Lifestyle: શું ચાલુ ટ્રેનમાં તબિયત લથડે તો ડૉક્ટર મળે છે? રેલવેની આ 'મેડિકલ સર્વિસ' વિશે કદાચ તમે નહીં જાણતા હોવ

આજના સમયમાં લોકો મૂડ ફ્રેશ કરવા કે પોતાના પરિવારને મળવા માટે ટ્રેન દ્વારા લાંબી મુસાફરી કરતા હોય છે. પરંતુ જરા વિચારો કે ટ્રેનમાં મુસાફરી દરમિયાન જો અચાનક તમારી કે તમારા કોઈ સ્વજનની તબિયત ગંભીર રીતે બગડી જાય તો શું થાય? આવી કટોકટીની સ્થિતિમાં ભારતીય રેલવે દ્વારા મુસાફરોને કયા પ્રકારની મેડિકલ સુવિધાઓ આપવામાં આવે છે, તે જાણવું ખૂબ જ જરૂરી છે.

ભારતીય રેલવેની મેડિકલ ઇમરજન્સી સેવા

ભારતમાં ટ્રેન એ મુસાફરી માટેનું સૌથી સસ્તું અને સરળ માધ્યમ છે, જેમાં દરરોજ કરોડો લોકો મુસાફરી કરે છે. મુસાફરો ટ્રેનમાં ખાવા-પીવાની કે સીટ-બેડરોલ જેવી સુવિધાઓ વિશે તો જાણે છે, પરંતુ બહુ ઓછા લોકોને ખબર છે કે રેલવે મુસાફરો માટે મેડિકલ સર્વિસ પણ પૂરી પાડે છે.

૧૩૯ ઓલ-ઇન-વન હેલ્પલાઇન નંબર

રેલવેએ મુસાફરોની સુવિધા માટે ૧૩૯ (139) હેલ્પલાઇન નંબર જાહેર કરેલો છે. મુસાફરી દરમિયાન કોઈની તબિયત ખરાબ થાય ત્યારે આ નંબર પર કોલ કરીને તરત જ મદદ માંગી શકાય છે. માહિતી મળતા જ રેલવે તંત્ર તાત્કાલિક એક્શનમાં આવે છે અને આગામી સ્ટેશન પર જ ડૉક્ટર, દવાઓ અને ફર્સ્ટ એઇડની સુવિધા ઉપલબ્ધ કરાવવામાં આવે છે.

કેવી રીતે કામ કરે છે આ મેડિકલ સેવા?

• કોલ કરો: સૌથી પહેલા ૧૩૯ હેલ્પલાઇન નંબર પર કોલ કરી ૧ નંબર દબાવવાનો રહે છે.

• વિગતો આપો: કોલ સેન્ટર એક્ઝિક્યુટિવ સાથે વાત કરીને તમારો PNR નંબર, ટ્રેન નંબર અને સીટ નંબર જણાવો.

• સમસ્યા જણાવો: તમારી તબિયત કે ઇમરજન્સી વિશે સ્પષ્ટ માહિતી આપો.

• તાત્કાલિક સપોર્ટ: માહિતી મળતાં જ ટીટીઈ (TTE) અથવા ટ્રેન સ્ટાફને એલર્ટ કરવામાં આવે છે અને આગામી નજીકના સ્ટેશન પર જરૂરિયાત મુજબ એમ્બ્યુલન્સ કે ફર્સ્ટ એઇડની ટીમ તૈનાત કરી દેવામાં આવે છે.

વન નેશન, વન હેલ્પલાઇન

રેલવેનો ૧૩૯ નંબર 'વન નેશન, વન હેલ્પલાઇન' તરીકે કામ કરે છે. મેડિકલ ઇમરજન્સી સિવાય આ જ નંબર પરથી PNR સ્ટેટસ, ટ્રેનનું ટાઇમિંગ, ભાડાની માહિતી તેમજ ચોરી, છેડતી કે સુરક્ષા સંબંધિત ફરિયાદો માટે પણ મદદ મેળવી શકાય છે.