Lifestyle: ઘરમાં નથી કોઈ શાકભાજી? 10 મિનિટમાં બનાવો રાજસ્થાનનું ફેમસ પાપડનું શાક, નોંધી લો રેસિપી

ઘણીવાર એવું બને છે કે ઘરમાં કોઈ શાકભાજી ઉપલબ્ધ નથી હોતી અથવા તો રોજ-રોજની દાળ-રોટલી ખાઈને આપણે કંટાળી જઈએ છીએ. આવા સમયે કંઈક નવું અને મસાલેદાર ખાવાનું મન થાય ત્યારે રાજસ્થાનનું આ ખાસ 'પાપડનું શાક' તમારા માટે એક ઉત્તમ અને સ્વાદિષ્ટ વિકલ્પ બની શકે છે. માત્ર ૧૦ મિનિટમાં તૈયાર થઈ જતા આ ટ્રેડિશનલ શાકની રેસિપી વિશે જાણો.

જરૂરી સામગ્રી

• પાપડ: ૫-૬

• દહીં: ૧/૨ કપ

• ટમેટાં: ૨-૩ (બારીક વાટેલા)

• લીલા મરચાં: ૨-૩ (ઝીણા સમારેલા)

• આદુ: ૧ ઇંચ

• લીલા ધાણા: ૨-૩ ચમચી

• કસુરી મેથી: ૧ ચમચી

• મસાલા: જીરું (૧/૨ ચમચી), હીંગ (૧ ચપટી), હળદર (૧/૪ ચમચી), લાલ મરચું પાવડર (૧/૪ ચમચી), ધાણાજીરું પાવડર (૧ ચમચી), તેલ અને સ્વાદાનુસાર મીઠું.

બનાવવાની રીત

પાપડ શેકવા: સૌથી પહેલા પાપડને ગેસ પર સીધા શેકી લો અથવા તેલમાં તળી લો.

દહીંનું મિશ્રણ: દહીંમાં અડધો કપ પાણી ઉમેરીને તેને બરાબર ફેંટી લો.

વઘાર કરવો: કડાઈમાં ૨-૩ ચમચી તેલ ગરમ કરી તેમાં જીરું, હીંગ, આદુ અને લીલા મરચાં સાંતળી લો.

મસાલો પકવવો: હવે તેમાં ટમેટાંની પેસ્ટ, લાલ મરચું, હળદર, ધાણાજીરું અને કસુરી મેથી ઉમેરો. મસાલામાંથી તેલ છૂટું પડે ત્યાં સુધી તેને સાંતળો.

ગ્રેવી તૈયાર કરવી: મસાલો પાકી જાય એટલે તેમાં ૧ કપ પાણી અને સ્વાદાનુસાર મીઠું ઉમેરી ધીમા તાપે ઊકળવા દો.

દહીં ઉમેરવું: ગ્રેવીમાં ઉકાળો આવે એટલે ગેસ ધીમો કરી ફેટેલું દહીં ધીમે-ધીમે ઉમેરતા જઈ સતત હલાવતા રહો, જેથી દહીં ફાટી ના જાય.

પાપડ ઉમેરવા: ગ્રેવી તૈયાર થાય એટલે બારીક સમારેલા લીલા ધાણા અને શેકેલા પાપડના ટુકડા ઉમેરી ૨ મિનિટ ધીમા તાપે પકવો.

તમારું સ્વાદિષ્ટ રાજસ્થાની પાપડનું શાક તૈયાર છે! તેને ગરમાગરમ રોટલી કે ભાત સાથે પીરસો.

આ ખાસ બાબતોનું ધ્યાન રાખો

• દહીંને ફ્રિજમાંથી સીધું જ ગ્રેવીમાં ન ઉમેરવું, તેને સામાન્ય રૂમ ટેમ્પરેચર પર આવ્યા પછી જ વાપરવું.

• તમે ઈચ્છો તો ટમેટાંની સાથે બારીક સમારેલી ડુંગળી પણ વઘારમાં ઉમેરી શકો છો.