Lifestyle: ઓફિસ હોય કે ટ્રાવેલ, નાની ભૂખ માટે બેસ્ટ છે આ 8 ટેસ્ટી સ્નેક્સ; મળશે ભરપૂર એનર્જી અને નહીં વધે વજન

અવારનવાર એવું બને છે કે પેટ ભરીને જમ્યા પછી પણ થોડીવારમાં જ કંઈક ખાવાનું મન થવા લાગે છે. આ ખરી ભૂખ નથી હોતી, પરંતુ ખોટી સ્નેકિંગ આદતોની અસર હોય છે. જો સ્નેક્સની સાચી પસંદગી કરવામાં આવે, તો વારંવાર ભૂખ લાગવાની સમસ્યા દૂર થાય છે અને સાથે જ વજન, પાચન તેમજ એનર્જી લેવલ પણ જળવાઈ રહે છે.

શેકેલા ચણા, મખાના, બાફેલું ઈંડું, સફરજન કે જામફળ, ગ્રીક યોગર્ટ, સ્પ્રાઉટ્સ ચાર્ટ, વેજિટેબલ સૂપ અને બટર વગરના પોપકોર્ન એવા સ્નેક્સ છે જે ફાઈબર અને પ્રોટીનથી ભરપૂર હોય છે. તે પેટને લાંબો સમય ભરેલું રાખે છે અને વજન વધવાથી પણ બચાવે છે.

૧. શેકેલા ચણા (Roasted Chana)

શેકેલા ચણા પ્રોટીન અને ફાઈબરનો ઉત્તમ સ્ત્રોત છે. તે ધીમે ધીમે પચે છે, જેથી પેટ લાંબો સમય ભરેલું લાગે છે. ઓફિસ કે ટ્રાવેલિંગ દરમિયાન ખાવા માટે આ એક સરળ અને હેલ્ધી ઓપ્શન છે.

૨. મખાના (Makhana)

મખાનામાં કેલરી ઓછી હોય છે અને તે કેલ્શિયમ તેમજ એન્ટીઓક્સિડન્ટ્સથી ભરપૂર હોય છે. તેને થોડા ઘીમાં ડ્રાય રોસ્ટ કરીને ખાવાથી તે ક્રિસ્પી અને સ્વાદિષ્ટ લાગે છે.

૩. બાફેલું ઈંડું (Boiled Egg)

બાફેલું ઈંડું હાઈ-પ્રોટીન સ્નેક છે, જે સ્નાયુઓને મજબૂત બનાવે છે અને ભૂખને કંટ્રોલ કરે છે. ખાસ કરીને વર્કઆઉટ પછી તે લાંબા સમય સુધી શરીરમાં એનર્જી જાળવી રાખવામાં મદદ કરે છે.

૪. તાજા ફળો (Fresh Fruits)

સફરજન, જામફળ અને પપૈયા જેવા ફળો ફાઈબર અને પાણીથી ભરપૂર હોય છે. તે પાચનતંત્રને સાફ રાખે છે અને તેની કુદરતી મીઠાશના કારણે ગળ્યું ખાવાની ક્રેવિંગ પણ ઓછી થાય છે.

૫. ગ્રીક યોગર્ટ (Greek Yogurt)

ગ્રીક યોગર્ટમાં પ્રોટીન અને પ્રોબાયોટિક્સ હોય છે, જે પાચનક્રિયાને સુધારે છે. તે પેટને શાંત રાખે છે અને લાંબા સમય સુધી ભૂખ લાગવા દેતું નથી.

૬. સ્પ્રાઉટ્સ ચાટ (Sprouts Chaat)

ફણગાવેલા મગ કે ચણામાંથી બનાવેલી સ્પ્રાઉટ્સ ચાટ વિટામિન્સ, મિનરલ્સ અને ફાઈબરથી ભરપૂર હોય છે. લીંબુ અને હળવા મસાલા ઉમેરીને ખાવાથી તે પચવામાં હળવી અને પોષક બને છે.

૭. વેજિટેબલ સૂપ (Vegetable Soup)

ઘરે બનાવેલો વેજિટેબલ કે ક્લિયર સૂપ ઓછી કેલરીમાં પેટ ભરવા માટેનો શ્રેષ્ઠ વિકલ્પ છે. તેમાં રહેલું ફાઈબર ભૂખને નિયંત્રિત કરે છે અને શરીરને હાઈડ્રેટ રાખે છે.

૮. બટર વગરના પોપકોર્ન (Popcorn)

એર-પોપ્ડ પોપકોર્ન ફાઈબરથી ભરપૂર હોય છે અને તેમાં કેલરી બહુ ઓછી હોય છે. આ હેલ્ધી સ્નેક ખાવામાં સમય લે છે, જેથી મગજને પેટ ભરાઈ ગયાનો સંકેત જલ્દી મળી જાય છે.