Lifestyle: જ્યાં રૌદ્ર રૂપમાં દેખાય છે સરસ્વતી નદી અને મળે છે 'દેશની પહેલી ચા'! આવી છે ભારત ગામ 'માણા'ની કહાની

દેવભૂમિ ઉત્તરાખંડમાં દર બે કદમ પર એવા અનેક સ્થળો છે જે પોતાની અંદર અદભુત પૌરાણિક અને ઐતિહાસિક વાર્તાઓ છુપાવીને બેઠા છે. આ જ રાજ્યમાં ભારતનું એક એવું ગામ આવેલું છે, જે પહેલાં 'ભારતનું છેલ્લું ગામ' કહેવાતું હતું, પરંતુ હવે તે 'ભારતનું પ્રથમ ગામ' (First Village of India) તરીકે ઓળખાય છે.

સૌથી રસપ્રદ વાત એ છે કે માત્ર આ ગામ જ નહીં, પરંતુ અહીં આવેલી ચાની ટપરી પણ ભારતની પહેલી ચાની દુકાન માનવામાં આવે છે. આપણે વાત કરી રહ્યા છીએ ઉત્તરાખંડના સરહદી વિસ્તારમાં આવેલા 'માણા' (Mana Village) ગામની. ચાલો જાણીએ આ ગામની રસપ્રદ કહાની.

ભારતનું 'ફર્સ્ટ વિલેજ' માણા

માણા ગામ ઉત્તરાખંડના ચમોલી જિલ્લામાં પ્રસિદ્ધ ધામ બદ્રીનાથથી માત્ર ૩-૪ કિલોમીટરના અંતરે આવેલું છે. ભારત-તિબેટ સરહદ પર હોવાને કારણે તેને અગાઉ ભારતનું છેલ્લું ગામ કહેવાતું હતું. પરંતુ વડાપ્રધાન નરેન્દ્ર મોદીએ સરહદી વિસ્તારોના વિકાસને પ્રાધાન્ય આપતાં આહ્વાન કર્યું હતું કે, સીમાવર્તી વિસ્તારો દેશના અંતિમ નહીં પણ 'પ્રથમ ગામ' છે. ત્યારથી માણાને ભારતનું પ્રથમ ગામ જાહેર કરવામાં આવ્યું.

કેવી રીતે પડ્યું ગામનું નામ?

આ ગામ અતિ પૌરાણિક મહત્વ ધરાવે છે. આ ગામનું નામ 'મણિભદ્ર' નામના પૌરાણિક પાત્ર પરથી પડ્યું હોવાનું માનવામાં આવે છે. લોકવાયકા એવી પણ છે કે આ ગામને ભગવાન શિવનું વરદાન મળેલું છે, જેથી અહીં આવનાર વ્યક્તિના તમામ પાપ અને દરિદ્રતા દૂર થાય છે.

અહીં જ થાય છે સરસ્વતી નદીના દર્શન

આપણે પુસ્તકોમાં વાંચીએ છીએ કે સરસ્વતી નદી વિલુપ્ત થઈ ચૂકી છે, પરંતુ દરિયાઈ સપાટીથી હજારો ફૂટની ઊંચાઈએ આવેલા માણા ગામમાં આજે પણ સરસ્વતી નદી પોતાના રૌદ્ર અને ભવ્ય રૂપમાં વહેતી જોવા મળે છે. અહીં સરસ્વતી નદી અને અલકનંદા નદીનો પવિત્ર સંગમ થાય છે, જેને 'કેશવપ્રયાગ' કહેવામાં આવે છે.

છેલ્લી માંથી 'પહેલી' બની ચાની દુકાન

પહાડોની યાત્રા દરમિયાન ગરમાગરમ ચા અને મેગી ખાવાની મજા જ કંઈક અલગ હોય છે. માણા ગામમાં આવેલી ચાની દુકાન, જે પહેલાં "ભારતની છેલ્લી ચાની દુકાન" તરીકે ફેમસ હતી, તે પણ હવે "ભારતની પહેલી ચાની ટપરી" બની ગઈ છે. આ દુકાન ૨૫ વર્ષ કરતાં પણ વધુ જૂની છે અને અહીં આવતા પ્રવાસીઓ માટે આકર્ષણનું મુખ્ય કેન્દ્ર છે.