Lifestyle: સફેદ અને ખરતા વાળ માટે ઔષધિ છે ઘરમાં બનેલું આ આમળા-મેથીનું તેલ, નોંધી લો બનાવવાની અને લગાવવાની સાચી રીત

શું તમારા વાળ નાની ઉંમરમાં સફેદ થઈ રહ્યા છે અને જરૂર કરતાં વધુ ખરી રહ્યા છે? જો હા, તો આમળા અને મેથીમાંથી બનેલું હોમમેઇડ તેલ વાળનું ખરવું રોકવામાં અને સફેદ થવાની પ્રક્રિયાને ધીમી કરવામાં અત્યંત મદદરૂપ સાબિત થઈ શકે છે. સૌથી સારી વાત એ છે કે આ માટે તમારે માર્કેટમાંથી મોંઘું તેલ લાવવાની જરૂર નથી, પરંતુ તમે તેને સરળતાથી ઘરમાં જ બનાવી શકો છો.

વાળ માટે આમળા-મેથી તેલના ફાયદા

આમળા અને મેથીનું તેલ વાળ માટે ઔષધિ સમાન છે. તેને નિયમિતપણે લગાવવાથી વાળના વિકાસ (Hair Growth) ને પ્રોત્સાહન મળે છે અને સફેદ વાળ થતાં અટકે છે. આ તેલમાં રહેલું વિટામિન-સી અને એન્ટીઓક્સીડેન્ટ્સ વાળને મૂળમાંથી મજબૂત બનાવે છે.

જરૂરી સામગ્રી:

• ૧૦-૧૨ તાજા આમળાં

• ૧ નાની ચમચી મેથીના દાણા

• ૧ કપ નાળિયેરનું તેલ (કોકોનટ ઓઈલ)

બનાવવાની સરળ રીત:

૧. સૌથી પહેલાં એક ચમચી મેથીના દાણાને આખી રાત પાણીમાં પલાળી રાખો.

૨. તેલ બનાવવા માટે આમળાંને બરાબર ધોઈ, તેના ઠળિયા અલગ કરીને નાના-નાના ટુકડા કરી લો.

૩. પલાળેલા મેથીદાણા અને આમળાંના ટુકડાને મિક્સર જારમાં નાખીને બારીક પીસી લો.

૪. હવે ગેસ પર એક કડાઈ મૂકી તેમાં નાળિયેરનું તેલ ગરમ કરવા મૂકો.

૫. તેલ હળવું ગરમ થાય એટલે તેમાં આમળાં અને મેથીની પેસ્ટ ઉમેરો.

૬. આ મિશ્રણને ધીમા તાપે ઓછામાં ઓછું ૧૫ મિનિટ સુધી પાકવા દો, જેથી આમળાં અને મેથીના તમામ પોષક તત્વો તેલમાં ભળી જાય.

૭. જ્યારે આમળાંનો રંગ હળવો બદામી થઈ જાય અને સરસ સુગંધ આવવા લાગે ત્યારે ગેસ બંધ કરી દો.

૮. આ તેલને રૂમ ટેમ્પરેચર પર ઠંડુ થવા દો. ઠંડુ થયા પછી તેને ગાળીને કાચની બોટલ કે કન્ટેનરમાં સ્ટોર કરી લો.

તેલ લગાવવાની સાચી રીત:

આમળા-મેથીના તેલને અઠવાડિયામાં બે વાર માથું ધોતા પહેલાં લગાવી શકાય છે. વાળમાં તેલ લગાવતા પહેલાં તેને થોડું નવશેકું ગરમ કરી લો. ત્યારબાદ હથેળીમાં તેલ લઈને સ્કેલ્પ પર હળવા હાથે ૫-૬ મિનિટ સુધી મસાજ કરો. મસાજ કર્યાના ૧-૨ કલાક પછી માઈલ્ડ શેમ્પૂથી વાળ ધોઈ લો.