Lifestyle: 33% જોખમ માત્ર ભારત-ચીનમાં! છૂપી રીતે તમારું આયુષ્ય ઘટાડી રહ્યું છે બેડ કોલેસ્ટ્રોલ, રિપોર્ટમાં ચોંકાવનારો ખુલાસો

આધુનિક અસ્તવ્યસ્ત જીવનશૈલી આપણા સ્વાસ્થ્ય માટે એક મોટો છૂપો ખતરો બની રહી છે. તાજેતરમાં સામે આવેલા એક વૈશ્વિક અભ્યાસ મુજબ, વિશ્વભરમાં જે દેશોમાં "ખરાબ" કોલેસ્ટ્રોલ (LDL) ના કેસો ઝડપથી વધી રહ્યા છે, તેમાં ભારત પણ અગ્રણી દેશોમાં સામેલ છે.

ખરાબ કોલેસ્ટ્રોલના કારણે ૩૬ લાખ મૃત્યુ

બેડ કોલેસ્ટ્રોલ (LDL) એ રક્તવાહિનીઓમાં જમા થતી મીણ જેવી ચરબી છે, જે હૃદય રોગ અને સ્ટ્રોકનું જોખમ વધારે છે. સામાન્ય રીતે શરીરમાં એચડીએલ કે એલડીએલનું સ્તર ૧૦૦ મિલિગ્રામ પ્રતિ ડેસિલીટરથી ઓછું હોવું જોઈએ.

અભ્યાસ અનુસાર, ૨૦૨૩માં હાઈ એલડીએલ (ખરાબ કોલેસ્ટ્રોલ)ના કારણે વિશ્વભરમાં ૩૬ લાખથી વધુ લોકોએ જીવ ગુમાવ્યો છે, જે કુલ મૃત્યુના ૬ ટકા જેટલો હિસ્સો ધરાવે છે. ચોંકાવનારી વાત એ છે કે વિશ્વના કુલ એલડીએલ જોખમમાંથી એક તૃતીયાંશ (૩૩%) હિસ્સો માત્ર ભારત અને ચીનમાં છે.

વસ્તી વધારો અને વૃદ્ધાવસ્થા મુખ્ય કારણો

'જર્નલ ઓફ ધ અમેરિકન મેડિકલ એસોસિએશન' (JAMA) માં પ્રકાશિત અહેવાલ મુજબ:

• ૧૯૯૦થી અત્યાર સુધીમાં મધ્યમ-આર્થિક સ્થિતિ ધરાવતા દેશોમાં એલડીએલ કોલેસ્ટ્રોલનું પ્રમાણ નોંધપાત્ર રીતે વધ્યું છે.

• વસ્તીમાં સતત થતો વધારો અને વધતી ઉંમર (વૃદ્ધાવસ્થા) આ વધતા જતા રોગચાળાના મુખ્ય કારણો છે.

• ૨૫ વર્ષ કે તેથી વધુ ઉંમરના લોકોમાં હાઈ એલડીએલ ધરાવતા દર્દીઓની સંખ્યા ૧૯૯૦માં ૨.૫ અબજ હતી, જે ૨૦૨૩માં વધીને ૪.૬ અબજ થઈ ગઈ છે.

વિશ્વના દેશોની સ્થિતિ

સંશોધન મુજબ, ૨૦૨૩માં બુર્કિના ફાસો, સોમાલિયા અને રવાંડા જેવા દેશોમાં એલડીએલનું સરેરાશ પ્રમાણ સૌથી ઓછું (૮૦ મિલીગ્રામથી ઓછું) નોંધાયું હતું. જ્યારે સર્બિયા, રશિયા, નાર્વે અને ઓસ્ટ્રિયામાં તે સૌથી વધુ (૧૩૫ મિલીગ્રામથી વધુ) જોવા મળ્યું હતું.

વૈજ્ઞાનિકો અને તબીબોના જણાવ્યા મુજબ, ૨૦૨૩માં હૃદય રોગથી થતા મૃત્યુ પાછળ હાઈ એલડીએલ કોલેસ્ટ્રોલ એ બીજું સૌથી મોટું કારણ બનીને સામે આવ્યું છે, જેના માટે ખાવા-પીવાની ટેવો અને જીવનશૈલીમાં સુધારો કરવો અત્યંત જરૂરી છે.