Lifestyle: 6 મહિના પછી એક્સનો મોડી રાત્રે મેસેજ? પીગળી ન જતા, આ પ્રેમ નથી... 'પેપરક્લિપિંગ'ની ઝેરી રમત છે!

આજના આધુનિક યુગમાં ડેટિંગ વર્લ્ડમાં અવારનવાર નવા ટ્રેન્ડ્સ જોવા મળે છે. ક્યારેક 'ઘોસ્ટિંગ' (Ghosting), ક્યારેક 'બ્રેડક્રમ્બિંગ' (Breadcrumbing) તો ક્યારેક 'ગ્રેવયાર્ડ ડેટિંગ'. હવે આ લિસ્ટમાં એક નવો અને ઝેરી ટ્રેન્ડ ઉમેરાયો છે, જેનું નામ છે 'પેપરક્લિપિંગ' (Paperclipping). શું તમે પણ આ ડેટિંગ પેટર્નનો ભોગ બન્યા છો? ચાલો જાણીએ આ ખતરનાક રમત પાછળનું સત્ય.

શું છે આ 'પેપરક્લિપિંગ'?

ડેટિંગની દુનિયામાં પેપરક્લિપિંગ એક અત્યંત માનસિક તણાવ આપનારો શબ્દ છે. આમાં તમારો એક્સ (Ex-partner) કોઈ પણ ખાસ કારણ કે સદ્ભાવના વિના અચાનક અઠવાડિયાં કે મહિનાઓ પછી તમારો સંપર્ક કરવાનો પ્રયાસ કરે છે. આ સંપર્ક માત્ર તમને કન્ફ્યુઝ કરવા અને તેમની યાદ અપાવવા માટે જ કરવામાં આવે છે.

આ નામ પાછળનું લોજિક શું છે?

આ ટ્રેન્ડનું નામ માઇક્રોસોફ્ટ ઓફિસના જૂના વર્ચ્યુઅલ આસિસ્ટન્ટ 'ક્લિપી' (Clippy) ના નામ પરથી રાખવામાં આવ્યું છે, જે સ્ક્રીન પર અચાનક પોપ-અપ થઈને દેખાવા લાગતો હતો. જે રીતે વગર બોલાવ્યે ક્લિપી સ્ક્રીન પર આવી જતો, તેવી જ રીતે કેટલાક લોકોની જિંદગીમાં એક્સ અચાનક એન્ટ્રી મારી લે છે.

તમને માત્ર 'ઓપ્શન B' કે બેકઅપ બનાવવાની ચાલ

આ ટ્રેન્ડની સૌથી પરેશાન કરનારી બાબત એ છે કે સંપર્ક કરનાર વ્યક્તિનો ઈરાદો તમારી સાથે ફરીથી સંબંધ બાંધવાનો હોતો નથી. તે માત્ર પોતાની હાજરી નોંધાવવા અને તમને 'બેકઅપ ઓપ્શન' તરીકે રાખવા માંગે છે. સાદા શબ્દોમાં કહીએ તો, તેઓ દરવાજો એટલો ખુલ્લો રાખે છે જેથી તમને આશા રહે, પરંતુ પોતે સંબંધમાં આગળ વધવાનો કોઈ પ્રયાસ કરતા નથી.

ઝીરો એફર્ટ, મેક્સિમમ અટેન્શન ટ્રેપ

જે વ્યક્તિ પેપરક્લિપિંગ કરે છે, તે સંબંધ માટે કોઈ જ મહેનત (Zero Effort) કરતી નથી, છતાં તમારું પૂરેપૂરું ધ્યાન (Maximum Attention) ખેંચી લે છે. તેમનો હેતુ માત્ર પોતાના અહંકાર (Ego)ને સંતોષવાનો અને પોતાનો સ્વાર્થ સાધવાનો હોય છે.

પેપરક્લિપિંગના જાળમાંથી કેવી રીતે બચવું?

• સીમાઓ નક્કી કરો: દિલના બદલે મગજથી કામ લો અને તમારી પર્સનલ બાઉન્ડ્રીઝ નક્કી કરો.

• સંકેતો નજરઅંદાજ ન કરો: ભાવનાઓમાં વહીને તેમના આવા અચાનક આવતા મેસેજ કે કોલને ગંભીરતાથી ન લો.

• સોશિયલ મીડિયાથી અંતર: સોશિયલ મીડિયા પર તેમનાથી અંતર જાળવી રાખો.

• લાઈફ પર ફોકસ કરો: મુવ ઓન (Move on) કરવાના તમારા નિર્ણય પર મક્કમ રહો અને પોતાના ભવિષ્યને સુધારવા પર ધ્યાન આપો.