National: શું બદલાશે પાયલોટોના ડોપ ટેસ્ટના નિયમો? સરકારે એર ઈન્ડિયાને જવાબદારી સ્વીકારવા આકરી ચેતવણી આપી, DGCA ને આપ્યા નિર્દેશ

કેન્દ્ર સરકારે એર ઈન્ડિયાને પોતાના સંચાલન અને દેખરેખમાં તાત્કાલિક સુધારો કરવા તેમજ મુસાફરોની સુરક્ષા સુનિશ્ચિત કરવા માટે કડક ચેતવણી આપી છે. આ સાથે જ નાગરિક ઉડ્ડયન મંત્રાલયે એવિએશન રેગ્યુલેટર DGCA ને ડ્રગ-ટેસ્ટિંગ (ડોપ ટેસ્ટ) ના નિયમોમાં વહેલી તકે ફેરફાર કરવા અને ફરજિયાત તપાસના દાયરામાં વધુ કર્મચારીઓને આવરી લેવાનો આદેશ આપ્યો છે.

સરકારે DGCA ને નિર્દેશ આપ્યો છે કે પ્રતિબંધિત દ્રવ્યોના સેવન માટે પોઝિટિવ મળી આવતા કર્મચારીઓ સામે સખત શિક્ષાત્મક પગલાં લેવામાં આવે. જ્યારે ડૉક્ટરની સત્તાવાર દવાઓના કારણે ટેસ્ટ પોઝિટિવ આવે, તેવા કિસ્સામાં સ્પષ્ટતા માટે વધારાની તક આપવામાં આવે.

પાયલોટનો ડોપ ટેસ્ટ પોઝિટિવ આવ્યો

ગત ૪ ઓગસ્ટે ૧૪૫ મુસાફરોને લઈને આવી રહેલી એર ઈન્ડિયાની ફૂકેત-દિલ્હી ફ્લાઈટ (AI 2379) માં મોટી ટેકનિકલ ખામી સર્જાઈ હતી. આ દરમિયાન ઉડાનના પાયલોટ-ઈન-કમાન્ડનો ડોપ ટેસ્ટ પોઝિટિવ આવ્યો હતો. પાયલોટે તપાસકર્તાઓને જણાવ્યું હતું કે અંગત કારણોસર ઊંઘની ગોળીઓ લેવી પડી હતી, જેના કારણે ટેસ્ટ પોઝિટિવ આવ્યો છે. કેબિન ક્રૂની ફરિયાદ બાદ પાયલોટના વર્તનની પણ ગંભીર તપાસ થઈ રહી છે.

ટેકનિકલ ખામીના કારણે મોટો અકસ્માત ટળ્યો

રિપોર્ટ મુજબ, જ્યારે વિમાન ઓડિશાના આકાશમાંથી પસાર થઈ રહ્યું હતું, ત્યારે તેના ત્રણ હાઈડ્રોલિક સિસ્ટમ, દરવાજા અને એલિવેટર્સને લઈને સતત વોર્નિંગ એલાર્મ વાગવા લાગ્યા હતા. આ દરમિયાન ઓટો-પાયલોટ સિસ્ટમ પણ બંધ થઈ ગઈ હતી અને વિમાન અચાનક નીચે તરફ આવતા કેટલાક મુસાફરોને ઈજા પહોંચી હતી. જોકે, કો-પાયલોટની સમયસૂચકતાના કારણે વિમાનનું સુરક્ષિત લેન્ડિંગ શક્ય બન્યું હતું.

ઉચ્ચ સ્તરીય તપાસ શરૂ

ઉડ્ડયન સચિવ સમીર સિન્હાએ એર ઈન્ડિયાના ટોચના મેનેજમેન્ટને સ્પષ્ટ શબ્દોમાં કહી દીધું છે કે બેદરકારી દાખવનાર કોઈ પણ વ્યક્તિને બક્ષવામાં નહીં આવે. આ ટેકનિકલ ખામીઓની તપાસ માટે એરબસની ટીમ અને ફ્રેન્ચ એવિએશન રેગ્યુલેટરના અધિકારીઓ ભારત આવ્યા છે. એરક્રાફ્ટ એક્સિડન્ટ ઈન્વેસ્ટિગેશન બ્યુરો (AAIB) આ સમગ્ર મામલે ઊંડાણપૂર્વક તપાસ કરી રહ્યું છે.