International: રશિયાએ ઉત્તર કોરિયાની મિસાઈલોથી યુક્રેનમાં મચાવી તબાહી? જેલેન્સ્કીનો દાવો- હુમલામાં ૧૨ લોકોના મોત

રશિયા તરફથી ફરી એકવાર યુક્રેન પર ભયાનક મિસાઈલ હુમલો કરવામાં આવ્યો છે. યુક્રેનની રાજધાની કીવ દ્વારા જણાવાયું છે કે રાતોરાત થયેલા રશિયન હુમલાઓમાં ઓછામાં ઓછા ૧૨ લોકો માર્યા ગયા છે અને ડઝનબંધ લોકો ગંભીર રીતે ઘવાયા છે. યુક્રેને મોસ્કો પર આ હુમલામાં ઉત્તર કોરિયાની બેલિસ્ટિક મિસાઈલોનો ઉપયોગ કરવાનો ગંભીર આરોપ લગાવ્યો છે.

યુક્રેનના રાષ્ટ્રપતિ વોલોડિમિર જેલેન્સ્કીએ જણાવ્યું હતું કે, રશિયાને તેના સહયોગી દેશ પ્યોંગયાંગ (ઉત્તર કોરિયા) પાસેથી સતત બેલિસ્ટિક મિસાઈલો, લશ્કરી સાધનો અને સૈનિકો મળી રહ્યા છે.

કીવ અને ઝાપોરિઝિયામાં ભયાનક વિનાશ

જેલેન્સ્કીના જણાવ્યા મુજબ, તાજેતરના રશિયન હુમલામાં દક્ષિણ-પૂર્વ શહેર ઝાપોરિઝિયા સૌથી વધુ પ્રભાવિત થયું છે, જ્યાં ઓછામાં ઓછા ૬ લોકો માર્યા ગયા અને ૧૯ લોકો ઘવાયા. તેમણે ઉમેર્યું કે આ શહેર પર ઉત્તર કોરિયાઈ બેલિસ્ટિક મિસાઈલો, ઝિર્કોન અને ગાઈડેડ એરિયલ બોમ્બ વડે હુમલો કરવામાં આવ્યો હતો, જેનો મુખ્ય ઉદ્દેશ્ય નાગરિક ઈન્ફ્રાસ્ટ્રક્ચરને નુકસાન પહોંચાડવાનો હતો.

આ ઉપરાંત, નિપ્રોપેટ્રોવસ્ક અને ડોનેટ્સક વિસ્તારોમાં અન્ય ૬ લોકોના મોત થયા છે. રાજધાની કીવમાં એક ચેપી રોગ હોસ્પિટલ પર હુમલો થયો હતો, જ્યારે ખેરસન અને ખાર્કિવ જેવા ફ્રન્ટલાઈન શહેરોમાં હુમલાના કારણે વીજ પુરવઠો ખોરવાઈ ગયો હતો.

શાંતિ નહીં પણ યુદ્ધ વધારવાનો પુતિનનો ઈરાદો

વોલોડિમિર જેલેન્સ્કીએ સોશિયલ મીડિયા પર આક્રોશ વ્યક્ત કરતા કહ્યું કે, રશિયા બેલિસ્ટિક મિસાઈલોનું ઉત્પાદન વધારી રહ્યું છે અને ઉત્તર કોરિયા પાસેથી સૈન્ય મદદ મેળવી રહ્યું છે. આ બતાવે છે કે રશિયન પ્રમુખ વ્લાદિમીર પુતિન શાંતિ વાટાઘાટો માટે નહીં પરંતુ યુદ્ધ અને તણાવ વધારવાની તૈયારી કરી રહ્યા છે.

યુક્રેની સેનાના અહેવાલો મુજબ, ફેબ્રુઆરી ૨૦૨૨ માં યુદ્ધ શરૂ થયા પછી રશિયાએ યુક્રેન પર ડઝનબંધ ઉત્તર કોરિયાઈ મિસાઈલો છોડી છે. આ સિવાય રશિયન સેના તરફથી લડવા માટે ૫૦,૦૦ સુધી ઉત્તર કોરિયાઈ સૈનિકો મોકલવામાં આવી રહ્યા હોવાનો દાવો પણ યુક્રેન દ્વારા કરવામાં આવ્યો છે.