Lifestyle: ભેજ અને અસહ્ય ગરમીમાં છોડ પણ થઈ જાય છે સ્ટ્રેસનો શિકાર, સમયસર આ 5 લક્ષણોથી કરો ઓળખ

ગરમી અને ભેજવાળું વાતાવરણ માત્ર મનુષ્યો માટે જ નહીં, પણ ઘરમાં રહેલા છોડ-છોડવાઓ માટે પણ ખૂબ મુશ્કેલીભર્યું હોય છે. છોડ જ્યારે ગરમીના કારણે સ્ટ્રેસ (તણાવ) અનુભવે છે, ત્યારે તે કેટલાક સ્પષ્ટ સંકેતો આપે છે. જો સમયસર આ સંકેતોને ઓળખી લેવામાં આવે, તો છોડને કરમાઈને સુકાઈ જતાં બચાવી શકાય છે.

જાણો છોડમાં ગરમીના તણાવના ૫ મુખ્ય લક્ષણો અને તેના બચાવના ઉપાયો:

૧. પાંદડાં કરમાઈ જવા કે ખરી પડવા

ગરમીના કારણે છોડ સ્ટ્રેસમાં હોવાનું આ સૌથી સામાન્ય સંકેત છે. જેમાં છોડ તેના મૂળમાંથી ઝડપથી પાણી ખેંચે છે અને ભેજ ગુમાવવા લાગે છે. ઘણીવાર માટીમાં ભેજ હોવા છતાં પાંદડાં ઢળી પડે છે. જોકે તાપમાન ઘટતાં જ છોડ સામાન્ય સ્થિતિમાં આવી જાય છે, તેથી પાણી આપતાં પહેલાં માટીની ચકાસણી જરૂર કરો.

૨. પાંદડાં વળી જવા (કર્લ થવા)

ગરમ વાતાવરણમાં બાષ્પીભવન રોકવા અને પાણી બચાવવા માટે છોડ પોતાના બચાવમાં પાંદડાંને વાળી લે છે. પરંતુ જો ગરમી ઘટ્યા પછી પણ પાંદડાં વળેલા જ રહે, તો સમજી લેવું કે તેના પર જીવાત કે રોગનો હુમલો થયો છે.

૩. પાંદડાં બળી જવા કે સુકાઈ જવા

અતિશય ગરમી અને તીવ્ર તડકાને કારણે પાંદડાંની કિનારીઓ બળી જાય છે અને સુકાવા લાગે છે. આવા સમયે છોડને તડકામાંથી હટાવીને છાંયડા વાળી જગ્યાએ શિફ્ટ કરવો જોઈએ અને યોગ્ય માત્રામાં પાણી આપવું જોઈએ.

૪. પાંદડાંની ચમક ફીકી પડી જવી

વધુ પડતી ગરમી છોડનો કુદરતી લીલો રંગ અને ચમક છીનવી લે છે. જો એક-બે દિવસમાં પાંદડાંનો લીલો રંગ પાછો ન આવે, તો તે ભાગનું કટિંગ (પ્રૂનિંગ) કરવાની જરૂર પડી શકે છે.

૫. વિકાસ (Growth) ધીમો પડી જવો

જ્યારે છોડ ગરમી સામે ટકી રહેવાના 'સર્વાઈવલ મોડ'માં હોય છે, ત્યારે તેની નવી કૂંપળો અને વિકાસ અટકી જાય છે. આવા સમયે છોડને સમયસર પાણી આપતા રહો, પરંતુ ખાતર આપવાનું ટાળો. સ્ટ્રેસમાં રહેલા છોડને વધુ ખાતર આપવાથી તેને ભારે નુકસાન થઈ શકે છે.