Lifestyle: ડ્રેસનું તૂટેલું બટન અને 15 ડોલરનું દેવું: આમ બની હતી દુનિયાની પહેલી 'સેફ્ટી પિન', આજે છે દરેક ઘરની જરૂરિયાત

આજે સાડી ડ્રેપ કરવાથી લઈને ઈમરજન્સીમાં ફાટેલા કપડાં સાચવવા સુધી, સેફ્ટી પિન દરેક ઘરની જરૂરિયાત બની ગઈ છે. ખાસ કરીને મહિલાઓના પર્સમાં આ નાનકડી પિન પોતાનું ખાસ સ્થાન ધરાવે છે. પરંતુ શું તમે જાણો છો કે આ નાની સેફ્ટી પિનની શોધ ક્યારે અને કેવી રીતે થઈ હતી? તેની પાછળ એક રસપ્રદ વાર્તા છુપાયેલી છે.

૧૫ ડોલરનું દેવું ચૂકવવા બની હતી સેફ્ટી પિન

તમને જાણીને નવાઈ લાગશે કે આ નાનકડી સેફ્ટી પિન માત્ર ૧૫ ડોલરનું દેવું ચૂકવવા માટે બનાવવામાં આવી હતી. ઈતિહાસમાં આ કિસ્સો નોંધાયેલો છે કે ન્યૂયોર્કના વોલ્ટર હંટે વર્ષ ૧૮૪૯માં પોતાના માથે ચડેલું દેવું ઉતારવા માટે આ યુક્તિ શોધી કાઢી હતી.

પત્નીના ડ્રેસનું બટન તૂટતાં થયો વિજ્ઞાનનો ચમત્કાર

એક દિવસ વોલ્ટર હંટ અને તેમની પત્ની એક ફંક્શનમાં જવા માટે તૈયાર થઈ રહ્યા હતા. હંટ એ વિચારમાં હતા કે દેવું કેવી રીતે ચૂકવવું, જ્યારે તેમની પત્ની તૈયાર થઈ રહી હતી. અચાનક તેમની પત્નીના ડ્રેસનું બટન તૂટી ગયું. ડ્રેસ બદલવાનો સમય નહોતો, તેથી હંટે એક પાતળા ધાતુના તારને વાળીને એક પિન બનાવી દીધી, જેણે બટનનું કામ કર્યું. આ રીતે જુગાડમાંથી સેફ્ટી પિનનો જન્મ થયો.

શરૂઆતમાં કેવી દેખાતી હતી સેફ્ટી પિન?

જ્યારે આ પિન પહેલીવાર બની ત્યારે તે ધાતુના તારમાંથી બનાવવામાં આવી હતી, જેના એક છેડે સ્પ્રિંગ અને બીજા છેડે ક્લેસ્પ (લોક) હતું જેથી પિન વાગે નહીં. શરૂઆતમાં તેને 'ડ્રેસ પિન' કહેવામાં આવતી હતી, પરંતુ તેની સુરક્ષિત ડિઝાઇન અને દૈનિક ઉપયોગિતાને કારણે તેને 'સેફ્ટી પિન' નામ આપવામાં આવ્યું.

૪૦૦ ડોલરમાં વેચી દીધા હતા પેટન્ટના અધિકારો

શોધ કર્યા બાદ હંટે આ પિનની પેટન્ટ કરાવી લીધી હતી. જોકે, આર્થિક તંગીના કારણે તેમણે તેના પેટન્ટ અધિકારો માત્ર ૪૦૦ ડોલરમાં એક કંપનીને વેચી દીધા હતા, જેથી તેઓ પોતાનું ૧૫ ડોલરનું દેવું ચૂકવી શકે. ઉલ્લેખનીય છે કે વોલ્ટર હંટ એ જ મહાન શોધક હતા જેમણે ફાઉન્ટેન પેન અને સિલાઈ મશીનની શોધમાં પણ મહત્વનો ફાળો આપ્યો હતો.