International: બાંગ્લાદેશમાં શું ચાલી રહ્યું છે? PM તારિકના રક્ષા સલાહકારને મળ્યા RAW ચીફ, શેખ હસીનાની વાપસીનું પ્લાનિંગ!

ભારતની ગુપ્તચર એજન્સી 'રિસર્ચ એન્ડ એનાલિસિસ વિંગ' (RAW) ના વડા પરાગ જૈને બાંગ્લાદેશના પ્રધાનમંત્રી તારિક રહમાનના રક્ષા સલાહકાર બ્રિગેડિયર જનરલ (નિવૃત્ત) ડૉ. એ કે એમ શમસુલ ઈસ્લામ સાથે મહત્વપૂર્ણ મુલાકાત કરી છે. સોમવારે યોજાયેલી આ બેઠક એ જ દિવસે થઈ જ્યારે ભારતીય હાઈ કમિશનર દિનેશ ત્રિવેદીએ પ્રધાનમંત્રી તારિક રહમાન સાથે હાઈ-પ્રોફાઈલ મુલાકાત કરી હતી. RAW ચીફના નેતૃત્વમાં ભારતીય સુરક્ષા અધિકારીઓનું ૪ સભ્યોનું પ્રતિનિધિમંડળ બાંગ્લાદેશની મિલિટરી ઈન્ટેલિજન્સ એજન્સી DGFI ના નિમંત્રણ પર ઢાકા પહોંચ્યું છે.

પરાગ જૈન ઉપરાંત આ ડેલીગેશનમાં અશ્વિન મુકુંદ કોટનીસ, રાહુલ નેગી અને શૈબલ રોય ચૌધરી સામેલ છે. રવિવારે બપોરે ઢાકાના હઝરત શાહજલાલ આંતરરાષ્ટ્રીય એરપોર્ટ પર ઉતર્યા બાદ આ ટીમે પોતાની સત્તાવાર મુલાકાત શરૂ કરી હતી.

શેખ હસીનાની વાપસીના પ્લાન અંગે ચર્ચા?

આમ તો ભારત અને બાંગ્લાદેશની સિક્યોરિટી એજન્સીઓ વચ્ચે નિયમિત બેઠકો થતી રહે છે, પરંતુ નવી દિલ્હીમાં શેખ હસીનાની વર્ચ્યુઅલ પ્રેસ કોન્ફરન્સના ગણતરીના દિવસોમાં જ યોજાયેલી આ મુલાકાત અત્યંત સંવેદનશીલ ગણાવાય રહી છે.

સૂત્રો અને સ્થાનિક મીડિયા અહેવાલો અનુસાર, ભારતીય સુરક્ષા અધિકારીઓના પ્રતિનિધિમંડળે ઢાકા ખાતે શેખ હસીનાની બાંગ્લાદેશ વાપસીની પ્રક્રિયા અને સુરક્ષા વ્યવસ્થા અંગે વિસ્તૃત ચર્ચા કરી છે. રિપોર્ટ મુજબ, સિક્યોરિટી ટીમમાંથી બે અતિ વરિષ્ઠ અધિકારીઓએ બાંગ્લાદેશ સચિવાલયમાં પ્રધાનમંત્રી તારિક રહમાન સાથે તેમના કાર્યાલયમાં ખાનગી મુલાકાત પણ કરી છે.

ડિસેમ્બર પહેલાં થઈ શકે છે હસીનાની વાપસી

અહેવાલોમાં સંકેત આપવામાં આવ્યો છે કે દિલ્હીમાં યોજાનારી બ્રિક્સ (BRICS) સમિટ પૂર્ણ થયા બાદ અને પ્રધાનમંત્રી તારિક રહમાનની બાંગ્લાદેશ વાપસી પછી શેખ હસીના પોતાના દેશ પરત ફરી શકે છે.

ઉલ્લેખનીય છે કે ૫ ઓગસ્ટ ૨૦૨૪ ના રોજ બાંગ્લાદેશ છોડ્યા બાદથી ભારતમા રહી રહેલાં શેખ હસીનાએ વારંવાર પોતાના વતન પરત ફરવાની ઈચ્છા વ્યક્ત કરી છે. તાજેતરમાં જ તેમણે દિલ્હીથી ડિસેમ્બર પહેલાં બાંગ્લાદેશ પરત ફરવાની વાત દોહરાવી હતી. હાલમાં બંને દેશોની સુરક્ષા એજન્સીઓ વચ્ચે ચાલી રહેલી આ ગુપ્ત વાટાઘાટોને ખૂબ જ મહત્વપૂર્ણ માનવામાં આવી રહી છે.