Lifestyle: મીઠું ખાવાનો શોખ છીનવી રહ્યો છે ચહેરાનો ગ્લો: જાણો કેવી રીતે ખાંડ તમારી ત્વચાને બનાવી રહી છે બેજાન

ત્વચા હંમેશાં બેજાન અને ડલ દેખાવા પાછળ માત્ર ધૂળ-માટી કે પ્રદૂષણ જ જવાબદાર નથી હોતું, પરંતુ તમારા ખોરાકમાં રહેલી ખાંડ (Sugar) આનું સૌથી મોટું કારણ હોઈ શકે છે. સવારની ચા-કોફીથી લઈને જમ્યા પછી ગળ્યું ખાવાની આદત સુધી, આપણે અજાણતા જ પુષ્કળ સુગર શરીરમાં પધરાવીએ છીએ. વિજ્ઞાન પણ માને છે કે ખાંડના અતિશય સેવનથી ત્વચા પર ડાઘ-ધબ્બા અને કરચલીઓ વધે છે, જેનાથી સ્કિન નાની ઉંમરમાં જ ઘરડી દેખાવા લાગે છે.

વધુ પડતી ખાંડ ખાવાથી ત્વચાને થતા નુકસાન

મીઠાઈઓ ખાવામાં ભલે સ્વાદિષ્ટ લાગે, પરંતુ તે તમારી ત્વચા પર ખૂબ જ ખરાબ અસરો છોડે છે:

• ખીલ અને પિમ્પલ્સની સમસ્યા: વધુ ગળ્યું ખાવાથી આપણું પાચનતંત્ર તેને તરત જ ગ્લુકોઝમાં ફેરવી દે છે. આનાથી બ્લડ સુગર અને ઇન્સ્યુલિનનું સ્તર અચાનક વધી જાય છે, જેના કારણે ત્વચામાં સીબમ (ઓઈલ) નું ઉત્પાદન વધી જાય છે અને ચહેરા પર ખીલ થવા લાગે છે.

• ત્વચા પર સોજો (Inflammation): ખાંડ અથવા તેમાંથી બનેલી વસ્તુઓનો ગ્લાયસેમિક ઇન્ડેક્સ ઘણો ઊંચો હોય છે. આના લીધે શરીરમાં અને ત્વચા પર સોજો તેમજ લાલાશ વધવાનો ખતરો રહે છે.

• નાની ઉંમરે કરચલીઓ (Aging): શરીરમાં સુગરનું પ્રમાણ વધવાથી 'ગ્લાયકેશન' (Glycation) ની પ્રક્રિયા ઝડપી બને છે. આ પ્રક્રિયા ત્વચાને યુવાન રાખતા બે મુખ્ય પ્રોટીન - કોલેજન અને ઇલાસ્ટિનને નુકસાન પહોંચાડે છે, જેથી ત્વચા ઢીલી પડી જાય છે અને કરચલીઓ દેખાવા લાગે છે.

ખાંડ ત્વચાને નુકસાન કરી રહી છે તે કેવી રીતે ઓળખશો?

જો તમારી ત્વચામાં નીચે મુજબના લક્ષણો દેખાય, તો સમજી લેવું કે ખાંડ તમારા ફેસને બગાડી રહી છે:

• ગાલ અને કપાળ પર ઊંડી કરચલીઓ પડવી.

• દાઢી (Chin) અને જોલાઇનની આસપાસની ત્વચા ઢીલી પડી જવી.

• ચહેરા પર સતત લાલાશ અને ખીલ થવા.

• વધુ પડતા ઓઈલના કારણે સ્કીનના પોર્સ (છિદ્રો) મોટા થઈ જવા.

• ત્વચાનો કુદરતી રંગ ગાયબ થઈને તે પીળી કે ગ્રે જેવી બેજાન દેખાવી.

ત્વચાને ફરીથી હેલ્ધી કેવી રીતે બનાવવી?

ત્વચાનો ગ્લો પાછો મેળવવા માટે સૌથી પહેલા ડાયેટમાંથી રિફાઇન્ડ ખાંડનું પ્રમાણ સાવ ઓછું કરી દો. ગળપણ માટે ખાંડના સ્થાને ઓર્ગેનિક ગોળ, મધ અથવા નેચરલ સ્વીટનરનો ઉપયોગ કરો. તમારા ખોરાકમાં એન્ટી-ગ્લાયકેશન ફૂડ્સ જેવા કે બેરીઝ, ગ્રીન ટી, બ્રોકોલી અને પાલકનો સમાવેશ કરો. આ સિવાય દિવસભર પુષ્કળ પાણી પીઓ જેથી શરીરના ટોક્સિન્સ બહાર નીકળી જાય અને ત્વચા કુદરતી રીતે ચમકવા લાગે.