Lifestyle: વરસાદમાં ભીંજાયા પછી ગંદા હાથે આંખો ચોળવી બની શકે છે ખતરનાક, આઈ ફ્લૂથી બચવા રાખો આ વાતોનું ધ્યાન

ચોમાસાનો વરસાદ ભલે ગરમીમાંથી રાહત અપાવે છે, પરંતુ તેની સાથે આંખોની સમસ્યાઓ પણ વધારી દે છે. વરસાદ શરૂ થતાં જ હોસ્પિટલો અને ક્લિનિક્સમાં આંખો લાલ થવી, ખંજવાળ આવવી અને ઈન્ફેક્શનના કેસોમાં અચાનક મોટો ઉછાળો જોવા મળે છે. તબીબોના જણાવ્યા મુજબ, થોડી જાગૃતિ અને સાચી સાવચેતી રાખવામાં આવે તો આંખોની મોટાભાગની સમસ્યાઓથી બચી શકાય છે.

ભેજવાળું વાતાવરણ બેક્ટેરિયાનું ઘર

ચોમાસામાં હવામાં રહેલો વધુ પડતો ભેજ બેક્ટેરિયા, વાયરસ અને ફંગસને પાંગરવા માટે સૌથી અનુકૂળ વાતાવરણ પૂરું પાડે છે. રસ્તાઓ પર ભરાયેલા પાણી અને ભીની સપાટીઓ આ જીવાણુઓના મુખ્ય વાહક બને છે. વરસાદમાં પલળ્યા બાદ લોકો અજાણતા ગંદા હાથે આંખો ચોળવા લાગે છે, જે કન્જક્ટિવાઈટિસ (Conjunctivitis) ફેલાવવાનું સૌથી મોટું કારણ છે.

કન્જક્ટિવાઈટિસના લક્ષણો અને ફેલાવો

આ બીમારી સામાન્ય ભાષામાં "આંખ આવવી", "પિંક આઈ" કે "આઈ ફ્લૂ" તરીકે ઓળખાય છે. તેના મુખ્ય લક્ષણોમાં આંખો અતિશય લાલ થવી, ખંજવાળ આવવી, આંખમાંથી પાણી કે ચીકણો પદાર્થ નીકળવો અને પોપચાં પર સોજો આવવો શામેલ છે. આ ચેપ સંક્રમિત હાથ, ટુવાલ કે દરવાજાના હેન્ડલ દ્વારા એકથી બીજી વ્યક્તિમાં ખૂબ જ ઝડપથી ફેલાય છે.

કોન્ટેક્ટ લેન્સ વાપરનારા રાખે ખાસ ધ્યાન

જો તમે કોન્ટેક્ટ લેન્સનો ઉપયોગ કરો છો, તો આ ઋતુમાં સ્વચ્છતાનું ખાસ ધ્યાન રાખવું. લેન્સને ક્યારેય નળના પાણી કે વરસાદના પાણીથી ન ધોવા. આંખોમાં સહેજ પણ બળતરા કે અસહજતા લાગે તો લેન્સ પહેરવાનું ટાળવું. લેન્સને અડતાં પહેલાં હાથ બરાબર સાફ કરવા, કારણ કે આ દિવસોમાં કોર્નિયાનું ઈન્ફેક્શન (કેરાટાઈટિસ) થવાનું જોખમ વધી જાય છે.

આંખોની સુરક્ષા માટે સરળ ટેવો

• હાથ વારંવાર ધોવા: હાથ સાફ કર્યા વિના આંખોને ક્યારેય ન અડવું.

• ટિશ્યૂનો ઉપયોગ: વરસાદમાં ભીંજાયા બાદ આંખો લૂછવા માટે શર્ટની બાંય કે અન્યના ટુવાલનો ઉપયોગ ન કરતા માત્ર સાફ ટિશ્યૂ વાપરવું.

• આઈ મેકઅપ શેર ન કરવો: કાજળ, આઈલાઈનર કે અન્ય આઈ મેકઅપ પ્રોડક્ટ્સ બીજા સાથે શેર ન કરવી.

• ચશ્મા સાફ રાખવા: ચશ્મા પહેરતા લોકોએ માઈક્રોફાઈબર કપડું સાથે રાખવું જેથી વરસાદના ટીપાંથી ધૂંધળી થયેલી દ્રષ્ટિ સાફ કરી શકાય અને આંખો ચોળવી ન પડે.

ડૉક્ટરની સલાહ ક્યારે લેવી?

સામાન્ય રીતે આંખોની બળતરા બે-ત્રણ દિવસમાં આરામ કરવાથી ઠીક થઈ જાય છે, પરંતુ જો આંખોમાંથી ઘટ્ટ પીળો કે લીલો પદાર્થ નીકળે, અસહ્ય દુખાવો થાય, પ્રકાશ સામે જોવામાં તકલીફ પડે કે દ્રષ્ટિ ધૂંધળી થઈ જાય, તો તરત જ નેત્રરોગ નિષ્ણાત (ઓપ્થેલ્મોલોજિસ્ટ) નો સંપર્ક કરવો. જૂની કે અગાઉથી પડેલી આઈ ડ્રોપ્સ ડૉક્ટરની સલાહ વગર ક્યારેય ન વાપરવી.

બાળકોની કાળજી લેવી અત્યંત જરૂરી

બાળકો વારંવાર આંખોને સ્પર્શ કરતા હોવાથી સંક્રમણનો ભોગ ઝડપથી બને છે. જો શાળામાંથી આઈ ફ્લૂ ફેલાવાના સમાચાર મળે, તો સાવચેતીના ભાગરૂપે બાળકને ઘરમાં જ રાખવું અને તેમને વારંવાર હાથ ધોવાની ટેવ પાડવી.