Lifestyle: ચોમાસામાં બાલ્કનીને બનાવી લો કિચન ગાર્ડન! ખૂબ જ સરળતાથી ઉગી જશે આ 4 શાકભાજી, નોંધી લો રીત

આપણે બધા જાણીએ છીએ કે ચોમાસાની ઋતુમાં છોડનો વિકાસ ખૂબ જ ઝડપથી થાય છે, તેથી આ મોસમ કિચન ગાર્ડનિંગ (Kitchen Gardening) શરૂ કરવા માટે સૌથી ઉત્તમ માનવામાં આવે છે. ઘરના કુંડામાં શાકભાજી ઉગાડવાનો આ આઈડિયા માત્ર પૈસાની બચત જ નથી કરતો, પરંતુ તમને કેમિકલ મુક્ત એકદમ તાજા ઓર્ગેનિક શાકભાજી પણ પૂરા પાડે છે. જો તમારા ઘરમાં અગાશી (છત) અથવા બાલ્કનીમાં થોડી પણ ખાલી જગ્યા હોય, તો તમે ત્યાં સરળતાથી લીલા શાકભાજી ઉગાડી શકો છો.

ચાલો જાણીએ ઘરની બાલ્કનીમાં સરળતાથી ઉગી જતાં 4 શાકભાજી અને તેને વાવવાની સાચી પદ્ધતિ વિશે.

ટામેટા (Tomato)

• બીજની પસંદગી: લાલ પાકા ટામેટામાંથી બીજ કાઢી લો અથવા બજારમાંથી ઓર્ગેનિક બીજ ખરીદી લાવો.

• કુંડું અને માટી: એક નાનું કુંડું લો (જેમાં નીચે પાણી નિકાલ માટે કાણું હોય). તેમાં માટી, ઓર્ગેનિક ખાતર અને કોકોપીટ મિક્સ કરીને ભરી દો.

• વાવવાની રીત: બીજને માટીમાં અડધો ઈંચ જેટલા જ ઊંડા વાવો, વધારે ઊંડાણપૂર્વક ન વાવવા.

• સંભાળ: બીજ વાવ્યા પછી હળવો પાણીનો છંટકાવ કરો. ટામેટાના છોડને રોજ ૫-૬ કલાકનો સૂર્યપ્રકાશ મળે તે જરૂરી છે.

પાલક (Spinach)

• બીજની તૈયારી: પાલકના બીજને વાવતા પહેલાં ઓછામાં ઓછા ૨૪ કલાક માટે પાણીમાં પલાળી રાખો.

• કુંડું અને માટી: ૬ થી ૮ ઈંચ ઊંડું અને પહોળું કુંડું લો. તેમાં માટી, ખાતર અને કોકોપીટનું મિશ્રણ ભરો.

• વાવવાની રીત: પલાળેલા બીજને માટીની ઉપર થોડા-થોડા અંતરે વેરી દો. ત્યારબાદ ઉપર માટીનું એક પાતળું સ્તર (લેયર) ઢાંકીને પાણી આપો.

• સંભાળ: ચોમાસા કે ગરમીમાં જ્યારે ઉપરની માટી સુકાવા લાગે ત્યારે જ પાણી આપો. આ છોડ હળવા તડકા અને છાંયડા વાળી જગ્યાએ પણ સરસ ઉગી નીકળે છે.

કોથમીર / ધાણા (Coriander)

• બીજની તૈયારી: આખા ધાણાને લઈને સુતરાઉ (કોટન) કપડામાં રાખો અને વેલણની મદદથી હળવા હાથે મસળીને તેના બે ભાગ (ફાડા) કરી લો. ત્યારબાદ તેને થોડીવાર પલાળી રાખો.

• કુંડું અને માટી: ધાણા વાવવા માટે ૬ થી ૮ ઈંચ ઊંડું કુંડું બેસ્ટ રહેશે. તેમાં માટી અને ખાતરનું મિશ્રણ તૈયાર કરો.

• વાવવાની રીત: ધાણાના ટુકડાને કુંડામાં ચારેય બાજુ સરખા ભાગે વિખેરી દો અને ઉપર માટીની પાતળી પરત ઢાંકી દો.

• સંભાળ: માટી ભીની થાય તેટલું જ નિયમિત પાણી આપો. કોથમીરના સારા વિકાસ માટે પૂરતો સૂર્યપ્રકાશ જરૂરી છે.

લીલા મરચાં (Green Chilli)

• બીજની તૈયારી: એક પાકેલા લાલ મરચામાંથી બીજ કાઢીને તેને તડકામાં બરાબર સૂકવી લો.

• કુંડું અને માટી: મરચાના છોડ માટે થોડું મોટું એટલે કે ૧૦ થી ૧૨ ઈંચ ઊંડું કુંડું લો અને તેમાં ખાતરયુક્ત માટી ભરો.

• વાવવાની રીત: સુકવેલા બીજને અડધો ઈંચ ઊંડા વાવીને ઉપર હળવી માટી ઢાંકી દો.

• સંભાળ: છોડને સમયસર જરૂરિયાત મુજબ પાણી આપતા રહો અને કુંડાને એવી જગ્યાએ રાખો જ્યાં સારો તડકો આવતો હોય.

ગાર્ડનિંગ ટીપ: ચોમાસામાં કુંડામાં પાણી ભરાઈ ન રહે તેનું ખાસ ધ્યાન રાખવું, નહિતર છોડના મૂળ સડી જશે.