Lifestyle: ઘરે જ બનાવો માર્કેટ કરતાં પણ ટેસ્ટી ટોમેટો સોસ, એકવાર ચાખશો તો બજારમાંથી ખરીદવાનું મન નહીં કરે

ભજિયાં હોય, સમોસા હોય કે પછી બાળકોનું ફેવરિટ પાસ્તા, ટોમેટો સોસ વગર દરેક સ્નેક્સની મજા અધૂરી લાગે છે. બાળકો ઘણીવાર રોટલી કે પરાઠા સાથે પણ સોસ ખાવાનું પસંદ કરતા હોય છે. પરંતુ બજારમાં મળતા પ્રોસેસ્ડ સોસમાં પ્રિઝર્વેટિવ્સ, કેમિકલ્સ અને વધુ પડતી ખાંડ હોય છે, જે સ્વાસ્થ્ય માટે હાનિકારક છે.

આવામાં તમે ઘરે જ તાજા લાલચોળ ટામેટાંમાંથી શુદ્ધ અને સ્વાદિષ્ટ સોસ બનાવી શકો છો. આ બનાવવો ખૂબ જ સરળ છે અને તેનો ટેસ્ટ એટલો અદ્ભુત હોય છે કે પરિવારના સભ્યો માર્કેટનો સોસ ભૂલી જશે.

ટોમેટો સોસ બનાવવા માટેની સામગ્રી

• ટામેટાં: ૧ કિલો (લાલ અને પાકા)

• આદુ: ૧ ઇંચનો ટુકડો

• લસણ: ૪-૫ કળી (ઓપ્શનલ)

• ડુંગળી: ૧ નાની (મોટી સુધારેલી)

• ખાંડ: અડધો કપ (સ્વાદ મુજબ)

• સફેદ સરકો (Vinegar): ૧/૪ કપ

• કાશ્મીરી લાલ મરચું પાવડર: ૧ નાની ચમચી

• ગરમ મસાલો: અડધી નાની ચમચી

• મીઠું: સ્વાદાનુસાર (સાધું મીઠું અને સંચળ)

ટોમેટો સોસ બનાવવાની સરળ રીત

સૌથી પહેલાં ટામેટાંને ધોઈને તેના મોટા ટુકડા કરી લો. એક કડાઈ કે કુકરમાં ટામેટાં, ડુંગળી, આદુ, લસણ અને અડધો કપ પાણી ઉમેરીને ૧૦ થી ૧૫ મિનિટ ધીમા તાપે ટામેટાં સોફ્ટ થાય ત્યાં સુધી બાફી લો.

મિશ્રણ સંપૂર્ણપણે ઠંડું થાય એટલે તેને મિક્સર ગ્રીન્ડરમાં પીસીને એકદમ સ્મૂધ પેસ્ટ બનાવી લો.

બજાર જેવા મખમલી ટેક્સચર માટે આ પેસ્ટને મોટી ગળણીથી બરાબર ગાળી લો, જેથી બીજ અને છાલ અલગ થઈ જાય.

હવે આ ટામેટાંના પલ્પને કડાઈમાં કાઢીને ગેસ પર ઉકાળો. તેમાં ખાંડ, મીઠું, સંચળ, કાશ્મીરી લાલ મરચું અને ગરમ મસાલો ઉમેરીને બરાબર મિક્સ કરો.

મિશ્રણ થોડું ઘટ્ટ થાય એટલે તેમાં વિનેગર ઉમેરો. વિનેગર ઉમેરવાથી સોસમાં ખટાશ આવે છે અને તે લાંબા સમય સુધી ખરાબ થતો નથી.

સોસ બરાબર પાક્યો છે કે નહીં તે ચકાસવા માટે પ્લેટ ટેસ્ટ કરો. એક પ્લેટમાં સોસના બે ટીપાં મૂકી પ્લેટ ત્રાસી કરો. જો પાણી અલગ થઈને ન વહે તો સમજવું કે સોસ તૈયાર છે.

સોસ સંપૂર્ણ ઠંડો થાય એટલે કાચની એરટાઈટ બોટલમાં ભરી લો. આ સોસને ફ્રિજમાં રાખીને ૨ મહિના સુધી વાપરી શકાય છે.