Lifestyle: મોંઘા શેમ્પૂ નહીં, વાળ ધોવાની ‘જાપાનીઝ રીત’ છે સિલ્કી અને શાઇની હેરનું અસલી રહસ્ય; ચોક્કસ કરો ટ્રાય

જાપાનની મહિલાઓ પોતાના કુદરતી રીતે જ સિલ્કી, સ્મૂધ અને ચમકતા વાળ માટે આખી દુનિયામાં જાણીતી છે. તેમની આ સુંદરતાનું રહસ્ય કોઈ મોંઘા હેર પ્રોડક્ટ્સ નથી, પરંતુ વાળ ધોવાની સાચી પદ્ધતિ, સ્કેલ્પ (માથાની ત્વચા) ની સંભાળ અને સાચો રૂટિન છે. આ જાપાનીઝ ટેકનિકમાં વાળને માત્ર ઉપરથી સાફ નથી કરવામાં આવતા, પરંતુ તેને અંદરથી હેલ્ધી બનાવવામાં આવે છે.

જો તમારા વાળ પણ શુષ્ક, બેજાન, નબળા કે ફ્રિઝી થઈ ગયા હોય, તો આ જાપાનીઝ હેર વોશિંગ મેથડ તમારા વાળની કાયાપલટ કરી શકે છે. ચાલો જાણીએ આ અનોખી રીત વિશે.

શું છે વાળ ધોવાની આ જાપાનીઝ પદ્ધતિ?

• પ્રી-કોમ્બિંગ (વાળ ઓળાવા): વાળ ધોતા પહેલા કોરા વાળને સારી રીતે ઓળી લેવા ખૂબ જ જરૂરી છે. આનાથી વાળની ગૂંચ ઉકલી જાય છે, ધૂળ-માટી બહાર નીકળે છે અને સ્કેલ્પમાં બ્લડ સર્ક્યુલેશન વધે છે. જેથી શેમ્પૂ મૂળ સુધી બરાબર પહોંચી શકે.

• નવશેકા પાણીથી વાળ ભીના કરવા: જાપાની પદ્ધતિમાં શેમ્પૂ લગાવતા પહેલા વાળને ૧ થી ૨ મિનિટ સુધી નવશેકા (હળવા ગરમ) પાણીથી બરાબર ભીના કરવામાં આવે છે. આનાથી સ્કેલ્પના પોર્સ (છિદ્રો) ખુલે છે અને જમા થયેલું તેલ કે ગંદકી ઢીલી પડી જાય છે.

• શેમ્પૂનો ફીણ બનાવીને લગાવવો: ક્યારેય પણ શેમ્પૂ સીધું માથા પર ન નાખો. હથેળીમાં થોડું શેમ્પૂ લઈ, પાણી મિક્સ કરીને તેનો ફીણ (Foam) બનાવો અને પછી તેને વાળમાં લગાવો. આનાથી કેમિકલ્સની સીધી આડઅસર થતી નથી.

• આંગળીઓથી સ્કેલ્પ મસાજ: આંગળીઓના ટેરવા વડે હળવા હાથે ગોળાકાર (Circular Motion) માં ૨-૩ મિનિટ મસાજ કરો. નખનો ઉપયોગ ભૂલથી પણ ન કરવો. આ મસાજથી વાળ ખરતા અટકે છે, ડેન્ડ્રફ કંટ્રોલમાં રહે છે અને હેર ગ્રોથ સારો થાય છે.

• વાળ બરાબર ધોવા (Rinse): વાળમાંથી શેમ્પૂ સંપૂર્ણપણે નીકળી જવું જોઈએ. જો શેમ્પૂનો થોડો પણ ભાગ રહી જશે, તો માથામાં ખંજવાળ અને વાળ ખરવાની સમસ્યા થઈ શકે છે. છેલ્લે વાળને એકવાર ઠંડા કે નોર્મલ પાણીથી ધોઈ લો, જેનાથી વાળમાં નેચરલ શાઈન આવશે.

• કન્ડિશનરનો સ્માર્ટ ઉપયોગ: કન્ડિશનર હંમેશા વાળની લંબાઈ (પૂંછડીના ભાગ) પર જ લગાવો, માથાના મૂળમાં નહીં. ૨-૩ મિનિટ રાખીને તેને ધોઈ લો. આનાથી વાળ સોફ્ટ અને ફ્રિઝ-ફ્રી બને છે.

• વાળ સુકવવાની સાચી રીત: વાળને ટુવાલથી જોરજોરથી રગડવાને બદલે હળવા હાથે દબાવીને પાણી નિતારી લો. માઇક્રો-ફાઇબર ટુવાલ આના માટે બેસ્ટ છે. ભીના વાળ પર વધુ જોર કરવાથી તે તૂટી જાય છે.

• કુદરતી હવા અને પોષણ: જાપાની હેર કેરમાં હેર ડ્રાયર કે હીટ ટુલ્સનો ઉપયોગ ટાળવામાં આવે છે. વાળને કુદરતી રીતે જ સુકાવા દો અને છેલ્લે થોડું આર્ગન ઓઈલ અથવા હેર સીરમ લગાવો જેથી વાળનો ભેજ લોક થઈ જાય.

જો તમે આ જાપાનીઝ પદ્ધતિને નિયમિત રીતે અપનાવશો, તો ગણતરીના અઠવાડિયામાં જ તમારા વાળ મજબૂત, સિલ્કી અને અદભૂત ચમકદાર બની જશે.