Lifestyle: ક્યાંક તમે પણ તો નથી ને બીજા માટે 'Too Nice'? આજે જ ઓળખો 'પીપલ પ્લીઝર' હોવાના આ 4 છુપા સંકેતો

શું તમને ક્યારેય કોઈએ એવું કહ્યું છે કે તમે બીજા લોકો માટે જરૂર કરતાં વધુ સારા છો? અથવા શું તમે તમારા કોઈપણ સંબંધમાં હંમેશા બલિદાન આપનાર કે બધું જ સહન કરનાર (Giver) ની ભૂમિકા એકલા જ નિભાવો છો? જો હા, તો સમજી લો કે તમે એક 'પીપલ પ્લીઝર' (People Pleaser) છો. દુનિયા ઘણીવાર આવા લોકોને નબળા અથવા ઓછા આત્મવિશ્વાસ ધરાવતા લોકોની શ્રેણીમાં મૂકે છે.

શું છે આ 'પીપલ પ્લીઝર' હોવું?

પીપલ પ્લીઝર હોવું એ એક માનસિક અને સામાજિક બિહેવિયરલ પેટર્ન છે, જેમાં વ્યક્તિને હંમેશા બહારના લોકોના પ્રમાણપત્ર (Validation) ની જરૂર પડે છે. જે લોકોમાં આત્મસન્માન કે પોતાની વેલ્યુ (Self-worth) ઓછી હોય છે, તેઓ બહારની દુનિયામાં પ્રેમ અને સ્વીકૃતિ શોધે છે. આ જ કારણે તેઓ પોતાની ઈચ્છાઓ, જરૂરિયાતો અને શોખને નજરઅંદાજ કરીને પણ હંમેશા બીજા લોકોને ખુશ રાખવામાં કે તેમની પ્રશંસા મેળવવામાં વ્યસ્ત રહે છે.

પીપલ પ્લીઝર હોવાના ૪ મુખ્ય સંકેતો

• દરેક વાતમાં 'હા' કહી દેવી: પરિવાર કે મિત્રોમાં કોઈને ગમે ત્યારે કોઈ કામ હોય અથવા ક્યાંય બહાર જવું હોય, જો તમે તમારા પોતાના કામ કે સમયને છોડીને પણ દરેક વખતે તેમની હામાં હા મિલાવો છો અને ક્યારેય 'ના' (No) નથી કહી શકતા, તો આ પીપલ પ્લીઝર હોવાની સૌથી મોટી નિશાની છે. આની પાછળનો હેતુ માત્ર લોકોની નજરમાં સારા બનવાનો હોય છે.

• મુશ્કેલી કે વિવાદથી બચવાનો પ્રયાસ: આ વર્તનને કાચબા જેવો અભિગમ (Tortoise approach) કહેવાય છે. જ્યારે કોઈ વિવાદ કે મુશ્કેલી આવે છે, ત્યારે આવી વ્યક્તિ પોતાનો પક્ષ રાખવાને બદલે બચાવત્મક મોડમાં આવી જાય છે અને પરિસ્થિતિને ટાળવાનો પ્રયત્ન કરે છે. પોતાની ભૂલ ન હોવા છતાં સામેવાળી વ્યક્તિ સાચી છે તેમ સ્વીકારી લે છે.

• બધું બરાબર છે તેવો ડોળ કરવો: કોઈ નજીકની વ્યક્તિ જ્યારે પૂછે કે 'તમે કેમ છો?', ત્યારે અંદરથી દુઃખી હોવા છતાં હંમેશા એવું કહેવું કે 'બધું બરાબર છે'. પીપલ પ્લીઝર ક્યારેય કોઈના પર બોજ બનવા નથી માંગતા, જેના કારણે તેઓ પોતાની તકલીફો છુપાવી રાખે છે.

• બીજાની લાગણીઓ માટે પોતાને જવાબદાર ગણવા: જો કોઈ અન્ય વ્યક્તિ દુઃખી કે નારાજ હોય, તો પીપલ પ્લીઝરને એવું લાગે છે કે તેના માટે પોતે જ જવાબદાર છે. પછી તેઓ સામેવાળાનો મૂડ સારો કરવા માટે આકાશ-પાતાળ એક કરી દે છે.

યાદ રાખો: જે લોકો પીપલ પ્લીઝર નથી હોતા, તેમની પોતાની ચોક્કસ સીમાઓ (Boundaries) હોય છે, જેને કોઈ ક્રોસ કરી શકતું નથી. સંબંધોમાં સન્માન મેળવવા માટે ક્યારેક 'ના' કહેતા શીખવું પણ એટલું જ જરૂરી છે.