Lifestyle: જ્યારે ઘરમાં ન હોય કોઈ ખાસ શાક ત્યારે બનાવો હલવાઈ સ્ટાઈલ 'ધનિયા આલૂ'; આંગળા ચાટતા રહી જશે સભ્યો

બટાકાનું એકનું એક શાક ખાતાં ખાતાં જો તમે કંટાળી ગયા હોવ, તો આ વખતે કંઈક નવું અને ચટાકેદાર ટ્રાય કરી શકો છો. 'ધણિયા આલૂ' (કોથમીર બટાકા) એ એક એવી વાનગી છે જે બનાવવામાં અત્યંત સરળ છે અને સ્વાદમાં બિલકુલ લગ્નપ્રસંગ કે ઢાબામાં મળતા શાક જેવી જ બને છે.

બપોરનું ભોજન હોય કે રાતનું ડિનર, આ મસાલેદાર વાનગી તમારી ભૂખ બમણી કરી દેશે. લીલા ધાણાની તાજગી અને ચટાકેદાર મસાલા આ વાનગીને ખાસ બનાવે છે. ચાલો જાણીએ તેને બનાવવાની સૌથી સરળ રીત.

ધણિયા આલૂ બનાવવા માટેની સામગ્રી

• બાફેલા બટાકા: ૪ થી ૫ (ચોરસ ટુકડામાં કાપેલા)

• લીલા ધાણા (કોથમીર): ૧ મોટો કપ (દાંડી સાથે, ધોયેલી)

• લીલા મરચાં: ૨ થી ૩

• આદુ: ૧ ઇંચનો ટુકડો

• જીરું: ૧ નાની ચમચી

• હીંગ: ૧ થી ૨ ચપટી

• ધાણાજીરું પાવડર: ૧ નાની ચમચી

• આમચૂર પાવડર અથવા લીંબુનો રસ: ૧ નાની ચમચી

• ગરમ મસાલો: અડધી નાની ચમચી

• મીઠું: સ્વાદાનુસાર

• તેલ અથવા ઘી: ૨ થી ૩ મોટી ચમચી

ધણિયા આલૂ બનાવવાની સરળ રીત

સૌથી પહેલાં મિક્સર ગ્રાઇન્ડરમાં તાજી કોથમીર, લીલા મરચાં, આદુ અને થોડું પાણી ઉમેરીને ઘટ્ટ ગ્રીન પેસ્ટ બનાવી લો.

હવે એક કડાઈમાં તેલ અથવા ઘી ગરમ કરો. તેલ ગરમ થાય એટલે જીરું અને હીંગ ઉમેરો. જીરું સતળાય એટલે ધાણાજીરું પાવડર ઉમેરીને થોડી સેકન્ડ માટે સાંતળો.

હવે કડાઈમાં તૈયાર કરેલી કોથમીરની ગ્રીન પેસ્ટ ઉમેરો. તેને મધ્યમ આંચ પર સતત હલાવતા રહીને ૨ થી ૩ મિનિટ સુધી સાંતળો, જેથી તેલ છૂટું પડવા લાગે.

મસાલો બરાબર સંતળાઈ જાય એટલે તેમાં બાફેલા બટાકાના ટુકડા, મીઠું, ગરમ મસાલો અને આમચૂર પાવડર ઉમેરી દો.

હળવા હાથે બધું મિક્સ કરો જેથી ગ્રીન મસાલાનું કોટિંગ બટાકા પર બરાબર ચડી જાય. હવે ઢાંકણ ઢાંકીને ધીમા તાપે ૩ થી ૪ મિનિટ સુધી ચડવા દો, જેથી બટાકામાં મસાલાનો સ્વાદ ઉતરી જાય.

ગેસ બંધ કરો અને લો, તમારા ચટાકેદાર અને સુગંધીદાર હલવાઈ સ્ટાઈલ 'ધણિયા આલૂ' તૈયાર છે.

ખાસ ટીપ: જો તમે આ શાકમાં રેસ્ટોરન્ટ જેવો ટેસ્ટ લાવવા માંગતા હોવ, તો કોથમીરની પેસ્ટ પીસતી વખતે તેમાં ૪-૫ કાજુ અથવા થોડા શેકેલા સીંગદાણા ઉમેરી શકો છો.