'હું હાફિઝ સઈદનો ગુલામ છું, બિડલા મંદિરમાં ઘંટડી નહીં વાગે', ભારતને પા કિલોના એટમ બોમ્બની ધમકી આપનાર પૂર્વ પાકિસ્તાની મંત્રીની કબૂલાત

ભારતને અગાઉ 'પા કિલોના પરમાણુ બોમ્બ'ની ધમકી આપનારા પાકિસ્તાનના પૂર્વ ગૃહમંત્રી શેખ રશીદે આંતરરાષ્ટ્રીય આતંકવાદી હાફિઝ સઈદ સાથેના પોતાના સંબંધોનો ખુલ્લેઆમ સ્વીકાર કર્યો છે. રશીદે જાહેરમાં પોતાને આતંકી હાફિઝ સઈદનો ગુલામ અને ફોલોઅર ગણાવ્યો હતો. લશ્કર-એ-તૈયબાના આતંકવાદીઓની હાજરીમાં રશીદે ભારત વિરુદ્ધ ઝેર ઓકીને નવી ધમકીઓ આપી છે.

'હું હાફિઝ સઈદનો ગુલામ છું'

એક પત્રકાર પરિષદને સંબોધતા પાકિસ્તાનના પૂર્વ ગૃહમંત્રી શેખ રશીદે કહ્યું, "હું હાફિઝ સઈદ સાહેબનો ગુલામ છું. હું તો એમનો ફોલોઅર છું." ઈમરાન ખાનના નજીકના ગણાતા રશીદે દાવો કર્યો હતો કે તેમના ફોનમાંથી હાફિઝ સઈદનો નંબર મળી આવવાના કારણે અમેરિકાએ તેમને દેશમાંથી બહાર કાઢી મૂક્યા હતા.

બિડલા મંદિર અંગે આપી ધમકી

ભારત વિરુદ્ધ ઝેર ઓકતાં શેખ રશીદે ધમકી આપી હતી કે, "જો હિન્દુસ્તાન પાકિસ્તાન તરફ નજર ઉઠાવીને જોશે તો અમે તેને નેસ્તનાબૂદ કરી દઈશું. ભારતમાં ન તો ચકલીઓ ચીંચીં કરશે કે ન તો બિડલા મંદિરમાં ઘંટડીઓ વાગશે."

જ્યારે શેખ રશીદ આ નિવેદન આપી રહ્યા હતા ત્યારે મંચ પર લશ્કર-એ-તૈયબાનો સીનિયર નેતા સંધૂ અને કમાન્ડર શેખ યાકૂબ તેમની બિલકુલ બાજુમાં બેઠેલા જોવા મળ્યા હતા.

કોણ છે હાફિઝ સઈદ?

હસન અબ્દાલમાં જન્મેલો હાફિઝ સઈદ આતંકવાદી સંગઠન લશ્કર-એ-તૈયબાનો સ્થાપક છે અને ૨૬/૧૧ ના મુંબઈ આતંકી હુમલાનો મુખ્ય માસ્ટરમાઈન્ડ છે. સંયુક્ત રાષ્ટ્ર (UN) અને અમેરિકા દ્વારા તેને વૈશ્વિક આતંકવાદી જાહેર કરવામાં આવ્યો છે. ભારત વિરુદ્ધ અનેક આતંકી હુમલાઓમાં તેની સીધી સંડોવણી રહી છે.