકલ્સથી બચાવે છે, જે ઉંમર પહેલાં આવતી વૃદ્ધાવસ્થા અને ત્વચાની સમસ્યાઓને રોકે છે.

કેવી રીતે કરવું સેવન?

લાલ કેળાંને તમે સીધા ફળ તરીકે ખાવા ઉપરાંત સ્મૂધી, શેક કે ફ્રુટ સલાડમાં ઉમેરીને પણ તેનો આનંદ માણી શકો છો.