Lifestyle: ચૂલા જેવો સ્મોકી સ્વાદ જોઈએ છે? ગેસ પર રીંગણ શેકતી વખતે અપનાવો આ ટ્રિક, બમણો થઈ જશે ભડથાનો સ્વાદ

રીંગણમાંથી બનતી વાનગીઓમાં રીંગણનું ભડથું (Baingan Bharta) સૌથી વધુ પસંદ કરવામાં આવે છે. સ્વાદમાં લાજવાબ આ વાનગી દાળ-ભાત, રોટલી કે બાજરીના રોટલા સાથે ખૂબ જ ટેસ્ટી લાગે છે. પરંતુ જ્યારે તેને ચૂલા પર શેકીને સ્મોકી ફ્લેવર આપવામાં આવે છે, ત્યારે તેનો સ્વાદ બમણો થઈ જાય છે.

જો તમે પણ ઘરે બેઠા દેશી સ્ટાઈલમાં સ્મોકી ફ્લેવર વાળું રીંગણનું ભડથું બનાવવા માંગો છો, તો અપનાવો આ સરળ રેસિપી.

બનાવવાનો સમય અને સામગ્રી

• કુલ સમય: ૩૦ મિનિટ (તૈયારી: ૫ મિનિટ, રસોઈ: ૨૫ મિનિટ)

• સર્વિંગ: ૨ લોકો માટે

જરૂરી સામગ્રી:

• મોટું ગોળ રીંગણ - ૧

• ડુંગળી - ૨ (ઝીણી સમારેલી)

• ટામેટાં - ૨ (ઝીણા સમારેલા)

• લીલા મરચાં - ૨

• લસણ - ૭ થી ૮ કળી

• આદુ - ૧ ઇંચ ટુકડો (છણેલું)

• લીલા ધાણા - ૨ ટેબલસ્પૂન

• સરસવનું તેલ - ૨ થી ૩ ટેબલસ્પૂન

• જીરું - ૧ ટીસ્પૂન, હિંગ - ૧/૪ ટીસ્પૂન

• હળદર, લાલ મરચું પાવડર, ધાણાજીરું - ૧/૨ થી ૧ ટીસ્પૂન

• ગરમ મસાલો - ૧/૨ ટીસ્પૂન, મીઠું - સ્વાદાનુસાર

રીંગણનું ભડથું બનાવવાની રીત:

૧. સ્મોકી સ્વાદ માટેની ખાસ ટ્રિક: સૌ પ્રથમ રીંગણને બરાબર ધોઈ લો અને ચપ્પુ વડે તેમાં ૩-૪ ઊભા કાપા પાડો. આ કાપાની અંદર લસણની કળીઓ અને લીલા મરચાં ભરી દો. આમ કરવાથી શેકતી વખતે લસણ અને મરચાંનો સ્વાદ રીંગણની અંદર સુધી બેસી જશે.

૨. રીંગણ શેકવાની રીત: રીંગણની બહારની છાલ પર થોડું સરસવનું તેલ લગાવો. ગેસ પર જાળી મૂકીને મધ્યમ આંચ પર રીંગણને શેકો. ચારેય બાજુથી બરાબર શેકાઈ જાય અને છાલ કાળી પડી જાય ત્યાં સુધી તેને ફેરવતા રહો.

૩. મિશ્રણ તૈયાર કરવું: શેકેલા રીંગણને પ્લેટમાં કાઢી થોડું ઠંડુ થવા દો. ત્યાર બાદ તેની કાળી છાલ ઉતારી લો. હવે શેકેલા રીંગણ, લસણ અને મરચાંને મેશર અથવા ચમચી વડે બરાબર મેશ કરી લો.

૪. વઘાર અને મસાલા: એક કડાઈમાં સરસવનું તેલ ગરમ કરી તેમાં જીરું અને હિંગ નાખો. જીરું સંતળાઈ જાય એટલે ઝીણી સમારેલી ડુંગળી અને આદુ ઉમેરીને ગોલ્ડન બ્રાઉન થાય ત્યાં સુધી સાંતળો. ત્યારબાદ ટામેટાં અને મીઠું ઉમેરો. ટામેટાં નરમ પડે એટલે હળદર, લાલ મરચું અને ધાણાજીરું પાવડર ઉમેરી ૧-૨ મિનિટ ધીમા તાપે સાંતળો.

૫. છેલ્લો ફિનિશિંગ ટચ: હવે કડાઈમાં મેશ કરેલું રીંગણનું મિશ્રણ ઉમેરી મસાલા સાથે બરાબર મિક્સ કરી લો. મધ્યમ આંચ પર ૫-૭ મિનિટ સતત હલાવતા રહીને પકાવો જેથી રીંગણ મસાલાને સરસ રીતે સોષી લે. છેલ્લે ગરમ મસાલો અને લીલા ધાણા ઉમેરી મિક્સ કરો.

ગરમાગરમ અને સ્મોકી ફ્લેવરવાળું રીંગણનું દેશી ભડથું તૈયાર છે!